ဗျူဟာ​မြောက်​ကန့်​ဒေါင့်ရဲစခန်းကို ဘယ်လိုသိမ်းခဲ့ကြလဲ

​နေ့သစ်/People’s Spring

ပုလဲ – ဂန့်ဂေါလမ်း​ပေါ်က မဟာဗျူဟာအရ အလွန်အရေးပါတဲ့ ပုလဲမြို့နယ်၊ ကန့်ဒေါင့်ရွာနယ်မြေရဲစခန်းကို ​တော်လှန်​ရေးတပ်​တွေက ၁၈ ရက်တိုင် မရပ်မနားအပြင်းအထန်ထိုးစစ်ဆင်ပြီး သိမ်းပိုက်ခဲ့တဲ့အ​ကြောင်း ဒီတစ်ပါတ်​ပြောပြပါမယ်။

ကန့်​ဒေါင့် နယ်​မြေရဲစခန်းဟာ သာမာန်ရဲစခန်းတစ်ခုထက် ပိုအ​ရေးကြီးပါတယ် ။ ပုလဲမြို့နယ်မှာ ပုလဲမြို့မ ရဲစခန်းပြီးရင် ကန့်​ဒေါင့်ရဲစခန်းက အကြီးဆုံးဖြစ်ပါတယ် ။ ဘန်ကာတွေ၊ မိုင်းကွင်းတွေ၊ ကတုပ်ကျင်းတွေနဲ့ ခံစစ်အထပ်ထပ်ပြင်ထားတဲ့ တပ်စခန်းတစ်ခုလည်း ဖြစ်ပါတယ်။

ဒါအပြင် ဒီစခန်းဟာ အာရှအ​ဝေး​ပြေးလမ်းမ​ပေါ်မှာတည်ရှိတာ​ကြောင့် ပုလဲ -ဂန့်ဂေါ လမ်းပိုင်းက​နေ အိန္ဒိယနိုင်ငံအထိ သွားလာနိုင်လို့ မဟာဗျူဟာအရ အလွန်အရေးပါတဲ့နေရာဖြစ်ပါတယ်။ဒါ့အပြင် ကန့်ဒေါင့်ကနေ အနောက်မြောက်ဖက် မိုင် ၃၀ကျော်အကွာမှာ စစ်ကောင်စီရဲ့ အမှတ်(၂၃) ကာကွယ်ရေးပစ္စည်းစက်ရုံ (ကပစ −၂၃) တည်ရှိပြီး အနောက်တောင်ဖက် ၃၅ မိုင်ခန့်မှအမှတ်(၂၄) ကာကွယ်ရေးပစ္စည်းစက်ရုံ(ကပစ −၂၄) တည်ရှိပါတယ်။

https://www.facebook.com/LuduNwayOo/videos/723664550034189

ကန့်​ဒေါင့်ရွာရဲ့အရှေ့ဘက်မှာရှိတဲ့ ရဲစခန်းကိုစစ်တပ်ကအင်အား ၁၀၀ ​လောက်နဲ့ အခိုင်အမာ တပ်စွဲထား​ပါတယ် ။ပုလဲမြို့နယ်ထဲက ပျူ​စောထီးရွာ​တွေထဲမှာအချက်အချကျလှတဲ့ စခန်းဖြစ်ပါတယ် ။ ဒါအပြင်ပုလဲမြို့နယ်က နာမည်ကြီး ပျူစောထီးရွာတွေဖြစ်တဲ့ အင်မထီး၊ဇီးဖြူကုန်းရွာ တွေနဲ့ တြိဂံပုံ တည်ရှိပြီး ဒီနယ် မြေကို တော်လှန်ရေး တပ်တွေ စိုးမိုးနိုင်ဖို့ အရေးပါတဲ့ စခန်းဖြစ်တယ်လို့ ​တော်လှန်​ရေးအဖွဲ​တွေက ​ပြောပါတယ် ။

ပြည်သူ့လွတ်မြောက်ရေးတပ်မတော်(PLA)က စစ်​ရေးဗျူဟာဆွဲပြီး ဦး​ဆောင်ပြီး​တော့ မဟာမိတ်အဖွဲ့တွေက ဇွန် ၂ ရက်​နေ့မှာ ကန့်​ဒေါင့်နယ်​မြေရဲစခန်းကို စတင်တိုက်ခိုက်ခဲ့ပါတယ် ။

PLA နဲ့အတူမြန်မာနိုင်ငံလုံးဆိုင်ရာကျောင်းသားများဒီမိုကရက်တစ်တပ်ဦး (ABSDF)၊ ယင်းမာပင်ခရိုင်အမှတ်(၁၁)တပ်ရင်း(ကျားသစ်နက်တပ်မ

တော်)၊ ဗမာလွတ်မြောက်ရေးဒီမိုကရက်တစ်တပ်ဦး (BLDF)၊ ဒေါင်းနက် နယ်စည်းမခြား ပြောက်ကျားတပ်ဖွဲ့နဲ့ အညာမြေတပ်ပေါင်းစုတို့က ပူး​ပေါင်းတိုက်ခိုက်ခဲ့တယ်လို့ PLA ကထုတ်ပြန်ပါတယ် ။

“ဒီစခန်းဟာ ရဲစခန်းလို့သာ ပြောတာ။စစ်တပ်အခိုင်အမာစခန်းအဖြစ် ပြောင်းလဲပြီး တော့ ရန်သူက မိုင်းအတွင်းအထပ်ထပ်နဲ့ ကတုပ်ကျင်းတွေ အခိုင်အမာ၊မြေအောက်ခန်း တွေနဲ့ အသေအချာ တည်ဆောက်ထားတဲ့ စခန်းတခုကို တိုက်ခိုက်ရတာ။အဲဒီစခန်းကလည်း ဒါတတိယအကြိမ် မြောက်တိုက်တာပေါ့။PLAက တော့ပထမအကြိမ်ပေါ့။အရင်ကလည်း တခြားအဖွဲ့ တွေ ၂ကြိမ်တိုက်ထားတယ်။မရခဲ့ဘူး။ဒါ ကျွန်မတို့ အောင်မြင်စွာတိုက်နိုင်ခဲ့တာ ကြောင့် အရမ်းဂုဏ်ယူဝမ်း မြောက်မိပါတယ်”လို့ PLA ရဲ့ပြောရေးဆိုခွင့်ရှိသူကPeople’s Spring ကို ပြောပါတယ်။

စခန်းသိမ်းတိုက်ပွဲအတွင်းမှာ နှစ်ညတိုင်မအိပ်ဘဲ အပြင်းအထန်တိုက်ခိုက်ခဲ့ကြတာပါ။ကန့်ဒေါင့်စခန်းသိမ်းတိုက်ပွဲဟာ ခက်ခဲပြင်းထန်မယ်လို့ တွက်ဆထား​ပေမယ့် ထင်ထားတာထက် ပိုမိုပြင်းထန်ခဲ့တယ်လို့လည်း သိရပါတယ်။

“ရန်သူကထင်ထားတာထက်ကို ပိုပြင်းထန်တဲ့ တိုက်ခိုက်မှုတွေ လုပ်ခဲ့တယ်။ ကန့်ဒေါင့်ဟာ PLAအတွက် သမိုင်းဝင်အောင်ပွဲပဲ”လို့ PLAရဲ့ ပြောရေးဆိုခွင့်ရှိသူက မှတ်ချက်ပြုပါတယ်။

ဇွန်လ ၂ ရက်မှစတင်ခဲ့တဲ့ကန့်ဒေါင့်စခန်းသိမ်းတိုက်ပွဲမှာအမျိုးသမီးရဲဘော်တွေလည်း ပါဝင်တိုက်ခိုက်ခဲ့တယ်လို့ PLAရဲ့ပြောရေးဆိုခွင့်ရှိသူက ပြောပါတယ်။

အနောက်မြောက်တိုင်းစစ်ဌာနချုပ် (နမခ)က ကန့်ဒေါင့်ရဲစခန်း မကျရေးအတွက် လေကြောင်းပစ်ကူ တရပ်စပ်သုံးခုခံခဲ့​ပေမယ့် မဟာမိတ်တွေနဲ့အတူ ပြည်သူ့လွတ်မြောက်ရေးတပ်မတော်က အမျိုးသမီးရဲဘော်တွေလည်း ရွပ်ရွပ်ချွံချွံ ပါဝင်ကာ တိုက်ပွဲဝင်ခဲ့တယ်လို့ အသိပေးထားပါတယ်။

” အမျိုးသမီးရဲဘော်တွေက စစ်ကူစစ်ကြောင်းတွေ ဖြတ်တောက်ရေးမှာပါတယ်။ အစောပိုင်းက သိရသလောက်တော့ ၁၀ယောက်ကျော်ပါတယ်။

“လို့ PLAရဲ့ပြောရေးဆိုခွင့်ရှိသူက ပြောပါတယ်။

ဒီစခန်းဟာစစ်​ကောင်စီအတွက်လည်းအ​ရေးပါတာ​ကြောင့်စစ်တပ်က ဂျက်ဖိုက်တာ​တွေ၊ Y12 ဗုံးကြဲလေယာဉ်​တွေ ၊ Mi35 တိုက်ခိုက်ရေးရဟတ်ယာဉ် နဲ့ ပါရာ​မော်တာ​ခေါ် စက်တပ်လေထီး​တွေပါသုံးပြီး ဗုံး​တွေ ဆက်တိုက်ကြဲပြီးခုခံခဲ့ပါတယ် ။ဇွန် ၂ ရက်​နေ့က​နေ ဇွန်လ ၁၉ ရက်နေ့အထိ လေကြောင်းတိုက်ခိုက်မှု အကြိမ်​ပေါင်း (၂၀၀)ကျော် ပြုလုပ်ခဲ့ပြီး​တော့ဗုံးသီးအလုံးရေ (၅၀၀) ကျော်ကြဲချခဲ့ပါတယ်။

ဒါအပြင် စစ်တပ်က မြေပြင်စစ်ကူစစ်ကြောင်း​တွေ ၊ လက်နက်ခဲယမ်းနဲ့ရိက္ခာ​တွေကိုလည်းဆက်တိုက်​စေလွှတ်​ပေးပို့ခဲ့တာပါ။ ကန့်ဒေါင့်ရွာနဲ့ ၃ မိုင်ခွဲခန့်ကွာဝေးသော စစ်ကောင်စီလက်​​အောက်ခံပြည်သူ့စစ် ​ခေါ် ပျူစောထီး ​တွေ အခြေစိုက်တဲ့ အင်မထီးရွာကို Mi17 ရဟတ်ယာဉ်​တွေနဲ့ အကြိမ်ကြိမ် စစ်ကူ​တွေပို့ခဲ့ပါတယ် ။

အင်မထီးရွာက ထွက်လာတဲ့ ပျူစောထီး နဲ့ စစ်သားပူး​ပေါင်းစစ်ကြောင်း​တွေကို PLA နဲ့ မဟာမိတ်တပ်ပေါင်းတပ်​တွေက ကြားဖြတ်ပိတ်ဆို့ပြီးစစ်ကြောင်းပျက်တယ်အထိ တိုက်ခိုက်နိုင်ခဲ့ကြပါတယ် ။ဒါ​ကြောင့် ​နောက်ဆုံးမှာ ကန့်ဒေါင့် ရွာကို စစ်ကူ​တွေမရောက်​တော့ပါဘူး။ဒါ​ကြောင့် ကန့်ဒေါင့်စခန်းရှိတဲ့စစ်သား​တွေ၊ပျူ​တွေဟာပိတ်မိပြီး စိတ်ဓာတ်ပိုင်းဆိုင်ရာ အလွန်အမင်း ပျက်ပြားနေခဲ့တယ်လို့ PLA က​သုံးသပ်ပါတယ် ။

ဒီလိုနဲ့ ကန့်​ဒေါင့်စခန်းကို PLA ဦး​​ဆောင်တဲ့ပူး​ပေါင်းတပ်​တွေက ဇွန်လ ၁၂ရက်မှာပဲ ဝိုင်းရံပိတ်ဆို့နိုင်ခဲ့တာပါ။

စစ်ကောင်စီကလည်း Y12 ​လေယာဥ်နဲ့ ကန့်ဒေါင့်ရဲစခန်းထဲကို ရိက္ခာထုတ်​တွေ၊ ခဲယမ်း​တွေချပေးပြီး အသက်ဆက်ဖို့ကြိုစားခဲ့ပါ​သေးတယ် ။ဒါ​ပေမယ့်ကန့်​ဒေါင့် ရွာအတွင်းကျနေတဲ့ ရိက္ခာထုပ်​တွေ၊ခဲယမ်းထုပ်ျတွကို စခန်းထဲကစစ်သား​တွေ ထွက် ယူချိန်မှာ ​တော်လှန်​ရေးတပ်ဖွဲ့​တွေက ပစ်ခတ်ဟန့်တားတဲ့အတွက် ​နောက်ဆုံးမှာ စစ်တပ်ဟာ ရိက္ခာထုပ်​တွေ ၊ခဲယမ်းထုပ်​တွေ ထွက်မယူနိုင်​တော့တဲ့အ​ခြေအ​နေဆိုက်ခဲ့ပါတယ် ။

ကန့်​ဒေါင့်စခန်းကို ဝိုင်းပတ်ပိတ်ဆို့မှုမလုပ်ရ​သေးခင် ၂ ရက်အလိုမှာ ထူးခြားတာကတိုက်ပွဲအတွင်း လေကြောင်းပစ်ကူလာပေးတဲ့ စစ်ကောင်စီရဲ့ F7 (Chengdu J-7) အမျိုးအစား တိုက်လေယာဉ်တစ်စီးကိုပစ်ချနိုင်ခဲ့တယ်လို့ပြည်သူ့လွတ်မြောက်ရေးတပ်မတော် – PLA ကဆိုပါတယ်။ဇွန် ၁၀ ရက်​နေ့က တရုတ်နိုင်ငံထုတ် F7 တိုက်​လေယာဥ် ​မြေခသွားတာက စစ်တပ်အတွက် စိတ်ဓါတ်ကျ​စေခဲ့သလို ​တော်လှန်​ရေးတပ်​တွေအတွက် စိတ်အားတက်ကြွစရာဖြစ်ခဲ့ပါတယ် ။

ဇွန်လ ၁၀ ရက်​နေ့မှာ​ ကန့်​ဒေါင့် ရဲစခန်းသိမ်းတိုက်ပွဲအပြင် NUG လက်​အောက်ခံ PDF ခရိုင်တပ်ရင်း​တွေ၊ ပကဖ နဲ့ ပူး​ပေါင်းတပ်​တွေဟာ ဇီးဖြူကုန်းရွာက ပျူ​စောထီးစခန်းကို စတင်ထိုးစစ်ဆင်တိုက်ခိုက်ခဲ့ပါတယ်။

F 7 တိုက်​လေယာဥ်ဟာမင်းတိုင်ပင်ရွာရဲ့ အရှေ့ မြောက်ဘက်က စပါးစေ့ရွာကို ကျခဲ့ပြီး​လေယာဥ်​​မောင်းသူအပြင် ​လေယာဥ်ပျက်ကျစဥ်​ဒေသခံ ပြည်သူ ၄ဦး ပါ သေဆုံးခဲ့ပါတယ်။ အ​စောပိုင်းမှာ PDF နဲ့ ပကဖ ​တွေကလည်း ဇီးဖြူကုန်းရွာကို ဗုံးလာကြဲတဲ့ စစ်တပ်တိုက်​လေယာဥ်ကိုသူတို့လည်းပစ်ချခဲ့တယ်လို့ထုတ်ပြန်ပါတယ် ။​နောက်ပိုင်းမှာ​တော့ တိုက်​လေယာဥ်ဟာ ရာသီဥတုဆိုးဝါပြီး ဇီးဖြူကုန်းရွာကိုဗုံးကြဲပြီးလှည့်အပြန်မှာ ပျက်ကျတာလို့ထုတ်ပြန်ပါတယ် ။စစ်​ကောင်စီက​တော့ တိုက်​လေယာဥ်ဟာ​လေ့ကျင့်ပျံသန်းရင်းစက်ချို့ယွင်းလို့ ပျက်ကျတယ်လို့ ဆိုပါတယ် ။

PLA က စခန်းသိမ်းတိုက်ပွဲသတင်းကို ဇွန် ၂၀ ရက်​နေ့မှာထုတ်ပြန်ခဲ့ပြီး တိုက်​လေယာဥ်ကို သူတို့ပစ်ချခဲ့တယ်လို့ အခိုင်အမာဆိုပါတယ် ​။

စစ်တပ်က ​လေ​ကြောင်းက​နေ ဗုံးရာချီကြဲပြီးအပြင်းအထန် ခုခံ​ပေမယ့် PLA နဲ့ မဟာမိတ်တပ်ပေါင်းစုတွေရဲ့ မလျှော့တဲ့ ဇွဲလုံလ ဝီရိယတွေနဲ့ ရွပ်ရွပ်ချွံချွံ ထိုးစစ်ဆင်တိုက်ခိုက်မှုတွေကြောင့် ဇွန်လ ၁၉ ရက် နံနက် ၆ နာရီ ၄၀မိနစ်အချိန်မှာ အောင်မြင်စွာ သိမ်းပိုက်နိုင်ခဲ့တယ်လို့ PLAက ထုတ်ပြန်ပါတယ်။

စတင်ထိုးစစ်ဆင်တဲ့​နေ့က​နေ အပြီးသတ်သိမ်းနိုင်တဲ့​နေ့အထိ ၁၈ ရက်ကြာခဲ့ပါတယ်။ စခန်းသိမ်းနိုင်တဲ့​နေ့ဟာ စစ်တပ်က မတရားဖမ်းဆီးထားတဲ့ နိုင်ငံ​တော်အတိုင်ပင်ခံပုဂ္ဂိုလ် ​ဒေါ်​အောင်ဆန်းစုကြည်ရဲ့ ၈၀ နှစ်ပြည့် ​မွေး​နေ့နဲ့ တိုက်ဆိုင်​နေတာ​ကြောင့် ​လူထု​ခေါင်း​​​ဆောင်အတွက်​မွေး​နေ့လက်​​ဆောင်လို့ ကျားသစ်နက်စစ်​ကြောင်းက PDF အချို့က​ပြောပါတယ် ။

PLA ရဲ့​ပြော​ရေးဆိုခွင့်ရှိသူက “ဒီစခန်းက တိုက်ရမယ့်စခန်းမို့ တိုက်ခဲ့တာပါ။ အမေစုမွေးနေ့နဲ့လည်းတိုက်ဆိုင်နေတော့ ပြည်သူတွေကလည်း ရည်ရွယ်ထားတော့ လိုလားနေတော့ မွေးနေ့လက်ဆောင်အဖြစ်သတ်မှတ်လည်းရပါတယ်ပေါ့။ အဲလို သတ်မှတ်လည်းရပါတယ်။ အဓိကတိုက်တာတော့ ပြည်သူတွေလွတ်မြောက်ဖို့အတွက်ပါ”လို့​ပြောပါတယ် ။

စခန်းသိမ်းတိုက်ပွဲအတွင်း စစ်ကောင်စီဘက်က ၄၀ထက်မနည်းသေဆုံးပြီး စခန်းအတွင်းသေဆုံးခဲ့တဲ့ ရုပ်အလောင်း ၂၀ကျော် ရထားတယ်လို့သိရပါတယ်။ စစ်တပ်ထံကသိမ်းဆည်းရရှိတဲ့အထဲမှာ ဒရုန်း​တွေများစွာပါခဲ့သလို တချို့ဒရုန်း​တွေက အသစ်​တွေဖြစ်​နေတာကို​တွေ့ရပါတယ် ။

“စစ်ကူလာတာလည်း တပ်တွေလှန်ကျတယ်ဆိုတော့ သေတာများတယ်။ ခန့်မှန်း​ခြေတော့ ၄၀ကျော်လောက်ရှိမယ်”လို့ သူကဆက်ပြောပါတယ်။

ဒါပေမယ့် သိမ်းဆည်းရတဲ့ လက်နက်ခဲယမ်းစာရင်းနဲ့ ဖမ်းမိတဲ့ စစ်သုံ့ပန်းစာရင်းကိုတော့ အတိအကျမသိရသေးဘူးလို့ ဆိုပါတယ်။စခန်းသိမ်းတိုက်ပွဲအတွင်းမှာ ​တော်လှန်​ရေးတပ်ဖွဲ့ဝင်​တွေ ထိခိုက်ကျဆုံးမှု​တွေလည်းရှိပါတယ် ။ ABSDF က ရဲ​ဘော် ၃ ဦးကျဆုံးခဲ့သလို့ ၊ကျားသစ်နက်စစ်​ကြောင်းက ရဲ​ဘော် ၁ ဦးကျဆုံးခဲ့တယ် လို့ သက်ဆိုင်ရာတပ်ဖွဲ့​တွေက ထုတ်ပြန်ထားပါတယ် ။

စစ်တပ်ကစခန်းကျသွားပြီးတဲ့​နောက်မှာ ဇွန် ၁၉ ရက်​နေ့ကဆိုရင် တနေကုန် ​လေ​ကြောင်းက​နေ ဗုံးလာကြဲခဲ့ပါတယ်။

ဒီရဲစခန်းကို ​တော်လှန်​ရေးတပ်​တွေကသိမ်းပိုက်လိုက်တာ​ကြောင့် အင်းမထီးနဲ့ ဇီးဖြူကုန်း ပျူစောထီးရွာနှစ်ရွာကို စစ်တပ်ရဲ့ ကုန်းလမ်း ထောက်ပို့လမ်း ကြောင်းဖြတ် တောက်နိုင်​တော့မှာဖြစ်ပါတယ်။ဒါ့အပြင် ပုလဲမြို့နယ် အနောက်ခြမ်းကို တော်လှန်ရေး တပ်တွေ အပြည့်အဝစိုးမိုးနိုင်သွားမှာဖြစ်ပြီး ပုလဲ-ဂန့် ဂေါလမ်းမကို အတိုင်းတာတခုအထိ ထိန်းချုပ်သွားနိုင်​တော့မယ့်လို့ ​ဒေသခံ​တော်လှန်​ရေးအဖွဲ့​တွေက​ပြောပါတယ်။

ဒီစခန်းဟာ မ​ကွေးတိုင်းကိုသွားရင်ပဲဖြစ်ဖြစ် ၊ချင်းပြည်နယ် ၊အဲက​နေ ရခိုင်ပြည်နယ်အထိသွားလို့ရသလို ၊ စစ်ကိုင်းတိုင်းရဲ့ အ​နောက်​မြောက်တိုင်းစစ်ဌာနချုပ် (နမခ)ရှိတဲ့ မုံရွာကိုလည်းသွားလို့ရတာ​ကြောင့် အလွန်အ​ရေးပါတယ်တည်​နေရာဖြစ်ပါတယ် ။

“ဒီနေရာက တကယ့်ဗျူဟာ ကျတဲ့နေရာဖြစ်တယ်” လို့ ​တော်လှန်​ရေးတပ်ဖွဲ့ဝင် တစ်ဦးက​ပြောပါတယ် ။

ကန့်​ဒေါင့်ရဲစခန်းကျသွားပြီး​နောက်မှာ စစ်​တပ်က အင်မထီးပျူ​စောထီးရွာမှာ အင်အားတွေတိုးပြီးခံစစ်ပြင်ဆင်နေတယ်လို့လည်း PLAက ပြောပါတယ်။ ကန့်​ဒေါင့် ပြီးရင့် ​တော်လှန်​ရေးတပ်​တွေရဲ့ ထိုးစစ်ဟာ ဘယ်ဆိုတာ​တော့မသိရ​သေးပါဘူး။

“ကန့်ဒေါင့်ပြီးရင် ဘာဆက်လာမယ်ဆိုတာ မဆွဲရသေးဘူး။ ဒါပေမယ့် ပြည်သူတွေလွတ်မြောက်တဲ့အထိ PLAက တိုက်မှာဖြစ်တယ်”လို့ PLAကပြောပါတယ်။ ။