ဧပြီ ၁၉၊ ၂၀၂၆၊ ဟာနာဆန်/People’s Spring
မကွေးတိုင်း၊ ရေစကြိုမြို့မှာ သင်္ကြန်ကာလအတွင်း စစ်တပ်က ဖမ်းဆီးခေါ်ဆောင်သွားတဲ့ လူငယ်တစ်ဦး ညှင်းပန်းနှိပ်စက်ခံရပြီး သေဆုံးကာ ရုပ်အလောင်းကို ချင်းတွင်းမြစ်အတွင်းကပြန်လည်တွေ့ရှိခဲ့ကြောင်း ဒေသခံတွေက ပြောပါတယ်။
ပြီးခဲ့တဲ့ ဧပြီ ၁၄ ရက် သင်္ကြန်အကျနေ့က ရေစကြိုမြို့၊ ရွှေဂူကြီးဘုရားရှေ့ရှိ ရေကစားမဏ္ဍပ်မှာ ရေကစားနေတဲ့ ကျောမကြားကျေးရွာနေ အသက်(၁၇)နှစ်အရွယ် မောင်ဟိန်းထက်ဇော်ကို ရန်ဖြစ်တယ်ဆိုပြီး စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ဖမ်းဆီးခေါ်ဆောင်သွားခဲ့ကြောင်း ရေစကြိုသတင်းအချက်အလက် ကော်မတီရဲ့တာဝန်ရှိသူက ပြောပါတယ်။
အဲဒီနောက် ဖမ်းဆီးခံရတဲ့လူငယ်ရဲ့ မိသားစုဝင်တွေက လိုက်လံစုံစမ်းခဲ့ပေမဲ့ သက်ဆိုင်ရာ တာဝန်ရှိသူတွေက မောင်းထုတ်ကာ မရှိကြောင်း ငြင်းဆိုခဲ့တယ်လို့ သိရပါတယ်။
Public Service Announcement
ဧပြီ ၁၆ရက် သင်္ကြန်အတက်နေမှာတော့ ချင်းတွင်းမြစ်အတွင်းမှာ ရုပ်ပျက်ဆင်းပျက်ဖြစ်နေတဲ့ မောင်ဟိန်းထက်ဇော်ရဲ့ ရုပ်အလောင်းကို တွေ့ရှိခဲ့ရကြောင်း ရေစကြိုသတင်းအချက်အလက် ကော်မတီရဲ့တာဝန်ရှိသူက ပြောပါတယ်။
” အလောင်းက ဒဏ်ရာဗရပွနဲ့ တော်တော်ရုပ်ပျက်ဆင်းပျက် ဖြစ်နေပါပြီ။ တစ်ရွာလုံး ယူကျုံးမရနဲ့ စိတ်မကောင်း ဖြစ်ကြတာပေါ့ဗျာ။ မိဘတွေတော့ ပြောမနေနဲ့တော့၊ တစ်ဦးတည်းသော သားလေးလေ။ ပြင်ဦးလွင်က မုန့်ဆိုင်တစ်ခုမှာ အလုပ်လုပ်ပြီး မိဘကို လုပ်ကျွေးနေတာပါ။ သင်္ကြန်ရက် ရွာကို ခဏပြန်လာတာ”လို့ နီးစပ်သူတစ်ဦးက ရေစကြိုသတင်းအချက်အလက် ကော်မတီကို ပြောပြထားပါတယ်။
သေဆုံးသူ လူငယ်ရဲ့နာရေးကို ဧပြီ ၁၇ရက်က ပြုလုပ်ခဲ့ပြီး တစ်ရွာလုံး လိုက်ပါပို့ဆောင်ခဲ့ကြကြောင်း သိရှိရပါတယ်။
ဧပြီ ၁၃ ရက်သင်္ကြန်အကြိုနေ့ နေ့လယ်ပိုင်းကပဲ ရေစကြိုမြို့နယ်၊ ရွာသစ်ကျေးရွာကနေ မြို့ပေါ်ကို ရေလာကစားတဲ့ အသက်(၁၈)နှစ်အရွယ် လူငယ်တစ်ဦးဟာ ရွာသစ်တောရိုးနဲ့ နှစ်ထောင်ပြည့်ရပ်ကွက်အနီးမှာ စစ်အုပ်စုရဲ့ ပစ်ခတ်သတ်ဖြတ်ခံခဲ့ရပါသေးတယ်။
စစ်တပ်ဟာ မန္တလေး၊ စစ်ကိုင်း၊ မကွေးတိုင်း အပါအဝင် တော်လှန်ဒေသအသီးသီးက မြို့ပေါ်တွေမှာ သင်္ကြန်ပွဲကို စည်ကားအောင် ပြုလုပ်နေပြီး ကျေးရွာတွေကိုတော့ စစ်ကြောင်းထိုး မီးရှို့တာ၊ ပစ်ခတ်သတ်ဖြတ်တာတွေ ပြုလုပ်နေပါတယ်။
