စစ်တပ်က အာဏာသိမ်းပြီးနောက် အကြမ်းဖက်သတ်ဖြတ်ခံနေရသည့် မြန်မာပြည်သူများ အကြောင်း ရိုက်ကူးထားသော Myanmar Diaries ရုပ်သံဇာတ်လမ်းမှာ ဘာလင်ရုပ်ရှင်ပွဲတော်၌ အကောင်းဆုံးရုပ်သံမှတ်တမ်းဆုရရှိခဲ့သည်။
ယင်းဇာတ်ကားကို အမည်မဖော်လိုသည့် မြန်မာလူငယ်ရုပ်ရှင်ဖန်တီးသူ ၁၀ဦးက ရိုက်ကူးခဲ့ပြီး အာဏာသိမ်းခံရပြီးတဲ့နောက် စစ်တပ်၏ ရက်စက်ကြမ်းကြုတ်မှုများနှင့် ပြည်သူများ၏ စစ်အာဏာရှင်ဆန့်ကျင်ရေးလုပ်ဆောင်မှုအကြောင်းများကို ထည့်သွင်းရိုက်ကူးထားခြင်း ဖြစ်သည်။
“ကမ္ဘာတဝှမ်းက သတင်းခေါင်းကြီးပိုင်းတွေကနေ ပျောက်ကွယ်လုနီးပါးဖြစ်နေတဲ့ မြန်မာနိုင်ငံအတွက် အလွန်အရေးကြီးတဲ့ ဇာတ်ကားတစ်ကားပါ”ဟု ယင်းရုပ်ရှင်အညွှန်း၌ ဖော်ပြထားသည်။
ဘာလင်ရုပ်ရှင်ပွဲတော်ကို (၇၂)ကြိမ်မြောက်ပြုလုပ်ခြင်းဖြစ်ပြီး ဆုပေးပွဲကို ဖေဖော်ဝါရီ ၁၆ရက်က ပြုလုပ်ခဲ့သည်။
Public Service Announcement
Myanmar Diaries ဇာတ်ကားအတွက်ရရှိသည့်ဆုကို ချက်နိုင်ငံသား ဒါရိုက်တာ Petr Lom နှင့် ဒတ်ခ်ျနိုင်ငံမှ ထုတ်လုပ်သူ Corinne van Egeraat တို့ က လက်ခံခဲ့ပြီး ဆုကြေးငွေ ယူရိုလေးသောင်းရရှိခဲ့သည်။
ယင်းရုပ်ရှင်ကို Myanmar Film Collectiveက နယ်သာလန်နဲ့ နော်ဝေက ရုပ်ရှင်ထုတ်လုပ်ရေးကုမ္ပဏီနှစ်ခုနှင့် ပူးပေါင်းထုတ်လုပ်ခဲ့ခြင်းဖြစ်သည်။
