ဇူလိုင်-၁၉၊ ၂၀၂၅။ မိထက်/People’s Spring
နေပြည်တော်တွင် ဆိုင်ကယ်ဖြင့် ပလုံကောက်သော မိသားစုအား ကားတစ်စီးက တိုက်မိရာ ကလေးတစ်ဦးအပါအဝင် နှစ်ဦးသေဆုံးပြီး တစ်ဦးဒဏ်ရာရသွားသည်။
ဇေယျာသီရိမြို့နယ်၊ ဗောဓိမြိုင်ကျေးရွာအရှေ့ ရန်ကုန်-မန္တလေးလမ်းဟောင်းတစ်နေရာ၌ ယနေ့ မွန်းလွဲပိုင်းတွင် ယင်းဖြစ်စဉ် ဖြစ်ပွားခဲ့သည်။
“ပလုံကောက်တဲ့ မိသားစု သုံးယောက်။ ကားက တိုက်ပြီး ထွက်ပြေးသွားတယ်ဗျ။ ဘယ်ကိုလိုက်လို့ လိုက်ရမှန်းလည်းမသိဘူး။ လိုက်မယ့်လူလည်းမရှိဘူး” ဟု ဒေသခံတစ်ဦးက ပြောသည်။
Public Service Announcement
အသက် ၇ နှစ်အရွယ်ကလေးတစ်ဦး၊ အမျိုးသားတစ်ဦးသေဆုံးပြီး အမျိုးသမီးတစ်ဦး ဒဏ်ရာအပြင်းအထန်ရရှိထားသည်။ မိသားစုလိုက် ပလုံကောက်ပြီး ဝမ်းစာရှာနေသူများဖြစ်ကြောင်း မျက်မြင်တွေ့သည့်ဒေသခံတစ်ဦးကပြောသည်။ ထိခိုက်သေဆုံးသည့်မိသားစုနှင့်ပတ်သက်၍ အသေးစိတ်မသိရသေးပေ။
” ငလျင်ဒဏ်က ခံရ။ ကုန်စျေးနှုန်းက ကြီး။ အလုပ်ကမရှိကြတော့ ဗူးတွေ ခွက်တွေလိုက်ကောက်တဲ့ ပလုံကောက်သူတွေ နေပြည်တော်မှာပိုများလာတယ်ဗျ” ဟု နေပြည်တော်၌ နေထိုင်သူတစ်ဦးကပြောသည်။
ရုပ်လောင်းနှစ်လောင်းနှင့် ဒဏ်ရာရသူအမျိုးသမီးကို နေပြည်တော်ကုတင် ၁၀၀၀ ဆေးရုံသို့ လူမှုရေးအဖွဲ့များက ပို့ဆောင်လိုက်ကြောင်း သတင်းရရှိသည်။
