ဒေါ်အောင်ဆန်းစုကြည်ဆီ ဗြိတိန်ချားစ်ဘုရင်က စာအုပ်နှစ်အုပ်ပေးပို့

အောက်တိုဘာ – ၁၉၊၂၀၂၆

အာဏာသိမ်းချိန်ကတည်းက မတရားဖမ်းဆီးထိန်းသိမ်းထားတဲ့ ဒေါ်အောင်ဆန်းစုကြည်ဆီ ဗြိိတိန်ရဲ့ ခားစ်ဘုရင်ဆီကပေးပို့လာတဲ့စာအုပ်နှစ်အုပ်ကိုလက်ဝယ်သွားရောက်ပေးအပ်ခဲ့တယ်လို့ အာဏာသိမ်းစစ်အုပ်စုကသတင်းထုတ်ပြန်လာပါတယ်။

ဒီနေ့ (အောက်တိုဘာ ၁၉ ရက်) မနက်ပိုင်းမှာ စစ်အုပ်စုရဲ့ ပြည်ထဲရေးဝန်ကြီးဌာနတာဝန်ရှိသူတွေကသွားပေးခဲ့တာလို့ဆိုထားပါတယ်။

အဲဒီသတင်းထုတ်ပြန်ချက်မှာဒေါ်အောင်ဆန်းစုကြည်ရဲ့ဓာတ်ပုံကိုလည်း ထုတ်ပြန်ထားပါတယ်။ ဒါပေမယ့် ဒေါ်အောင်ဆန်းစုကြည်ကို ဖမ်းဆီးချုပ်နှောင်ထားတဲ့နေရာကို မဖော်ပြပါဘူး။

Public Service Announcement

ချားစ်ဘုရင်ကပေးပို့လာတဲ့ စာအုပ် ၂ အုပ် ဖြစ်တဲ့ The Land Garderners – Soil to Table ၊ Soil The World at Our Feet နဲ့ အိတ်ပိတ်စာအိတ် ၁ အိတ်၊ သံတမန်အိတ်ပိတ်စာတို့ကိုလည်း ဒေါ်အောင်ဆန်းစုကြည်ထံပေးအပ်ခဲ့တယ်လို့ ဆိုထားပါတယ်။

အာဏာသိမ်း​စစ်အုပ်စုရဲ့​ပြော​ရေးဆိုခွင့်ရှိသူ ဒေါ်ခိုင်ခိုင်စိုး ဆိုသူက သတင်းထုတ်ပြန်ရာမှာ လူထု​ခေါင်း​ဆောင် ​ဒေါ်​အောင်ဆန်းစုကြည်ကို ​ဒေါ်စုကြည် လို့ သုံးနှုံး​ဖော်ပြထားပါတယ်။

စစ်အုပ်စုလက်ထဲမှာမတရားဖမ်းဆီးခံထားရတဲ့ ဒေါ်အောင်ဆန်းစုကြည် သက်ရှိထင်ရှားရှိနေတယ်ဆိုတာကိုသက်သေပြပေးဖို့သားဖြစ်သူကိုထိန်လင်းကဦးဆောင်ပြီးတောင်းဆိုလှုပ်ရှားမှုပြုလုပ်လာချိန်မှာပဲအာဏာ သိမ်းစစ်တပ်က ဒေါ်အောင်ဆန်းစုကြည်ရဲ့ ဓာတ်ပုံကို ထုတ်ပြလာတာလည်းဖြစ်ပါတယ်။

ပြီးခဲ့တဲ့ ဩဂုတ် ၃ ရက်ကလည်း အပြည်ပြည်ဆိုင်ရာ ကြက်ခြေနီကော်မတီ (ICRC) က ဒေါ်အောင်ဆန်းစုကြည်ထံ သွားရောက် တွေ့ဆုံခဲ့တာကို ပုံနဲ့တကွ စစ်အုပ်စုက ထုတ်ပြန်ခဲ့ဖူးပါတယ်။

The Land Gardeners: Soil to Table စာအုပ်ကိုဗြိတိန်နိုင်ငံမှ ဥယျာဉ်ပညာရှင်များဖြစ်ကြတဲ့ Bridget Elworthy နဲ့ Henrietta Courtauld တို့က ရေးသားထားပြီး မြေဆီလွှာကျန်းမာရေး၊ သဘာဝမြေဆွေးပြုလုပ်နည်း၊ အပင်စိုက်ပျိုးထိန်းသိမ်းနည်းနဲ့ ကိုယ်တိုင်စိုက်ပျိုးထားတဲ့ သီးနှံတွေကို အာဟာရပြည့်ဝတဲ့ အစားအစာတွေအဖြစ် ချက်ပြုတ်နည်းတွေကို ဖော်ပြထားတဲ့စာအုပ်ဖြစ်ပါတယ်။