စက်တင်ဘာ−၂၊၂၀၂၅။လူအေး/People’s Spring
စစ်ကိုင်းတိုင်း၊ကျွန်းလှမြို့နယ်အတွင်းအရပ်သားနေထိုင်ရာကျေးရွာအချို့ကို စစ်ကောင်စီက ယနေ့ စက်တင်ဘာ၂ရက် ညပိုင်း၌ ဗုံးများကြဲချတိုက်ခိုက်နေကြောင်း သတင်းရရှိသည်။
ကျွန်းလှမြို့နယ်၊ရကုန်းကြီးကျေးရွာနှင့်ပတ်ဝန်းကျင်ကို ည ၈နာရီ၁၀မိနစ်မှ ၈နာရီ ၃၃ မိနစ်အတွင်း ဂျက်ဖိုက်တာနှင့် Y12 လေယာဉ်ဖြင့်ပါ ဗုံးကြဲနေခြင်းဟု ကောလင်းခရိုင်တပ်ရင်း(၂)သတင်းနှင့်ပြန်ကြားရေးအဖွဲ့က ထုတ်ပြန်သည်။
လေကြောင်းမှ ခြောက်ကြိမ်ဗုံးကြဲခဲ့ကြောင်း ထုတ်ပြန်ထားပြီး မြေပြင်အခြေအနေကို ဖော်ပြထားခြင်းမရှိပေ။
Public Service Announcement
” Y12က ထပ်ပတ်နေတယ်။ တံတားဦက တက်တာတွေ။ နယ်တွေကို ဖုန်းခေါ်မရတော့ ဘာမှသတင်းမရဘူးဗျ။ ပစ်နေတာကတော့ လူတွေရှိနေတဲ့ရွာတွေ။ ဒါကြောင့် တော်တော်လေး စိတ်ပူစရာဖြစ်နေတယ်” ဟု ကျွန်းလှမြို့ခံ စစ်ရှောင်းတဦးက ပြောသည်။
စစ်ကောင်စီသည် ဒေသချင်းဆက်စပ်နေသော ကျွန်းလှ၊တန့်ဆည်၊ ကောလင်းမြို့နယ်တို့ကို ပြီးခဲ့သည့်ဇူလိုင်နှင့် သြဂုတ်ကလည်း ဗုံးကြဲတိုက်ခိုက်ခဲ့သည်။
ဩဂုတ် ၂ဝရက်နံနက်က ကောလင်းမြို့နယ် အရှေ့ခြမ်းရှိ ရှမ်းကုန်းရွာ၊ ခံသာရွာ၊စွယ်ရရွာနှင့် ဘန့်ဘွေးကုန်းကျေးရွာတို့ကို Y 12လေယာဉ်ဖြင့် ဗုံးကြဲတိုက်ခိုက်ရာ ဒေသခံသုံးဦး သေဆုံးခဲ့သည်။
ဇူလိုင် ၁၄ရက်ကလည်း ကောလင်းမြို့နယ်အတွင်း စစ်ကောင်စီက ဂျက်ဖိုက်တာဖြင့်ဗုံးကြဲရာကလေးငယ်တဦးအပါအဝင်အရပ်သားသုံးဦး ဒဏ်ရာရခဲ့သည်။
ဒေသခံပြည်သူများအနေဖြင့် စစ်ကောင်စီ၏ လေကြောင်းအန္တရာယ်နှင့် လက်နက်ကြီးအန္တရာယ်ကိုသတိပြုကြရန် ကောလင်းမြို့နယ်ပြည်သူ့ကာကွယ်ရေးအဖွဲ့(ပကဖ)က သတိပေးထားသည်။
စစ်ကောင်စီသည် ဇူလိုင်အတွင်း နိုင်ငံဒေသအနှံ့ လေကြောင်းတိုက်ခိုက်မှု ၁၈၇ကြိမ်ကျူးလွန်ခဲ့ပြီး အရပ်သားပြည်သူ ၁၆၃ဦး သေဆုံးကာ ၂၉၃ဦး ဒဏ်ရာရခဲ့သည်ဟု အမျိုးသားညီညွတ်ရေးအစိုးရ၊လူအခွင့်အရေးဆိုင်ရာဝန်ကြီးဌာနက ထုတ်ပြန်ထားသည်။
ထို့အပြင် အရပ်သားပြည်သူများအား ပစ်မှတ်ထား၍ တရားလက်လွတ်သတ်ဖြတ်မှုများ၊ လေကြောင်းတိုက်ခိုက်မှုများ ဆက်လက်ပြုလုပ်နေပြီး ဆိုးရွားသော စစ်ရာဇဝတ်မှုများ ဆက်လက်ကျူးလွန်နေသည်ဟု ထုတ်ပြန်ထားသည်။
