ချင်းပြည်နယ် ဖလမ်းမြို့နယ်တွင် နှစ်ရက်ဆက်တိုက်ပွဲဖြစ်ပွားခဲ့ရာ စစ်ကောင်စီတပ်မှကိုးဦးသေဆုံးပြီး ၁၀ဦးကျော်ဒဏ်ရာရခဲ့ကြောင်း ချင်းအမျိုးသားအဖွဲ့ချုပ်/ချင်းအမျိုးသား ကာကွယ်ရေးတပ်(CNO/CNDF)က ထုတ်ပြန်သည်။
ဖလမ်းမြို့နယ် ဝေဘူလမြို့ဘက်မှ စစ်ကြောင်းချီလာသည့် အကြမ်းဖက်စစ်ကောင်စီတပ်များသည် ဇန်နဝါရီ ၁၄ရက် နံနက် ၃ နာရီခန့်တွင် မွှန်လီကျေးရွာနှင့် ဗားရ်စခန်းအကြား၌ CNDF မှ ထောင်ထားသော နင်းမိုင်း၊ တိုက်မိုင်းများကြောင့် ငါးဦးသေဆုံးပြီး ဒဏ်ရာရရှိသူများရှိခဲ့သည်ဟု ဖော်ပြသည်။
အဆိုပါ စစ်ကောင်စီတပ်သည် ဗားရ်စခန်းတွင် ညအိပ်စခန်းချပြီး ယနေ့(ဇန်နဝါရီ ၁၅)တွင် ဗားရ်စခန်းများ ပြန်လည်ထွက်ခွာလာရာ ပါရ်သဲရွာအနီးတွင် CNDFနှင့် ၇နာရီကျော်ကြား တိုက်ပွဲ ပြင်းထန်စွာဖြစ်ပွားခဲ့သည်ဟု ဆိုသည်။
အကြမ်းဖက်စစ်ကောင်စီတပ်မှ လက်နက်ကြီး၊ လက်နက်ငယ်များ အသုံးပြုကာ ပစ်ခတ်ခဲ့ကြောင်း၊ အဆိုပါ တိုက်ပွဲအတွင်း CNDF များ၏ မိုင်းပဒေသာနှင့် ပစ်ခတ်မှုများကြောင့် အကြမ်းဖက် စစ်ကောင်စီဘက်မှ လေးဦးခန့်သေဆုံးပြီး ၁၀ ဦးခန့်ဒဏ်ရာရရှိခဲ့ကြောင်း ဖော်ပြ သည်။
Public Service Announcement
စစ်ကိုင်းတိုင်း ကလေးမြို့မှ ချင်းပြည်နယ်သို့ တက်လာသည့် စစ်ကောင်စီတပ်ယာဉ်းတန်းကို CNDF အပါအဝင် CNA၊CDF-KKG ၊Zoland-PDF၊ CDM ပူးပေါင်းတပ်များက တီးတိန်မြို့နယ် ဟိန်းဇိန်ကျေးရွာမှ ခုခံတိုက်ခိုက်ခဲ့သည်ဟုဆိုသည်။
ထို့အပြင် အကြမ်းဖက်စစ်ကောင်စီမှ လေကြောင်းပါ အသုံးပြုပြီးပစ်ခတ်ခဲ့ကြောင်း၊ CNDF ဘက်မှ ထိခိုက်မှုမရှိကြောင်း ထုတ်ပြန်သည်။
လက်ရှိ စစ်ရေးအခြေအနေအရ တိုက်ပွဲဆက်လက် ဖြစ်ပွားနိုင်သည့်အတွက် ပြည်သူများ အနေဖြင့် ဖလမ်း – ကလေး လမ်းမကြီးနှင့် ဖလမ်း – ဝေဘူလလမ်းဘက်သို့ ခရီးသွားလာခြင်း မပြုကြရန် CNOက အသိပေးထားသည်။
