စစ်တပ်မီးရှို့မှုကြောင့် စစ်ရှောင်နေရသည့် မြင်းခြံခရိုင်မှဒေသခံများ စားနပ်ရိက္ခာနှင့် အရေးပေါ် အကူအညီများလိုအပ်

စက်တင်ဘာ−၆၊ ၂၀၂၅။ထားမြတ်/People’s Spring

မန္တလေးတိုင်း၊ မြင်းခြံခရိုင်အတွင်း စစ်ကောင်စီတပ်က စစ်ကြောင်းထိုးပြီးကျေးရွာများ မီးရှို့ဖျက်ဆီးနေ၍ စစ်ရှောင်နေရသည့် ဒေသခံများ အရေးပေါ် အကူအညီများ လိုအပ်နေသည်ဟု မြင်းခြံခရိုင်အတွင်း ကူညီရေးလုပ်ဆောင်နေသည့် သတင်းရင်းမြစ်တဦးက ပြောသည်။

စစ်ကောင်စီတပ်နှင့် ပျူစောထီးများက မြင်းခြံခရိုင် နွားထိုးကြီးမြို့နယ် တံစိုးရွာ၊ မာန်လည်ရွာ၊ လက်ဝဲကျေးရွာအပါအဝင် ဒေသတွင်းကျေးရွာများရှိ ပြည်သူလူထုနေအိမ်များကို ဩဂုတ်လအတွင်းက မီးရှို့ခဲ့ပြီး ယခု စက်တင်ဘာပထမပတ်တွင်လည်း တစိုးကျေးရွာကို ထပ်မံမီးရှို့ခဲ့ဟု ဆိုသည်။

“တစိုး၊မာန်လည်၊လက်ဝဲ ရွာကြီးသုံးရွာပြောင်တယ်။ အဲဒီရွာတွေရဲ့အုပ်စု အောက်က ရွာတွေလည်း အရှို့ခံရတယ်။တစိုး၊ မာန်လည်၊ လက်ဝဲက ရွာကြီးတွေ” ဟု သတင်းရင်းမြစ်က ပြောသည်။

Public Service Announcement

စစ်ကောင်စီတပ်ကဩဂုတ်လမှစ၍ စစ်ကြောင်း ထိုးနေခြင်းဖြစ်ကြောင်း၊ ယခင်ကလည်း လက်နက်ကြီးနှင့် လေကြောင်းတိုက်ခိုက်မှု ရန်ကြောင့် ဒေသခံများမှာ ညဘက်တွင် တောထဲ အိပ်ပြီး နေ့တွင် ရွာ၌ နေရသည့် အခြေအနေများဖြစ်ကြောင်းလည်း သတင်းရင်းမြစ်က ပြောသည်။

မြင်းခြံအခြေစိုက် Zero ပြောက်ကျား ပြည်သူ့ကာကွယ်ရေးတပ်ဖွဲ့ ၏ ဩဂုတ် ၂၆ရက် သတင်းထုတ်ပြန်ချက်တွင် စစ်ကောင်စီတပ်သည် နွားထိုးကြီးမြို့နယ် တံစိုးရွာ၊ မာန်လည်ရွာ၊ ကျောက်ဆည်ရွာ၊ သဲတောရွာ၊ လက်ဝဲရွာ၊ ချင်းယားရွာ၊ ကံယားရှည်ရွာ၊ လက်သစ်ပုဂံရွာ၊ မြင်းခြံမြို့နယ် ကံဆင့်တောင်ရွာ၊မြောက်ရွာ၊ဗလုံကျေးရွာများရှိပြည်သူ့ နေအိမ်အမြောက်အများကို မီးရှို့ဖျက်ဆီါ်ပြီး ဆန်စပါး၊ ဆီ၊ စားသောက်ကုန်များကို စားသုံးမရအောင် ရေတွင်း ရေကန်များထဲ သွန်ချခြင်း၊ မြေပြင်တွင်ဖြန့်ကြဲ၍ ဒီဇယ်များ လောင်းချခဲ့ခြင်း ပြုလုပ်ခဲ့ဟု ဖော်ပြသည်။

ထို့ပြင် ဩဂုတ် ၁၀ရက်မှ ၂၄ရက်အတွင်း စစ်ကြောင်းဝင်သော ကျေးရွာများတွင် မပြေးနိုင်သည့် သက်ကြီးရွယ်အိုများ၊မိခင်ကလေးငယ်များကိုပါ မီးရှို့သတ်ဖြတ်ကာ အလောင်းများကို စွန့်ပစ်ခဲ့ခြင်းတို့အား လူမဆန်စွာ လုပ်ဆောင်ခဲ့ဟု ဆိုသည်။

စစ်ကောင်စီတပ်က လက်နက်ကြီး၊ လေကြောင်း ပစ်ကူများဖြင့် စစ်ကြောင်းထိုးရာ မြင်းခြံခရိုင် တပ်ရင်းများ ၊ ပကဖများ၊ မဟာမိတ်များနှင့် တိုက်ပွဲများ ဖြစ်ပွားခဲ့ကြောင်းလည်း အသိပေးထားသည်။