မေ ၇၊၂၀၂၅။ထားမြတ်/People’s Spring
ထိုင်း − မြန်မာနယ်စပ် ကရင်အမျိုးသားအစည်းအရုံး(KNU) ထားဝယ်ခရိုင် တပ်မဟာ(၄) နယ်မြေ ထီးခီးဒေသရှိ စစ်ကောင်စီတပ်စခန်း ထိုးစစ်ဆင်တိုက်ခိုက်ရာ ထိုင်းနိုင်ငံဘက်သို့ ထွက်ပြေးသည့် စစ်ကောင်စီတပ်သားနှင့် ရဲ ၅၀ကျော်ရှိကြောင်း KNU ထားဝယ်ခရိုင်အတွင်းရေးမှူး ပဒိုစောအယ်နားက ပြောသည်။
ဧပြီ ၁၉ရက်တွင် ထီးခီးစခန်းနှင့် မိုင်အနည်းငယ်သာဝေးသော ထီးထဗျူဟာစခန်းကို တော်လှန်ရေးပူးပေါင်းတပ်က တိုက်ခိုက်သိမ်းပိုက်ပြီးနောက် ထီးခီးဒေသကို ဆက်လက်ထိုးစစ်ဆင်လျက်ရှိရာ ယနေ့(မေ ၇ရက်)အထိ တိုက်ပွဲများဆက်ရှိနေကြောင်း ကရင်သတင်းရင်းမြစ်အချို့က ပြောသည်။
မေလဆန်းတိုက်ပွဲအတွင်း စစ်ကောင်စီတပ်သားနှင့် ရဲများသည် ထိုင်းနိုင်ငံဘက် ထွက်ပြေးသွားကြောင်း သတင်းများထွက်ပေါ်လျက်ရှိရာ ယင်းနှင့်ပတ်သက်၍ ပဒိုစောအယ်နားက အတည်ပြုပြီး ၅၀ ဦးကျော်ရှိကြောင်း ပြောသည်။
Public Service Announcement
တိုက်ပွဲသတင်း အခြေအနေများကို ဆက်လက်မေးမြန်းနေဆဲဖြစ်သည်။
ကရင်အမျိုးသားလွတ်မြောက်ရေးတပ်မတော်(KNLA) နှင့် နီးစပ်မှုရှိသည့် ကရင်သတင်းရင်းမြစ်ကမူ ထိုင်းဘက် ထွက်ပြေးသည့် စစ်ကောင်စီတပ်သား ၆၀ ကျော်ရှိပြီဟု ယနေ့(မေလ ၇ရက်) ညပိုင်း၌ ပြောသည်။
“ပြောတာကတော့ ထွက်ပြေးတော့ ထွက်ပြေးနေတယ်။ ဒါပေမဲ့ ရန်သူကတော့ သူ့စခန်းထဲမှာတော့ ၈၀ လောက်ကျန်သေးတယ်”ဟု ကရင်သတင်းရင်းမြစ်က ပြောသည်။
KNUနှင့် တော်လှန်ရေးပူးပေါင်းတပ်သည် တပ်မဟာ(၄)၊ တပ်မဟာ(၇)နယ်မြေများအတွင်းရှိ မြန်မာ-ထိုင်းနယ်စပ်စခန်းများကို တိုက်ခိုက်သိမ်းပိုက်မှုများဆက်တိုက်ပြုလုပ်နေခြင်းဖြစ်သည်။
