မေ ၂၉၊၂၀၂၅။ထားမြတ်/People’s Spring
စစ်ကောင်စီက ကရင်အမျိုးသားအစည်းအရုံး(KNU) တပ်မဟာ(၆)နယ်မြေ၊ ဒူးပလာယာခရိုင်ရှိ ကျေးရွာ နှစ်ရွာကို လေကြောင်းမှ ဗုံးကြဲတိုက်ခိုက်ခဲ့ရာ ဒေသခံပြည်သူများ ထိခိုက်မှုရှိကြောင်း သတင်းရင်းမြစ်အချို့က ပြောသည်။
KNUအုပ်ချုပ်နယ်မြေ သတ်မှတ်ချက်အရ ဒူးပလာယာခရိုင် ကော့ကရိတ်မြို့နယ် အရှေ့ဒေါနဘက်ခြမ်းရှိ တာအူထာ နှင့် ကွေးလယ်စူကျေးရွာအား ယနေ့ (မေလ ၂၉ရက်) ည ၇နာရီခန့်တွင်လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်သည်။
မေလ ၂၃ရက်တွင် ဒူးပလာယာခရိုင် ကော့ကရိတ်မြို့နယ် မြန်မာ-ထိုင်းနယ်စပ်ရှိ စစ်ကောင်စီ၏ ဘလယ်ဒို တပ်စခန်း၊ မေလ ၂၈ရက်ညတွင် မြ၀တီမြို့တောင်ဘက် မြန်မာ-ထိုင်းနယ်စပ်ရှိ ကနဲလေး စခန်း တို့အား KNU ပူးပေါင်းတပ်က တိုက်ခိုက်သိမ်းပိုက်ပြီးနောက် စစ်ကောင်စီက ယနေ့ညတွင် အရပ်သားနေထိုင်ရာ ကျေးရွာကို လေကြောင်းမှ ဗုံးကြဲလာခြင်းဖြစ်သည်။
Public Service Announcement
” အချင်းချင်း(စစ်တပ်အချင်းချင်း)မနိုင်တော့ လူထုပဲ သွားချနေတာ။ သူတို့ အကျင့်လေ စကစက။ လေယာဉ်ကတော့ ၂စီးလာတယ် ဗုံးလာကြဲတယ်။ ပထမနေရာက ကွေးလွယ်စူ လို့ခေါ်တယ်။ ကျောင်းသား နှစ်ယောက်ထိခိုက်ဒဏ်ရာရတယ်။ တပြိုင်တည်း တာအူထာမှာ ပြန်လာကြဲလိုက်တယ်။ ဘယ်သူထိလဲမသိဘူး ရှာနေတုန်းပဲ”ဟု ကရင်သတင်းရင်းမြစ်တစ်ဦးက ပြောသည်။
တာအူထာရွာ လေကြောင်းတိုက်ခိုက်မှုအတွင်း အရပ်သားပြည်သူ လေးဦး ထိခိုက်ဒဏ်ရာများရခဲ့သည်ဟု ကရင်စစ်ရေးသတင်းရင်းမြစ်တစ်ဦးက ပြောသည်။
ဒူးပလာယာခရိုင် သတင်းပြန်ကြားရေးဌာန တာဝန်ရှိသူတစ်ဦးကလည်း တပ်မဟာ(၆)နယ်မြေကို စစ်ကောင်စီ လေကြောင်း တိုက်ခိုက်လာမှုကို အတည်ပြုသည်။
“လက်ရှိ အချက်အလက်တွေကို မြေပြင်မှ စိစစ်နေသေးတဲ့အချိန်မို့လို့ ပြန်လည်ဖြေကြားပေးသွားပါမယ်”ဟု ခရိုင်သတင်းပြန်ကြားရေးဌာန တာဝန်ရှိသူက ပြောသည်။
ထို့အပြင် မြဝတီမြို့စောင့်တပ် ခလရ(၂၇၅)တပ်ရင်းကလည်း သင်္ဃန်းညီနောင်အရပ်သို့ လက်နက်ကြီး နှစ်ချက်လှမ်းပစ်ခတ်ခဲ့သည်ဟု ဆိုသည်။
စစ်ကောင်စီသည် KNUနယ်မြေများအပါအဝင် နိုင်ငံတဝန်း စစ်ရေးရှုံးနိမ့်နေစဉ် လူထုကို ပစ်မှတ်ထားသည့် လေကြောင်း ၊ လက်နက်ကြီး ပစ်ခတ်တိုက်ခိုက်မှုများ လုပ်ဆောင်လေ့ရှိသည်။
ယခုရက်ပိုင်းအတွင်း ဒူးပလာယာခရိုင် တပ်မဟာ(၆)နယ်မြေတွင် စစ်ကောင်စီ၏ ဘလယ်ဒိုတပ်စခန်းနှင့် ကနဲလေးတပ်စခန်း ရရှိထားကြောင်း ခရိုင်တာဝန်ရှိသူက ပြောသည်။ KNU ဗဟိုက စခန်းသိမ်းတိုက်ပွဲ သတင်းထုတ်ပြန်သည့်မှတ်တမ်းဓာတ်ပုံများအရ ဘလယ်ဒိုနှင့် ကနဲလေး စစ်ကောင်စီတပ်စခန်းများမှ လက်နက်ကြီး လက်နက်ငယ်မျိုးစုံ အလက် ၁၅၀ ခန့်ကို တော်လှန်ရေးပူးပေါင်းတပ်က သိမ်းပိုက်ရရှိထားသည်ကိုလည်းတွေ့ရသည်။
စခန်းသိမ်းအောင်ပွဲအပြင် တပ်မဟာ(၆)နယ်မြေ သေ့ဘောဘိုတပ်စခန်းသို့ စစ်ကူလာသည့် စစ်ကောင်စီတပ်ကိုလည်း KNU ဦးဆောင်သည့် ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ် သေဆုံးမှုများ ရှိခဲ့ပြီး စစ်သုံ့ပန်း ၁၅ဦးရရှိကာ လက်နက်များလည်း သိမ်းပိုက်နိုင်ခဲ့သည်။ စစ်ကောင်စီတပ်သားများစွာ ထိုင်းဘက်သို့ ထွက်ပြေးသွားပြီး စစ်ကူစစ်ကြောင်း တစ်ခုလုံးပျက်သွားသည်ဟု သတင်းရင်းမြစ်က ပြောသည်။
