မတ်-၁၂၊၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU)၊ ညောင်လေးပင်ခရိုင် ဆောထိ(ရွှေကျင်)မြို့နယ် ကို အာဏာသိမ်းစစ်တပ်က စက်တပ်လေထီးအသုံးပြု ဗုံးကြဲတိုက်ခိုက်ခဲ့လို့ ကလေးငယ်တွေ အပါအဝင် အရပ်သား ၆ဦး သေဆုံးကာ ၄ဦး ဒဏ်ရာရခဲ့ကြောင်း KNU ဗဟိုက သတင်းထုတ်ပြန်ပါတယ်။
မတ်လ ၁၁ရက် နေ့လည် ၁၂နာရီ ၅၀မိနစ် လောက်မှာ စစ်ကောင်စီရဲ့ ခမရ (၂၀)တပ်ရင်းက စက်တပ်လေထီး (Paramotor) သုံးပြီး ရွှေကျင်မြို့နယ် အောပလား(အင်းဗလာ)ရွာကို ဗုံးကြဲတိုက်ခိုက်ခဲ့တာလို့ ဆိုပါတယ်။
ဗုံး၂လုံး ကြဲချတိုက်ခိုက်ခဲ့ရာ (၆)နှစ်အရွယ် ကလေးငယ် ၂ဦးနဲ့ ပြည်သူ ၄ဦး သေဆုံးကာ ကလေးငယ် ၁ဦးနဲ့ ပြည်သူ ၃ဦး ဒဏ်ရာရရှိခဲ့ကြောင်း ဖော်ပြပါတယ်။ နေအိမ်ပျက်စီးမှုနဲ့ နွား ၂ကောင်သေဆုံးမှု ရှိခဲ့တယ်လို့လည်း အသိပေးပါတယ်။
Public Service Announcement
ဒဏ်ရာရသူတွေထဲက (၉)နှစ် ကလေးဟာ ခြေထောက်နဲ့ လက် ပြတ်သွားတာကြောင့် စိုးရိမ်ရကြောင်း ဖော်ပြပါတယ်။
အာဏာသိမ်းစစ်တပ်ဟာ မတ်လပထမပတ်ကလည်း ညောင်လေးပင်ခရိုင်အတွင်း စစ်ကြောင်းထိုးပြီး အရပ်သား ပြည်သူရာချီဖမ်းဆီး သတ်ဖြတ်တာ လေကြောင်း ဒရုန်း အသုံးပြု ဗုံးကြဲတာတွေကြောင့် ပြည်သူ ၃၀ကျော် သေဆုံးခဲ့ရတယ်လို့ တော်လှန်ရေးရဲဘော်တွေက အသိပေးထားပါတယ်။
ဒါ့အပြင် KNU မြိတ်ထားဝယ်ခရိုင် လယ်မူလားမြို့နယ်မှာလည်း မတ်လ ၉ရက်နဲ့ ၁၀ရက်မျာ စစ်ကောင်စီ လေကြောင်းတိုက်ခိုက်မှုတွေကြောင့် ကလေးငယ် ၈ဦးအပါအဝင် အရပ်သား ပြည်သူ ၁၅ ဦးသေဆုံးပြီး ၁၆ဦး ဒဏ်ရာရခဲ့ပါတယ်။
စစ်ကောင်စီဟာ အရပ်သားပြည်သူတွေကို ပစ်မှတ်ထားတဲ့ လေကြောင်းဗုံးကြဲတိုက်ခိုက်မှုတွေကို နေ့စဉ် ဆက်တိုက်ပြုလုပ်လျက်ရှိပြီး ပြည်သူလူထု အစုလိုက်အပြုံလိုက်သေဆုံးထိခိုက်မှုတွေ မကြာခဏ ဖြစ်ပေါ်နေပါတယ်။
