ဟာနာဆန်/People’s Spring
မကွေးတိုင်း၊ ရေနံချောင်းမြို့နယ်တွင် စစ်ကောင်စီ၏ ရဲဒုတပ်ကြပ်နှစ်ဦးအား ဖမ်းဆီးစဥ် ပြန်လည်ခုခံ၍ပစ်ခတ်ခဲ့ရာ နှစ်ဦးစလုံးသေဆုံးသွားကြောင်း ပြည်သူ့ကာကွယ်ရေးတပ်မတော်(ရေနံချောင်း)မှတာဝန်ခံ ကိုစံသျှားက ပြောသည်။
ယမန်နေ့(ဒီဇင်ဘာ ၁၁ရက်) နံနက် ၁၁ နာရီခန့်က ရေနံချောင်းမြို့နယ်အတွင်း အရပ်ဝတ်ဖြင့် တော်လှန်ရေးတပ်ဖွဲ့များ၏သတင်း လိုက်လံထောက်လှမ်းနေသော လက်မှတ်ကုန်းနယ်မြေရဲစခန်းမှ ရဲဒုတပ်ကြပ်အောင်ဒင်နှင့် ဒုတပ်ကြပ်မြတ်စိုးနိုင်တို့နှစ်ဦးအား မကျည်းတိုင်း-ဖိုးကိုးလမ်းပိုင်းတွင် ဖမ်းဆီးရာ လက်ပစ်ဗုံးဖြင့်ပြန်လည်ခုခံ၍ ပစ်ခတ်ခဲ့ရာသေဆုံးသွားကြောင်း ရေနံချောင်း PDFတာဝန်ခံ ကိုစံသျှားက ပြောသည်။
“တစ်ဦးကနေရာမှာတင် သေပြီး၊ ကျန်တစ်ဦးကခေါ်လာစဉ် သွေးထွက်လွန်ပြီးသေတာပါ။ အလောင်း ၂ခုလုံးကို ကျွန်တော်တို့ပဲ သဂြိုလ်ပေးခဲ့ပါတယ်။”ဟု ရေနံချောင်း PDFတာဝန်ခံ ကိုစံသျှားက ပြောသည်။
Public Service Announcement
အဆိုပါရဲနှစ်ဦးထံမှ လက်နက်ရရှိခြင်းမရှိဘဲ လက်ပစ်ဗုံးတစ်လုံး၊ ရဲစာရွက်စာတမ်းများနှင့် ဖုန်း သုံးလုံးသိမ်းဆည်းရမိခဲ့ကြောင်း ရေနံချောင်း PDFက အသိပေးထားသည်။
ပစ်ခတ်မှုဖြစ်ပွားပြီးနောက် နေ့လယ် ၂နာရီခန့်တွင် အင်အား ၁၅ဦးခန့်ပါ ရဲကား ၂စီးရောက်ရှိလာသော်လည်း ပစ်ခတ်မှုဖြစ်ပွားသည့် နေရာအထိရောက်ရှိ မလာဘဲလှည့်ပြန်သွားကြောင်း ဒေသခံများထံမှ သိရသည်။
အဆိုပါဖမ်းဆီးမှုကို People’s Defence Force -Yenangyaung ၊Tamar Myay Special Coloumနှင့် Midland Dolphin’s Coloum တို့ ပူးပေါင်းဆောင်ရွက်ခဲ့ခြင်းဖြစ်သည်။
ပြီးခဲ့သည့် ၂၀၂၃ ဇန်နဝါရီအတွင်းကလည်း လက်မှတ်ကုန်းနယ်မြေရဲစခန်းမှ ရဲအုပ်နှင့် စစ်သားများသည် ရေနံချောင်းမြို့ ယာပြင်စစ်ဆေးရေးဂိတ်မှ ပြန်လာစဥ် မိုင်းဆွဲတိုက်ခိုက်ခံရပြီး ထိခိုက်သေဆုံးမှုများရှိခဲ့သည်။
