ဇူလိုင်-၁၃၊၂၀၂၅။ဇော်ရမ်း/People’s Spring
တိုက်ပွဲပြင်းထန်နေသည့် ဖားကန့်မြို့နယ်အတွင်း စစ်ကောင်စီက ယနေ့(ဇူလိုင် ၁၃ရက်) ညနေ ၅နာရီ ခွဲခန့်တွင် လေကြောင်းမှ ဗုံးကြဲတိုက်ခိုက်ခဲ့သည်။
အမှိုက်ပုံကျေးရွာနှင့် မှော်မောင်းကုန်းကို ဗုံးငါးလုံးထက်မနည်းကြဲခဲ့ခြင်းဟု ဒေသခံအချို့ကပြောသည်။
တိုက်ပွဲပြင်းထန်နေ၍ ကချင်လါတ်လပ်ရေးတပ်မတော်(KIA)၊ကချင်ဒေသကာကွယ်ရေးတပ် (KPDF) ပူးပေါင်းတပ်က လေကြောင်းအန္တရာယ်သတိပေးထားစဉ် စစ်ကောင်စီက ဗုံးကြဲခြင်းဖြစ်သည်။
Public Service Announcement
သို့သော် မြေပြင်အခြေအနေအသေးစိတ်ကို မသိရှိရသေးပေ။
ဖားကန့်တွင် ဇူလိုင် ၁၀ရက်ကစ၍ တိုက်ပွဲပြင်းထန်ခဲ့ပြီး ယမန်နေ့ (ဇူလိုင်၁၂ရက်)ညက တိုက်ပွဲအတွင်း အမျိုးသားနှစ်ဦး သေဆုံးခဲ့သည်။
တစ်ဦးသည် အရပ်သားဖြစ်ပြီး နောက်တစ်ဦးမှာ စစ်ကောင်စီနှင့်ပူးပေါင်းနေသည့် အမှိုက်ပုံကျေးရွာဥက္ကဌ မင်းစိုးဦးဖြစ်ကြောင်း ဒေသခံများကပြောသည်။
မင်းစ်ိုးဦးသည် စစ်ကောင်စီနှင့်အတူ ကားပေါ်တွင်လိုက်ပါလာစဉ် တိုက်ပွဲအတွင်းသေဆုံးသွားခြင်းဖြစ်ပြီး ၎င်း၏ရုပ်လောင်းအား စစ်ကောင်စီက ကားပေါ်မှ ကန်ချပြီး ထွက်ပြေးသွားခဲ့သည်ဟု ဒေသခံများက ပြောသည်။
အမှိုက်ပုံကျေးရွာ၌ ဇူလိုင် ၁၁ရက်က တိုက်ပွဲအတွင်း စစ်ကောင်စီတပ်ဖွဲ့ဝင် ၁၀ဦးထက်မနည်းသေဆုံးခဲ့သလို KIA၊KPDFက ပစ်ခတ်သည့်လက်နက်ကြီးကျည်သည် လက်နက်ခဲယမ်းများထားသည့်နေရာ ကျရောက်ပေါက်ကွဲပြီး အထိအခိုက်များပြားကြောင်း မြေပြင်စစ်ရေးသတင်းရင်းမြစ်အချို့ကပြောသည်။
သို့သော် အမှိုက်ပုံကျေးရွာအနီးတွင် တိုက်ပွဲဆက်ဖြစ်နေပြီး စစ်ကောင်စီတပ် အထိနာနေကာ လေယာဉ်ပစ်ကူခေါ်ခဲ့ပြီး ဂျက်ဖိုက်တာဖြင့် ဗုံးကြဲသွားခြင်းဟု သတင်းရရှိသည်။
ဖားကန့်မြို့နယ်တွင် စစ်ရေးဆက်လက် တင်းမာနိုင်၍ ဒေသခံပြည်သူများ လုံခြုံရေးသတိပြုကြရန် KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက သတိပေးထားသည်။
ထို့အပြင် လေကြောင်းအန္တရာယ်သတိပြုကြရန် KIA၊KPDFပူးပေါင်းတပ်က လူမှုကွန်ရက်မှတဆင့်သတိပေးနေသည်။
ဖားကန့်ဒေသသို့ စစ်ကောင်စီတပ်စစ်ကြောင်းဝင်ရောက်လာသည့် မေလကုန်၊ ဇွန်လဆန်းကစ၍ တိုက်ပွဲများ မကြာခဏဖြစ်ပွားခဲ့ပြီး ယခုရက်ပိုင်းတိုက်ပွဲများသည် ဖားကန့်မြို့ပေါ်အထိ ရောက်ရှိလာခြင်းဖြစ်သည်။
တိုက်ပွဲဖြစ်ပွားနေစဉ်အပြင် တိုက်ပွဲမဖြစ်သည့်အချိန်များတွင်လည်း စစ်ကောင်စီတပ်က လက်နက်ကြီးများပစ်ခတ်မှုများရှိခဲ့ပြီး အရပ်သားသေဆုံးသူဦးရေ ၃၀ဦးခန့်ရှိနေပြီ ဖြစ်သည်။
