ဂါဇာက ရိက္ခာဝေတဲ့ နေရာတွေနားမှာ ၃ လနီးပါးအတွင်း ပါလက်စတိုင်း ၁၇၆၀ ထက်မနည်း သေဆုံး

မေလနှောင်းပိုင်းကစလို့ ၃ လနီးပါး ကာလအတွင်း ဂါဇာကမ်းမြှောင် ဒေသမှာ ရိက္ခာဝေငှတာကို စောင့်ဆိုင်းနေသူ ၁၇၆၀ ထက်မနည်း သေဆုံးခဲ့တယ်လို့ ကုလသမဂ္ဂက ထုတ်ပြန်ခဲ့ပါတယ်။

ဩဂုတ် လဆန်းတုန်းကလည်း အလားတူ အခြေအနေကြောင့် အသေအပျောက် စာရင်းကို ထုတ်ပြန်ခဲ့ဖူးရာမှာ နှစ်ပတ်အတွင်း ရာဂဏန်းလောက် ထပ်တိုးလာတာကိုလည်း တွေ့ခဲ့ရပါတယ်။

မေလ ၂၇ ရက်နေ့ကစလို့ ဂါဇာမှာ ရိက္ခာဝေငှတာကို စောင့်ဆိုင်းနေတုန်း အကြောင်းအမျိုးမျိုးကြောင့် ပါလက်စတိုင်း ၁၇၆၀ ထက်မနည်း သေဆုံးခဲ့ကြောင်း၊ အဲဒီထဲက ၉၉၄ ဦးဟာ ဂါဇာ လူသားချင်း စာနာမှု ဖောင်ဒေးရှင်း (GHF)ရဲ့ ပရောဂျက် နယ်မြေတွေမှာ သေဆုံးခဲ့တာ ဖြစ်ပြီး ၇၆၆ ဦးကတော့ ရိက္ခာတင်တဲ့ ထရပ်ကားတွေ ဖြတ်သန်းရာ လမ်းကြောင်းတွေမှာ အသက်ဆုံးရှုံးခဲ့ကြောင်း ကုလသမဂ္ဂက ဆိုပါတယ်။

ကုလသမဂ္ဂ ကြေညာချက်မှာတော့ အဲဒီ သေဆုံးမှု အများစုရဲ့ အဓိက အကြောင်းရင်းဟာ အစ္စရေးတပ်တွေ တိုက်ခိုက်မှုကြောင့်လို့ ရှင်းရှင်းလင်းလင်း ဖော်ပြထားပါတယ်။ ပြီးတော့ လေထီးနဲ့ချပေးတဲ့ ရိက္ခာထုပ်တွေ ပိမိလို့ သေဆုံးတာလိုမျိုး တခြား အခြေအနေတွေလည်း ရှိခဲ့ပါတယ်။

Public Service Announcement

GHF ဆိုတာကတော့ ကုလသမဂ္ဂ လက်အောက်ခံ အေဂျင်စီတွေနဲ့ မပူးပေါင်းဘဲ အမေရိကန်နဲ့ အစ္စရေးတို့ သီးသန့် အကောင်အထည် ဖော်နေတဲ့ ရိက္ခာဝေငှရေး အစီအမံ ဖြစ်ပါတယ်။ အဲဒီ GHF လုပ်ငန်းလည်ပတ်ရာ နေရာတွေဟာ ရိက္ခာလာရောက်စောင့်ဆိုင်း ထုတ်ယူသူတွေကို အစ္စရေးစစ်တပ်က မကြာခဏ ပစ်မှတ်ထား တိုက်ခိုက်ရာ သတ်ကွင်းတွေ ဖြစ်လာနေကြောင်း စွပ်စွဲမှုတွေလည်း မြင့်တက်နေပါတယ်။

ဩဂုတ် ၁ ရက်နေ့က ကုလသမဂ္ဂရဲ့ ထုတ်ပြန်ချက်မှာတော့ ရိက္ခာဝေငှရာ နေရာတွေမှာ သေဆုံးတဲ့ ပါလက်စတိုင်း အရေအတွက်ကို ၁၃၇၃ ဦးလို့ ဖော်ပြခဲ့ဖူးပါတယ်။

ဩဂုတ် ၁၅ ရက်နေ့မှာတင် အစ္စရေးရဲ့ ပစ်ခတ်မှုကြောင့် လူ ၃၁ ဦးထက်မနည်း သေဆုံးပြီး အဲဒီထဲက ၁၂ ဦးဟာ ရိက္ခာဝေတာကို တန်းစီစောင့်နေသူတွေ ဖြစ်တယ်လို့ ဂါဇာ ပြည်သူ့ကာကွယ်ရေး အေဂျင်စီက ထုတ်ပြန်ခဲ့ပါတယ်။

အစ္စရေးကတော့ သူတို့ရဲ့ စစ်တပ်တွေဟာ ဂါဇာမှာရှိတဲ့ ဟားမားစ် အကြမ်းဖက်ဆဲလ်တွေကို ဖြိုခွင်းဖို့ အတွက်ပဲ အဓိက ရည်ရွယ် လုပ်ဆောင်နေပြီး အရပ်သား ထိခိုက်သေဆုံးမှုကို အနည်းဆုံးဖြစ်အောင် ထိန်းသိမ်း ကိုင်တွယ်နေကြောင်း တုံ့ပြန်ထားပါတယ်။

တစ်ချိန်တည်းမှာပဲ အစ္စရေး စစ်တပ်ဟာ ဂါဇာစီးတီး အပါအဝင် ဂါဇာမြောက်ပိုင်း နယ်မြေတွေကို အပြည့်အဝ ထိန်းချုပ် သိမ်းယူဖို့ ပြင်ဆင်နေပြီး အကျိုးဆက် အနေနဲ့ ပါလက်စတိုင်း ပြည်သူတွေရဲ့ ဆင်းရဲဒုက္ခ အကျပ်အတည်းတွေ ပိုမို ဆိုးရွားလာမှာကို စိုးရိမ်မှုတွေလည်း မြင့်တက်နေပါတယ်။

ကိုးကား: AFP