စက်တင်ဘာ-၁၁၊၂၀၂၅။ရောင်နီ/People’s Spring
ရန်ကုန်မြို့၊မရမ်းကုန်းမြို့နယ် နဝဒေးမီးပွိုင့်၌ ဈေးကားနှင့် Boxကား တိုက်မိရာ ဈေးကားတိမ်းမှောက်၍ ကားပေါ်လိုက်ပါလာသူ အမျိုးသားတဦးသေဆုံးခဲ့ကြောင်း မြန်မာ့ကြယ်ဖြူလူမှုကူညီရေးအသင်းက ထုတ်ပြန်ထားသည်။
စက်တင်ဘာ ၁၁ရက် နံနက် ၆ နာရီအချိန်တွင် ယာဉ်တိုက်မှုဖြစ်ခဲ့ခြင်းဖြစ်ပြီး ဈေးကားမှောက်၍ လူနာများကြောင်း သတင်းရရှိ၍ သွားရောက်ကူညီခဲ့ခြင်းဖြစ်ကြောင်း အဆိုပါ အသင်းက ဆိုသည်။
ယာဉ်တိမ်းမှောက်မှုကြောင့် အမျိုးသား ၃ဦး ၊ အမျိုးသမီး ၉ ဦး စုစုပေါင်းထိခိုက်ဒဏ်ရာရရှိသူ ၁၂ ဦးအနက် အမျိုးသားတဦးသေဆုံးခဲ့သည်ဟု ဆိုသည်။
Public Service Announcement
မြန်မာ့ကြယ်ဖြူ လူမှုကူညီရေးအသင်းက လူနာ (၃) ဦး၊လှိုင် လူမှုကူညီရေးအသင်းက လူနာ(၂)ဦး၊ ကောင်းမှူဆောင် လူမှူကူညီရေးအသင်းက လူနာ (၄)ဦး နှင့် အခြားယာဥ်ဖြင့် လူနာ(၃)ဦးကို မြောက်ဥက္ကလာပဆေးရုံသို့ပို့ဆောင်ပေးခဲ့သည်ဟု သိရသည်။
တိမ်းမှောက်ခဲ့သည့် ဈေးကားသည် ရွှေပေါက္ကံဘက်မှလာသည့်ကားဖြစ်ပြီး ထိခိုက်ဒဏ်ရာရရှိသူများပြားကြောင်း ဒေသခံတဦးက ပြောသည်။
“မနက်ဖက်စောစောဆိုရင် ကမ္ဘာအေးဘုရားလမ်းမပေါ်ကချော်တွင်းကုန်းမီးပွိုင့်၊တက္ကသိုလ်ရိပ်သာလမ်းမီးပွိုင့်တွေကိုကိုယ့်ဘက်မီးစိမ်းလို့ဖြတ်ရင်တောင်ဈေးကားတွေကိုအတော်သတိထားရတယ်၊တက္ကသိုလ်ရိပ်သာလမ်းမီးပွိုင့်အကျော်လေးမှာ တစ်ခါတစ်ရံဆိုင်ကယ်နဲ့ ယာဉ်ထိန်းရဲရှိတတ်ပေမဲ့ဈေးကားသမားတွေက ဂရုကိုမစိုက်တာ။ ဟိုကလည်း ရသလောက်ပဲတောင်းပြီးပြေလည်နေကြတော့စည်းကမ်းကိုဘယ်လိုက်နာကြတော့မလဲ၊ဖြစ်တော့ကြားထဲကခရီးသည်တွေ သေကြ ၊မိသားစုတွေနစ်နာကြရတယ်။ ပြင်းထန်ထိရောက်စွာအရေးယူပေးစေချင်တယ်။”ဟု ယာဉ်မောင်းတဦးက အကြံပြုသည်။
