သြဂုတ်-၁၀၊၂၀၂၅။ရဲခေါင်/Peoples Spring
ကရင်နီပြည်နယ်၊ ဒီးမော့ဆိုမြို့နယ်၌ စစ်ကောင်စီတပ်စစ်ကြောင်းထိုးလာ၍ တိုက်ပွဲများဖြစ်နေကြောင်း ကရင်နီအမျိုးသားများကာကွယ်ရေးတပ်(KNDF)က ယနေ့(ဩဂုတ်၁၀ရက်)ထုတ်ပြန်သည်။
ယခုတိုက်ပွဲသည် ကရင်နီတပ်ပေါင်းစု၏ ၂၀၂၃ နိုဝင်ဘာကစတင်သည့် ၁၁၁၁စစ်ဆင်ရေးနောက်ပိုင်း ပြန်လည်ထိတွေ့မှုဖြစ်ခြင်းဟု ဒီးမော့ဆိုမြို့နယ်စစ်ရေးသတင်းရင်းမြစ်က ဆိုသည်။
ထို့အပြင် လက်ရှိစစ်ရေးအခြေအနေအရ လွိုင်ကော် – ဒီးမော့ဆို -ဖရူဆို လမ်းမကြီးကို ယနေ့(သြဂုတ် ၁၀ ရက်)ကစ၍ သွားလာခြင်းမပြုရန်နှင့် ရက်အကန့်အသတ်မရှိ ပိတ်ထားမည်ဖြစ်ကြောင်းလည်း ဖော်ပြသည်။
Public Service Announcement
“လမ်းကြောင်းကို ပြန်ထိန်းချုပ်ဖို့ပြီးတော့ ပြတ်တောက်နေတဲ့ ထောက်ပို့လမ်းကြောင်းတွေ ပြန်ချိတ်ဆက်ဖို့ဖြစ်နိုင်တယ်”ဟု KNDFတာဝန်ရှိသူက စစ်ကောင်စီတပ် စစ်ကြောင်းထိုးလာမှုအခြေအနေအပေါ် ရှင်းပြသည်။
ဩဂုတ် ၈ ရက်ကစ၍ ဒီးမော့ဆိုမြို့အတွင်းသို့ စစ်ကောင်စီတပ်မှ စစ်ကြောင်းထိုးလှုပ်ရှားမှုများ စတင်ခဲ့ပြီးနောက် တော်လှန်ရေးတပ်များနှင့် ထိတွေ့တိုက်ပွဲများ ဖြစ်ပွားနေကာ ဖရူဆိုမြို့နယ်အခြေစိုက် စစ်ကောင်စီတပ်ကလည်း ဒီးမော့ဆို-ဖရူဆိုလမ်းတစ်လျှောက်သို့ လက်နက်ကြီးများဖြင့် ပစ်ခတ်နေကြောင်း အသိပေးသည်။
“အခုက တပ်ထဲကနေထွက်လာပြီး နယ်မြေပြန်ချဲ့ချင်လာတဲ့သဘောမျိုးလည်း ဖြစ်တယ်။အခုက စစ်ကြောင်းထိုးလာနေတဲ့ အဖွဲ့နဲ့ပြန်ခုခံတဲ့ တိုက်ပွဲမျိုး”ဟု ၎င်းက ပြောသည်။
ဒီးမော့ဆိုမြို့နယ်တွင် စစ်ကောင်စီ၏ မြို့စောင့်တပ်ရင်းနှစ်ခုဖြစ်သော ခလရ(၁၀၂)နှင့် ခမရ (၄၂၇)တပ်ရင်းမှအပ မြို့နယ်၏ ဧရိယာအများစုကို ကရင်နီတပ်ပေါင်းစုက ထိန်းချုပ်ထားခြင်းဖြစ်သည်။
“သူတို့ရည်ရွယ်ချက်ကတော့ ပြည်ထောင်စုလမ်းမကြီးကို ပြန်ထိန်းချုပ်ထားနိုင်ဖို့ပဲဖြစ်လိမ့်မယ် ။ လောလောဆယ်တော့ ဒီးမော့ဆိုနဲ့ ဖရူဆို လမ်းမကြီးက ပိတ်ထားတာကြာပြီဆိုတော့ သူတို့ လမ်းကြောင်းပြန်ထိုးဖောက်ချင်တာမျိုး”ဟု ကရင်နီစစ်ရေးသတင်းရင်းမြစ်က ပြောသည်။
ခလရ(၁၀၂)နှင့် ခမရ(၄၂၇)တပ်ရင်း ပူးပေါင်းစစ်ကြောင်းသည် မြို့တွင်းသို့ စစ်ကြောင်းထိုးလာစဥ် စစ်ရှောင်ပြည်သူများပါသည် ကားတစ်စီးကို ဖမ်းဆီးထားပြီး ပစ်သတ်ခံရသည့် ပြည်သူအချို့ပါရှိနေသည်။
