အမေရိကန်ရဲ့ စစ်လက်နက်တွေကို NATO စစ်မဟာမိတ် အဖွဲ့က ဝယ်ယူပြီး ယူကရိန်းဆီ ပံ့ပိုးစေဖို့ သဘောတူညီမှု တစ်ရပ် ရရှိထားကြောင်း သမ္မတ ဒေါ်နယ်လ်ထရမ့်က ပြောပါတယ်။
ဇူလိုင် ၁၀ ရက်နေ့တုန်းက NBC သတင်းဌာနနဲ့ အင်တာဗျူးမှာ ထရမ့်ပေးခဲ့တဲ့ မှတ်ချက်အရ အမေရိကန်ဟာ ယူကရိန်းဆီ စစ်လက်နက်တွေက ဆက်လက် ထောက်ပံ့မှာ ဖြစ်ပေမယ့် အခမဲ့ မဟုတ်တော့ဘဲ NATOက အဲဒီအတွက် စရိတ်စက အကုန်ခံရမယ်လို့ သိရပါတယ်။
အဲဒီလက်နက်တွေကို အမေရိကန်က NATOဆီ ပေးပို့မှာဖြစ်ကြောင်း၊ အဲဒီစရိတ်ကို NATOက ၁၀၀ ရာခိုင်နှုန်း အပြည့်အဝ ပေးချေရမှာဖြစ်ကြောင်း ထရမ့်က ဆိုပါတယ်။
ဥပမာ Patriot ဒုံးခွင်းဒုံးလို စစ်လက်နက်တွေကို အမေရိကန်က NATOဆီ ရောင်းချပေးလိုက်မှာဖြစ်ပြီး ယူကရိန်းဆီ ခွဲဝေပို့ဆောင်ပေးလိုက်တာမျိုးကို NATOက စီမံဆုံးဖြတ် လုပ်ဆောင်ရမှာ ဖြစ်တယ်လို့ သူက ရှင်းပြပါတယ်။
Public Service Announcement
ထရမ့်ရဲ့ အင်တာဗျူးနဲ့ ပတ်သက်ပြီး NATOဖက်က တိတိကျက မှတ်ချက် မပေးသေးပေမယ့် အစောပိုင်းမှာတော့ NATO အတွင်းရေးမှူးချုပ် မတ်ခ်ရူတေးက သူဟာ ယူကရိန်းအတွက် ခဲယမ်းမီးကျောက်တွေနဲ့ လေကြောင်းကာကွယ်ရေး စနစ်တွေ ပိုမို ထောက်ပံ့ပေးနိုင်ရေး ဝိုင်းဝန်း အားထည့်ကြဖို့ အဖွဲ့ဝင် နိုင်ငံတွေကို တိုက်တွန်းထားကြောင်း လူမှုကွန်ရက် မီဒီယာ Xမှာ ရေးသားထားခဲ့ပါတယ်။
ထရမ့်ရဲ့ အင်တာဗျူး ထွက်ပေါ်မလာခင် နာရီပိုင်းလောက် အလိုမှာလည်း အမေရိကန် နိုင်ငံခြားရေး ဝန်ကြီး မာကို ရူဘီရိုက Patriot စနစ်တွေ ယူကရိန်းဆီ ပို့ဆောင်ရေး ကိစ္စနဲ့ ပတ်သက်လို့ ဥရောပ မိတ်ဖက် နိုင်ငံတွေနဲ့ ဆွေးနွေးနေတယ်လို့ ပြောကြားခဲ့ပါတယ်။
NBCနဲ့ အင်တာဗျူးမှာတော့ ထရမ့်က သူဟာ ဇူလိုင် ၁၄ ရက်နေ့ကျရင် ရုရှားနဲ့ ပတ်သက်လို့ အဓိကကျတဲ့ ကြေညာချက်တစ်ခုကို ထုတ်ပြန်မယ်လို့ ပြောပေမယ့် အသေးစိတ် အချက်အလက်တွေကိုတော့ ချန်လှပ်ထားခဲ့ပါတယ်။ သူက ရုရှားနဲ့ ပတ်သက်ပြီး စိတ်ပျက်နေတာတွေ ရှိတယ်လို့တော့ အင်တာဗျူးထဲမှာ ထည့်သွင်း မှတ်ချက်ပေးသွားခဲ့ပါတယ်။
ကိုးကား: CNN
