စစ်တပ်သတ်ဖြတ်လို့ အသက်ဆုံးရှုံးခဲ့ရတဲ့ အမျိုးသမီးတွေနဲ့ မိန်းကလေးငယ်တွေကို ဗြိတိန်သံရုံးဂုဏ်ပြု

-အာဏာသိမ်းချိန်ကစလို့ အမျိုးသမီးအနည်းဆုံး ၈၅ဦး သတ်ဖြတ်ခံရ

စစ်တပ်အာဏာသိမ်းချိန်ကစလို့ အသက်ဆုံးရှုံးခဲ့ရတဲ့ အမျိုးသမီးတွေနဲ့ မိန်းကလေးငယ်တွေ အားလုံးကို ဂုဏ်ပြုတယ်လို့ ရန်ကုန်မြို့ ဗြိတိန်သံရုံးက ဒီက​နေ့ ထုတ်ပြန်ပါတယ်။

ဒီနေ့ကျရောက်တဲ့ အပြည်ပြည်ဆိုင်ရာအမျိုးသမီးများအပေါ် အကြမ်းဖက်မှုပပျောက်ရေးနေ့မှာ ဂုဏ်ပြုထုတ်ပြန်ခဲ့တာဖြစ်ပြီး ဖေဖော်ဝါရီ အာဏာသိမ်းချိန်ကစလို့ အမျိုးသမီးနဲ့ မိန်းကလေးငယ် အနည်းဆုံး ၈၅ ဦးဟာ လုံခြုံရေးတပ်ဖွဲ့ဝင်တွေရဲ့သတ်ဖြတ်ခြင်းကို ခံခဲ့ရတယ် ဗြိတိန်သံရုံးက ဆိုပါတယ်။

လုံခြုံရေးတပ်ဖွဲ့တွေဟာ အမျိုးသမီးတွေအပေါ် ညှင်းပန်းနှိပ်စက်မှု၊ အဓမ္မပြုကျင့်မှုနဲ့ လိင်ပိုင်းဆိုင်ရာ စော်ကားမှုတွေနဲ့ပတ်သက်လို့ အစီရင်ခံစာ အများအပြား ရှိခဲ့ပြီး အဲဒီကိစ္စရပ်တွေမှာ ကျူးလွန်သူကို အရေးယူသွားနိုင်ဖို့ ဗြိတိန်အစိုးရက နိုင်ငံတကာမိတ်ဖက်တွေနဲ့ ဆက်လက်ပူးပေါင်းဆောင်ရွက်သွားမယ်လို့ ထုတ်ပြန်ပါတယ်။

Public Service Announcement

အကြမ်းဖက်စစ်တပ်သတ်ဖြတ်လို့ အသက်ဆုံးရှုံးခဲ့ရတဲ့ အမျိုးသမီးတွေနဲ့ မိန်းကလေးငယ်တွေအနက် ငြိမ်းချမ်းစွာဆန္ဒပြရင်း ပထမဦးစွာ အသက်ဆုံးရှုံးခဲ့ရတဲ့ မမြသွဲ့သွဲ့ခိုင်လည်းပါတယ်လို့ ဗြိတိန်သံရုံးက ထည့်သွင်းဂုဏ်ပြုထုတ်ပြန်ပါတယ်။

နောက်ပြီး ကျား၊မအခြေပြုအကြမ်းဖက်မှုဆန့်ကျင်ရေး ၁၆ရက်တာ လှုပ်ရှားမှုမှာ အမျိုးသမီးများအပေါ် အကြမ်းဖက်မှုအဆုံးသတ်ရေးကမ္ဘာလုံးဆိုင်ရာ လှုပ်ရှားမှုကို ထောက်ခံတဲ့အနေနဲ့ အချက် ၁၆ချက်ကို ဗြိတိန်သံရုံးက ဖော်ပြသွားမယ်လို့ ထုတ်ပြန်ပါတယ်။