စစ်တပ်ပစ်သည့် လက်နက်ကြီးထိ၍ ပြည်သူနှစ်ဦး သေဆုံး
စစ်တပ်ပစ်သည့် လက်နက်ကြီးထိ၍ ပြည်သူနှစ်ဦး သေဆုံးကျော်ဇော/People’s Spring
ပဲခူးတိုင်း၊ ဖြူးမြို့နယ်အတွင်း စစ်ကြောင်းထိုးလာသော စစ်ကောင်စီတပ်နှင့် တော်လှန်ရေးတပ်ဖွဲ့များကြား ထိတွေ့တိုက်ပွဲဖြစ်ပွားခဲ့ကြောင်း တောင်ပိုင်းစစ်ဒေသ၊ အမှတ်(၂) စစ်ဒေသခွဲက အသိပေးထုတ်ပြန်သည်။
ဒီဇင်ဘာ ၂၆ ရက်က ဖြူးမြို့နယ်၊ မျက်နီးကွင်းကျေးရွာဘက်သို့ စစ်ကြောင်းထိုးလာသော စစ်ကောင်စီတပ်အား အမှတ် (၂)စစ်ဒေသခွဲအောက်ရှိ PDF တပ်ရင်း (၃၅၀၂)မှ ရဲဘော်များက တိုက်ခိုက်ခဲ့ခြင်းဟု ဖော်ပြသည်။
တိုက်ပွဲဖြစ်ပွားနေစဥ် စစ်ကောင်စီ လက် အောက်ခံ ဇရပ်ကြီးမြို့အခြေစိုက် ခလရ(၇၃)မှ လက်နက်ကြီးများ ရမ်းသမ်းပစ်ခတ်ခဲ့ရာ ထန်းကုန်းကျေးရွာအတွင်း ကျရောက်ပေါက်ကွဲခဲ့ကြောင်း ထုတ်ပြန်သည်။
Public Service Announcement
အဆိုပါ လက်နက်ကြီးကျရောက်ပေါက်ကွဲမှုကြောင့် ထန်းကုန်းရွာမှ အရပ်သားပြည်သူ နှစ်ဦး နေရာတွင်သေဆုံးခဲ့ပြီး (၆)နှစ်အရွယ် ကလေးတစ်ဦးမှာလည်း ဦးခေါင်း၌ ပြင်းထန်ဒဏ်ရာရရှိခဲ့ကြောင်း အမှတ်(၂)စစ်ဒေသခွဲက အသိပေးသည်။
ထိတွေ့တိုက်ပွဲအခြေအနေအပြည့်အစုံအား သိရှိနိုင်ရန် တောင်ပိုင်းစစ်ဒေသ၊ အမှတ်(၂) စစ်ဒေသခွဲသို့ လူထုနွေဦးက ဆက်သွယ်မေးမြန်းထားသော်လည်း အဆက်အသွယ်မရသေးပေ။
တိုက်ပွဲဖြစ်ပွားခဲ့သော မျက်နီကွင်းကျေးရွာအပါအဝင် သရက်ကုန်း၊ ကံကလေး၊ နှောခင် စသည့်ကျေးရွာများသို့ စစ်ကောင်စီတပ်က ဒီဇင်ဘာ ၂၇ ရက်က လက်နက်ကြီးများ၊ ဒရုန်းများဖြင့် ဆက်တိုက်ပစ်ခတ်ခဲ့ရာ နေအိမ် အဆောက်အအုံများ ထိခိုက်ပျက်စီးခဲ့သည်ဟု အမှတ်(၂)စစ်ဒေသခွဲက ဖော်ပြသည်။
အလားတူ ပဲခူးတိုင်း၊ ညောင်လေးပင်းမြို့နယ်ရှိ ပုဇွန်မြောင်းကျေးရွာကို စစ်ကောင်စီတပ်နှင့် ပျူစောထီးများက ဒီဇင်ဘာလ ၂၆ ရက်က ဝင်ရောက်မီးရှို့ဖျက်ဆီးခဲ့သည့်အပြင် ပြည်သူပိုင် တန်ဖိုးရှိပစ္စည်းများကို ယူဆောင်သွားကြောင်း ဒေသခံ စစ်ရေးသတင်းရင်း မြစ်များထံမှ စုံစမ်းသိရသည်။
“ဖြစ်စဥ်မှန်ပါတယ် ခင်ဗျ။ အဲဒီအခြေအနေတွေနဲ့ပတ်သက်လို့ ကျနော်တို့နဲ့ ထိတွေ့တိုက် ပွဲတွေလည်း ဖြစ်နေပါတယ်ဗျ”ဟု အမှတ်(၂) စစ်ဒေသခွဲ၊ ပြန်ကြားရေးဌာနမှ တာဝန်ရှိသူတစ်ဦးက လူထုနွေဦးသို့ ပြောသည်။
ပုဇွန်းမြောင်းကျေးရွာရှိ ပြည်သူပိုင်အိုးအိမ်များထိခိုက်ပျက်စီးမှုနှင့် ထိတွေ့တိုက်ပွဲအခြေအနေများကိုမူ အမှတ်(၂)စစ်ဒေသခွဲမှ တာဝန်ရှိသူက ပြန်လည်ဖြေကြားခြင်း မရှိသေးပေ။
အထက်ပါ ညောင်လေးပင်မြို့နယ်၊ ပုဇွန်မြောင်းကျေးရွာမှ ဒေသခံပြည်သူအများစုမှာ စစ်ကောင်စီတပ်များ ကျေးရွာအတွင်းမကြာ ခဏ ဝင်ရောက်တတ်သောကြောင့် ဘေးလွတ်ရာ ရှောင်တိမ်းနေကြရရသည်မှာ တစ်နှစ်ဝန်းကျင်ရှိပြီဖြစ်သည်။
