ဖေဖော်ဝါရီ ၂၃၊၂၀၂၆ ဇေအောင်/People’s Spring
စစ်ကိုင်းတိုင်း၊ ချောင်းဦးမြို့နယ်မှာ စစ်တပ်က စစ်ကြောင်းထိုးလာနိုင်လို့ ချောင်းဦး-မယ်သည်းကြိုးလမ်းပိုင်း ယာယီပိတ်ထားကြောင်း ချောင်းဦးမြို့နယ်ပြည်သူ့ကာကွယ်ရေးအဖွဲ့(ပကဖ) သတင်းတာဝန်ခံက ပြောပါတယ်။
ဒီကနေ့ ဖေဖော်ဝါရီ ၂၃ ရက် ညနေပိုင်းမှာ ချောင်းဦးမြို့၊ ရပ်လှေရပ်၊ အမြင့်လမ်းခွဲနဲ့ တမာတန်းရပ်တွေမှာ မြို့ပေါ်က စစ်ကောင်စီတပ်ဖွဲ့ဝင်တွေ အများအပြားရောက်ရှိနေပြီး စစ်ကြောင်းထိုးနိုင်ခြေရှိကြောင်း၊ ဒါ့ကြောင့် ချောင်းဦး-မယ်သည်းကြိုးလမ်းကို ယာယီပိတ်ထားကြောင်းနဲ့ အန္တရာယ်များလို့ လုံးဝ အသုံးမပြုကြဖို့လည်း ချောင်းဦးမြို့နယ် ပြည်သူ့ကာကွယ်ရေးအဖွဲ့က အသိပေးပါတယ်။
“ချောင်းဦးမြို့ပေါ်က စစ်ကောင်စီတပ်က သူတို့ရောက်လေ့ရောက်ထမရှိတဲ့ မြို့အစွန်ဘက်တွေကို ခြေရှုပ်နေတဲ့အတွက် လမ်းအသုံးမပြုသင့်တဲ့အတွက် ပိတ်ထားတာပါ။ အိမ်စီးကားနှစ်စီးလောက်နဲ့ချလိုက်ဝင်လိုက်ထွက်လိုက် လုပ်နေတယ်။ မြို့ထဲမှာရှိတဲ့အင်အားအများစုကို မြို့စွန်ဘက်ကို လာပို့တဲ့အနေအထားမို့ စစ်ကြောင်းထိုးနိုင်ခြေရှိတဲ့အတွက် ယာယီပိတ်ထားတာပါ”လို့ ၎င်းတာဝန်ခံက ပြောပါတယ်။
Public Service Announcement
လက်တလောအချိန်အထိ စစ်တပ်က စစ်ကြောင်းထိုးတာ၊ ဖမ်းဆီးတာတွေမရှိသေးဘူးလို့လည်း ချောင်းဦးပကဖ သတင်းတာဝန်ခံက ပြောပါတယ်။
စစ်တပ်ဟာ တော်လှန်ရေးအားကောင်းတဲ့ ချောင်းဦးနယ်က ကျေးရွာတွေကို စစ်ကြောင်းထိုးမီးရှိူ့တဲ့အပြင် လက်နက်ကြီးတွေ၊ လေကြောင်းတိုက်ခိုက်မှုတွေမကြာခဏ ပြုလုပ်နေပြီး ပြီးခဲ့တဲ့ သီတင်းကျွတ်လပြည့်ညက ချောင်းဦးနယ်ကရွာတစ်ရွာ ဆီမီးသပိတ်ကို စစ်တပ်က လေကြောင်းတိုက်ခိုက်လို့ ပြည်သူဆယ်နဲ့ချီ သေဆုံးခဲ့ပါတယ်။
