မတ်-၁၂၊ ၂၀၂၆။ထားမြတ်/People’s Spring
ချင်းပြည်နယ်၊ ဟားခါးမြို့မှာ ပြည်သူတွေကို နှောက်ယှက် ငွေညှစ်တောင်းခံနေတဲ့ ရဲတပ်ဖွဲ့ဝင်တွေကို တိုက်ခိုက်ခဲ့ကြောင်း ချင်းဒေသကာကွယ်ရေးတပ်(CDF) ဟားခါးက မတ်လ ၁၁ရက်မှာ ထုတ်ပြန်ပါတယ်။
CDFဟားခါးရဲ့ ထုတ်ပြန်ချက်မှာ ပစ်ခတ်မှု ပြုလုပ်ခဲ့တဲ့ နေရာနဲ့ အချိန်ကို ဖော်ပြမထားပေမယ့် The Voice of Chinland ရဲ့ သတင်းဖော်ပြချက်မှာ မတ်လ ၁၁ရက်က ဟားခါးမြို့ ပြည်တော်သာ ရပ်ကွက်မှာ ဖြစ်ပွားခဲ့တာလို့ဆိုပါတယ်။
” ပြည်သူများအား နှောက်ယှက်၍ ငွေညစ်တောင်းခံနေသော ရဲတပ်ဖွဲ့ဝင်များကို ဆိုင်ကယ်များစစ်ဆေးငွေညစ်နေစဥ် ကျွန်တော်တို့ CDF-Hakhaမှ ပစ်ခတ်တိုက်ခိုက်ခဲ့ပါသည်” လို့ CDF ဟားခါးက ထုတ်ပြန်ပါတယ်။ အဲဒီဖြစ်စဉ်မှာ ရဲ ၁ဦး နေရာမှာသေဆုံးပြီး ဒဏ်ရာရသူ ၂ဦးထဲက တစ်ဦးဟာ ထပ်မံသေဆုံးသွားတယ်လို့ ဖော်ပြထားပါတယ်။
Public Service Announcement
ပြည်သူလူထုအား မတရားနှောက်ယှက်ခြင်း၊ ငွေညစ်တောင်းခံခြင်းများ ပြုလုပ်နေတဲ့ အဖွဲ့အစည်းတွေ နောက်တကြိမ်ထပ်မလုပ်ဖို့ သတိပေးကြောင်းလည်း CDF ဟားခါးက ထုတ်ပြန်ခဲ့ပြီး မတရားလုပ်ရပ်တွေ ဆက်လုပ်ရင် ထိရောက်တဲ့ အရေးယူမှုလုပ်မယ်လို့ ဖော်ပြထားပါတယ်။
ပြည်သူများအနေဖြင့်လည်း မတရားညှဉ်းပန်းနှောက်ယှက်မှုများကို သတိထားဖို့ လုံခြုံရေးကို ဂရုပြုကြဖို့လည်း နှိုးဆော်ထားပါတယ်။
