မေ ၂၁၊၂၀၂၅။ဇော်ရမ်း၊သတိုး/People’s Spring
ပဲခူးတိုင်း၊ နတ်တလင်းမြို့နယ်၊ ကွင်းကျယ်ကျေးရွာရှိ စစ်ကောင်စီတပ်စခန်းအား သုံးရက်ဆက်တိုက်ခိုက်ပြီးနောက် ဖျက်ဆီးရှင်းလင်းနိုင်ခဲ့ပြီး တိုက်ပွဲအတွင်း စစ်ကောင်စီတပ်ဖွဲ့ဝင် ရှစ်ဦးသေဆုံးကြောင်း သာယာဝတီခရိုင် အမှတ်(၁)တပ်ရင်းက ယနေ့(မေလ ၂၁ရက်) သတင်းထုတ်ပြန်သည်။
ကွင်းကျယ်ကျေးရွာနှင့် စစ်ကောင်စီ၏ အထိုင်စခန်းကုန်းအား မေလ ၁၈ရက်မှ မေလ ၂၀ရက်အထိ တိုက်ခိုက်ခဲ့ခြင်းဟု ဆိုသည်။
” လက်နက်ကြီးသံတွေက မြို့ပေါ်ကလည်း ကြားရတယ်။ ဂျက်ဖိုက်တာတွေလည်းလာတယ်။ တိုက်ပွဲဖြစ်နေတဲ့နေရာရဲ့ အသေးစိတ်အခြေအနေကိုတော့ ကျနော်တို့မသိရဘူး။ နောက်ပြီး ကာကွယ်ရေးတပ်ဖွဲ့တွေကလည်း စစ်ရေးသတင်းတွေ ထိန်းချုပ်ထားတယ်ဗျ”ဟု နတ်တလင်းဒေသခံတစ်ဦးကပြောသည်။
Public Service Announcement
သာယာဝတီခရိုင်အမှတ်(၁)တပ်ရင်းက သတင်းထုတ်ပြန်ရာတွင် ကွင်းကျယ်ကျေးရွာမှ စစ်ကောင်စီစခန်း တိုက်ခိုက်သည့်တိုက်ပွဲအတွင်း စစ်ကောင်စီက စစ်ကူအများပြား ပို့ဆောင်ခဲ့ကြောင်း၊ အဆိုပါ စစ်ကူလမ်းကြောင်းများကို မိုင်းကွင်းများဖော်၍ ကြားဖြတ်တိုက်ခိုက်ခဲ့ကြောင်း ဖော်ပြထားသည်။
ပြည်သူ့ကာကွယ်ရေးတပ်မတော် အမှတ်(၂)စစ်ဆင်ရေးနယ်မြေ၊ဗျူဟာ (၂၂)၊ သာယာဝတီခရိုင်အမှတ်(၁)တပ်ရင်း(P23801)နှင့် နတ်တလင်းမြို့နယ်ပြည်သူ့ ကာကွယ်ရေးအဖွဲ့(နတ်တလင်း ပ.က.ဖ) ၊တပ်ရင်း-၃၈၀၁ ဒရုန်းတပ်ဖွဲ့(Bago Wings UAV Force)ပူးပေါင်းတပ်များက တိုက်ခိုက်ခဲ့ခြင်းဟုအသိပေးထားသည်။
စခန်းကုန်းအား မီးရှို့ဖျက်ဆီးခဲ့ပြီး တိုက်ပွဲအတွင်း သေဆုံးသည့် ပုတ်ပွနေသည့် စစ်ကောင်စီတပ်ရုပ်လောင်း ရှစ်လောင်းကို တွေ့ရသည်ဟု ထုတ်ပြန်ထားသည်။
“၃ ရက်တာ တိုက်ခိုက်မှုအတွင်း စစ်ကာင်စီတပ်သား(၈)ဦးသေဆုံးကာ မိမိတို့ ရဲဘော် (၁)ဦး ထိခိုက်ဒဏ်ရာ(မစိုးရိမ်ရ) ရရှိခဲ့ပါသည်။စစ်ကောင်စီတပ်သားအလောင်းများအား ၎င်းတို့ ဘန်ကာများအတွင်း ပုပ်ဆော်များနံကာတွေ့ရပြီး စခန်းကုန်းအား မီးရှို့ဖျက်ဆီးခဲ့ပါသည်”ဟု ထုတ်ပြန်ထားသည်။
ပဲခူးတိုင်းအတွင်း၌ လက်ရှိတွင် မင်းလှ၊ ပန်းတောင်း၊ ဥသျှစ်ပင်နှင့် ကြို့ပင်ကောက်မြို့နယ်တို့တွင် စစ်ရေးတင်းမာနေပြီး ဒေသခံပြည်သူများအနေဖြင့် ဗုံးခိုကျင်းများ အခိုင်အမာ တူးထားကြရန်၊ လေကြောင်းသတိပေးချက်များကို ဂရုပြုရန်၊ ရပ်သူ ရွာသားအချင်းချင်း ရိုင်းပင်းစောင့်ရှောက် ကူညီကြရန်၊ လုံခြုံရေးသတိပေးချက်များကို ပူးပေါင်း ဆောင်ရွက်ကြရန်၊ ကာကွယ်ရေးရဲဘော်များ၏ စစ်ရေးလှုပ်ရှားမှုသတင်းများကို လျှို့ဝှက်ထားကြရန် ပြည်သူ့ကာကွယ်ရေးတပ်ဖွဲ့များက သတိပေးထားသည်။
