ကရင်အမျိုးသားအစည်းအရုံး(KNU)နယ်မြေအတွင်းရှိ ကျေးရွာများသို့ အကြမ်းဖက်စစ်ကောင်စီလက်အောက်ခံတပ်များက လက်နက်ကြီးဖြင့် ရမ်းသန်းပစ်ခတ်ခဲ့၍ အရပ်သားများ ထိခိုက်သေဆုံးမှုရှိခဲ့ပြီး နေအိမ်များ ပျက်စီးခဲ့ကြောင်း KNU က သတင်းထုတ်ပြန်သည်။
KNU တပ်မဟာ(၅)နယ်မြေ ဖာပွန်ခရိုင်တွင် ဖေဖော်ဝါရီ ၂၄ရက် ညပိုင်းက အကြမ်းဖက်စစ်ကောင်စီ လက်အောက်ခံ ဗိုလ်မောင်ချစ် ဦးဆောင်သော BGF အမှတ်(၁၀၁၃) တပ်နယ် တပ်ဖွဲ့ဝင်များ လက်နက်ကြီး ၃လုံး ရမ်းသန်းပစ်ခတ်ခဲ့ရာ ဒွယ်လိုးမြို့နယ် ကပိခီးကျေးရွာအတွင်း ကျရောက်ပြီး တစ်ဦးသေဆုံးကာ လေးဦး ဒဏ်ရာရခဲ့သည်ဟု တပ်မဟာ(၅)က ယနေ့ သတင်းထုတ်ပြန်သည်။
သေဆုံးခဲ့သူမှာ အသက် ၁၉နှစ်အရွယ်လူငယ်တစ်ဦးဖြစ်ပြီး ဒဏ်ရာရသူများထဲတွင် အသက် ၁၃နှစ်အရွယ် ကလေးတစ်ဦး၊ အမျိုးသမီးတစ်ဦး နှင့် အမျိုးသားနှစ်ဦး တို့ဖြစ်သည်ဟု ဖော်ပြသည်။ ထို့ပြင်အိမ် ၅လုံး ပျက်စီးခဲ့အိမ်မွေးတိရစ္ဆာန်အချို့ သေဆုံးခဲ့သည်။
အကြမ်းဖက်စစ်ကောင်စီတပ်သည် KNU တပ်မဟာ (၁)နယ်မြေအတွင်းရှိ ကျေးရွာများသို့လည်းလက်နက်ကြီးများ ရမ်းသန်းပစ်ခတ်ခဲ့ကြောင်း KNU ဗဟိုက ယနေ့ သတင်းထုတ်ပြန်သည်။
Public Service Announcement
အာဏာသိမ်းစစ်ကောင်စီ၊ ခမရ အမှတ်(၉)စခန်းမှ ဖေဖော်ဝါရီလ ၂၄ ရက် ညပိုင်း၌ လက်နက်ကြီးသုံးချက် ရမ်းသမ်းပစ်ခတ်ခဲ့ရာ KNU သထုံမြို့နယ် နောင်ကတုတ်အောက်ပိုင်း ကျေးရွာအတွင်း ကျရောက် ပေါက်ကွဲပြီး လူနေအိမ်တစ်လုံးနှင့် စာသင်ကျောင်း ထိခိုက်ပျက်စီးခဲ့ကြောင်း ဖော်ပြသည်။
ယင်းနေ့၌ပင် ပိန္နဲတော စကခ(၈) စခန်းမှ လက်နက် ကြီး လေးချက်ထပ်မံပစ်ခတ်ခဲ့ရာ ဒုံသမိချောင်း တစ်ဖက်ကမ်းတွင် သုံးလုံး၊ ပရစ်ခိုကျေးရွာအနီးတွင် တစ်လုံးကျရောက် ပေါက်ကွဲခဲ့ကြောင်း ထုတ်ပြန်သည်။အဆိုပါ ဖြစ်စဉ်တွင် လူနှင့် အဆောက်အဦများ ထိခိုက်မှုရှိမရှိ ဖော်ပြမထားပေ။
