ဘုတလင်မြို့နယ်ရှိ ကူ​တော်ရဲစခန်းတိုက်ခိုက်ခံရပြီး ပြာကျ

စစ်ကိုင်းတိုင်း ဘုတလင်မြို့နယ်ရှိ ကူ​တော်ရဲစခန်းတိုက်ခိုက်ခံရပြီး ပြာကျပျက်စီးကာ ခြောက်လုံးပြူးတစ်လက်နှင့် ကျည်​ဘောက်အများအပြားကို ဒေသခံတော်လှန်ရေးအဖွဲ့ များက သိမ်းဆည်းရမိခဲ့ကြောင်း သတင်းရရှိသည်။

ကူတော်ရွာရဲစခန်းကို ယမန်နေ့(ဧပြီ ၈) ရက် ည ၉ နာရီခန့်တွင် ဒေသခံတော် လှန်ရေးအဖွဲ့များ ၀င်ရောက်စီးနင်းပြီး မီးရှို့ဖျက်စီးနိုင်ခဲ့ခြင်းဖြစ်သည်။

“ဟုတ်တယ်။ကျွန်တော်တို့ မီးရှို့ ပြာချခဲ့တာ။ လေကြောင်းပစ်ကူလာတဲ့အတွက် စခ အသေစာရင်း မသိရသေးဘူး။များတယ်လို့ပဲ ပြောပါရစေ ။ကျွန်တော်တို့ ပူးပေါင်း ပြည်သူ့တပ်ဖွဲ့ဘက်မှာလည်း ထိခိုက်မှုရှိတယ်။အကျ အနည်းငယ် ရှိတယ်”ဟု ယမန်နေ့ညက ကူတော်ရဲစခန်းဝင်ရောက်တိုက်ခိုက်ခဲ့သည့် ရဲဘော်တစ်ဦးက People’s Springသို့ ပြောသည်။

ဘုတလင်မြို့ခံတစ်ဦးကလည်း “ဘုတလင် မြို့မရဲစခန်းကို လက်နက်ကြီး တွေနဲ့အယောင်ပြ တိုက်ခိုက်တဲ့အချိန်မှာ တစ်ဖက်က ကူတော်ရွာ ရဲစခန်းကို ၀င်ရောက်စီးနင်းခဲ့တာ။အသေအဆုံးများတယ်။ရဲစခန်းမီးရှို့ခံရတဲ့အထဲမှာတင် အလောင်းသုံးလောင်းတွေ့ရတယ်လို့ သိရတယ်”ဟု ပြောသည်။

Public Service Announcement

ကူတော်ရဲစခန်း ဝင်ရောက်စီးနင်းခံရသည့်အတွက် အကြမ်းဖက်စစ်တပ်က တိုက်ခိုက်ရေး ရဟတ်ယာဥ်ဖြင့် ည ၁၂ နာရီခန့်ကစ၍ မိနစ် ၂၀ ကြာ လာရောက်ပစ်ခတ်ခဲ့သည်ဟု ၎င်းက ဆိုသည်။

ထို့အပြင် မုံရွာမြို့ရှိ အနောက်မြောက်တိုင်းစစ်ဌာနချုပ်(နမခ) မှ သံပြားကာ ကားနှစ်စီးဖြင့် လူ၊လက်နက်၊ရိက္ခာအပြည့်ဖြင့် ဘုတလင်မြို့သို့ အင်အား ဖြည့်တင်းရန် ယနေ့(ဧပြီ ၉ ရက်)နံနက် ၉ နာရီခန့်တွင် ထွက်ခွာသွားကြောင်း မုံရွာမြို့ နယ်သတင်းမှန်ပြန်ကြားရေးက အသိပေးထား သည်။

လက်ရှိတွင် ဘုတလင်မြို့အတွင်း စစ်အုပ်စုက လမ်းများပိတ်ဆို့ကာ ရွာချင်း ဆက်လမ်းများ ၌ပင် ယာဥ်ဖြတ်သန်းခွင့် ပိတ်ပင်ထားသည်ဟု ဒေသခံများက ဆိုသည်။