ဂျပန်မှာ ရထားတိုက်ခံရလို့ ဘူတာရုံက အလုပ်သမား ၄ ဦး သေဆုံးသွားကြောင်း သိရပါတယ်။
တိုကျိုမြို့တော် မြောက်ပိုင်းမှာရှိတဲ့ ရှင်-ကန်နူမာ ဘူတာရုံမှာ ဩဂုတ် ၂၀ မနက်ပိုင်းတုန်းက ရထားတိုက်မှု ဖြစ်ခဲ့တာပါ။ ကယ်ဆယ်ရေး သွားရောက် ဆောင်ရွက်ခဲ့တဲ့ မီးသတ်ဌာန အရာရှိ တစ်ဦးက ရထားတိုက်ခံရသူ ၄ ဦးစလုံး သေဆုံးသွားကြောင်း AFP သတင်းဌာနဆီကို ပြောကြားခဲ့ပါတယ်။
နောက်ထပ် ကယ်ဆယ်ရေး ဝန်ထမ်း တစ်ဦးကတော့ အခင်းဖြစ်တဲ့ နေရာဆီ ရောက်သွားချိန်မှာ အလုပ်သမား ၃ ဦးဟာ ရထားအောက်မှာ ညပ်နေဆဲဖြစ်ပြီး ကျန်တဲ့တစ်ယောက်ကတော့ ဘူတာ ပလက်ဖောင်းပေါ်မှာ ရှိနေခဲ့တယ်လို့ ဆိုပါတယ်။
အားလုံးကို ဆေးရုံပို့ခဲ့ပေမယ့် အဲဒီအချိန်ကတည်းက အသိမရှိကြတော့သလို အသက်ရှင်တဲ့ လက္ခဏာတွေလည်း မတွေ့တော့ဘူးလို့ အဲဒီ သတင်းရင်းမြစ်က AFPကို ပြောပါတယ်။
Public Service Announcement
ဖြစ်စဉ် အသေးစိတ်ကို ရဲတွေက မထုတ်ပြန်သေးပေမယ့် Nippon TVကတော့ အဲဒီ အလုပ်သမားတွေဟာ ဘူတာနဲ့ ရထားသံလမ်း တဝိုက်က ခြုံနွယ်တွေကို ရှင်းလင်းနေရင်း ရထား အတိုက်ခံခဲ့ရတာလို့ ဖော်ပြသွားပါတယ်။
ဂျပန်ဟာ ရထားပို့ဆောင်ရေးမှာ လုံခြုံရေးစံနှုန်း အကောင်းဆုံး နိုင်ငံတစ်ခုဖြစ်ပြီး သာမန်အားဖြင့်တော့ လူ့အသက် ဆုံးရှုံးစေတဲ့ ရထားမတော်တဆမှုတွေ အင်မတန် နည်းပါးပါတယ်။
ဂျပန်ရဲ့ ကျည်ဆန်ရထားတွေမှာ အထူးကောင်းမွန်တဲ့ ပြင်ဆင်ထိန်းသိမ်းမှုတွေ၊ ဝန်ထမ်းတွေကို လေ့ကျင့်ပေးထားတာတွေ၊ အဆင့်အမြင့်ဆုံး နည်းပညာတွေကို အသုံးပြုထားပြီး ရထားလမ်းချော်လို့၊ ရထားချင်းတိုက်မိလို့ လူသေဆုံးတယ် ဆိုတာမျိုး မရှိခဲ့ဖူးပါဘူး။
ကိုးကား: AFP
