အောက်တိုဘာ-၂၁၊၂၀၂၅။မေရီ၊ရှိန်း/People’s Spring
မန္တလေးမြို့မှာ ငလျင်ထိထားတဲ့တိုက်ဖြိုချရင်း ပြိုကျလို့ အမျိုးသားတဦး ပိမိပြီး ကယ်ဆယ်ရေးတွေ လုပ်ဆောင်နေရပါတယ်။
အောက်တိုဘာ ၂၁ ရက် ညနေ ၃ နာရီဝန်းကျင်က မန္တလေးမြို့၊ ချမ်းအေးသာစံမြို့နယ်၊ ၃၄လမ်းနဲ့ ၃၅ လမ်းကြား၊ ၈၅ အေလမ်းမှာ ငလျင်ထိထားတဲ့တိုက်ဖြိုရင်း ပြိုကျပြီး အမျိုးသားတဦးပိမိခဲ့ကြောင်းဒေသခံတွေကပြောပါတယ်။
“လက်ရှိသိရတာ နေအိမ်၂လုံးပိသွားတယ်လို့ သိရတယ်။အဲဒီအိမ်ထဲမှာ လူတဦး ပိမိနေတယ်ဆိုလို့ ကယ်ထုတ် နေကြတယ်။အသေးစိတ်တော့ မသိရသေးဘူး။အခုကယ်ထုတ်ဖို့ကြိုးစားနေကြတယ်”လို့ မြို့ခံလူမှုကူညီရေးအသင်းတာဝန်ရှိသူတဦး ကလည်းပြောပါတယ်။
Public Service Announcement
ပိမိတဲ့အမျိုးသားဟာအောင်နန်းအနောက်ရပ်ကွက်နေ ကိုဝင်းကိုဆိုသူဖြစ်ပြီး၎င်းအားနယ်မြေခံမီးသတ်တွေ၊ ပရဟိတအသင်းတွေက ကယ်ဆယ်ပေးနေတယ်လို့ ရပ်ကွက်ခံတွေက ပြောပါတယ်။
“အထဲက မီးခိုးတွေလည်းထွက်နေတာ။ ဘေးအိမ်တွေလည်း ပိသွားတယ်”လို့ ဒေသခံတဦးက ပြောပါတယ်။
ပိမိနေသူဆီက တုံ့ပြန်သံကြားရလို့ ကယ်ဆယ်ရေးတွေ ဆက်လက်လုပ်ဆောင်နေတယ်လို့ သိရပါတယ်။
မန္တလေးမြို့မှာ ငလျင်ကြီးဖြစ်ပွားပြီးနောက်ပိုင်း တိုက်တွေဖြိုချရင်း ၄ ဦးထက်မနည်း သေဆုံးခဲ့ဖူးပါတယ်။
မန္တလေးမြို့မှာ မတ်လ၂၈ ရက်နေ့က ၇.၇ပြင်း အားရှိ ငလျင်ကြီးလှုပ်ခတ်ခဲ့ပြီး နေအိမ်ပေါင်းများစွာ ပြိုကျပျက်စီးခဲ့ပြီး ပြည်သူပေါင်း ထောင်နဲ့ချီသေဆုံးခဲ့ပါတယ်။
