စစ်ကိုင်းတိုင်း မင်းကင်းနှင့် ကနီမြို့နယ်ကြားတွင် စစ်ကားလေးစီးနှင့်အတူ စစ်ကောင်စီတပ်သားနှင့်ပျူစောထီး အင်အား၈၀ခန့်သည် ခြေလျင်စစ်ကြောင်းထွက်လာ ၍ ဒေသခံများလွတ်မြောက်ရာ ရှောင်ရှားကြရန် ကနီမြို့နယ်ပြည်သူ့ကာကွယ်ရေးတပ်ဖွဲ့ (၂) KPDF- 2 က ထုတ်ပြန်သည်။
အဆိုပါ စစ်ကောင်စီစစ်ကြောင်းသည် မင်းကင်းတောင်တွင်းဒေသမှ တက်လာခြင်းဖြစ်ပြီး မတ်လ ၃၁ရက် ညနေပိုင်းတွင် မုံရွာ-ယာကြီး- ကလေးဝလမ်းပိုင်း၊ မိုင်တိုင်အမှတ်(၆၇)သို့ ရောက်ရှိ၍ ညအိပ်ရပ်နားခဲ့သည်ဟု KPDF-2က ဆိုသည်။
မုံရွာ-ယာကြီး- ကလေးဝလမ်းပိုင်း မိုင်တိုင်အမှတ် (၅၈)၊ ကနီမြို့နယ်အပိုင် လာပို့ရွာအရှေ့တွင် စခန်းချထားသော ဆက်သွယ်ရေးတပ်သို့ ရိက္ခာပို့ရန် (သို့မဟုတ်)နယ်မြေစိုးမှုပြုလုပ်ရန် လာရောက်သည်ဟု KPDF- 2က ယူဆသည်။
လတ်တလောအခြေအနေအရ ဒေသခံများလွတ်မြောက်ရာသို့ ရှောင်ရှားရန်နှင့် ရပ်ဝေးခရီးသွားဧည့်သည်များအနေဖြင့် လတ်တလောကာလအတွင်း မလာရောက်ရန် အသိပေးသည်။
Public Service Announcement
“ကားလေးစီးအပါ စစ်အင်အားအရ ဆို စစ်ခ နဲ့ ပျူက ၁၅၀လောက်ရှိတာ။ကျွန်တော်တို့ကတော့ စောင့်ကြည့်နေဆဲပဲလို့ လောလောဆယ်ပြောပါရစေ”ဟု ကနီမြို့နယ်ပြည်သူ့ကာ ကွယ်ရေးတပ်ဖွဲ့ဝင်တစ်ဦးက People’s Springသို့ ပြောသည်။
မတ်လအတွင်းက ကနီနှင့် မင်းကင်းဒေသအတွင်း တပ်စွဲထားသည့် အကြမ်ဖက်စစ်အုပ်စုနှင့် ဒေသခံပြည်သူ့ကာကွယ်ရေးတပ်များ ထိတွေ့မှု ငါးကြိမ်ထက်မနည်းရှိခဲ့ကာ စစ်ကောင်စီတပ်တပ်သားနှင့် ပျူစောထီး ၂၀ကျော် သေဆုံးပြီး ရဲဘော်နှစ်ဦးဒဏ်ရာရရှိခဲ့သည်ဟု ထုတ်ပြန်ထားသည်။
