မန္တလေးတိုင်း၊ ပုဂံ၊ညောင်ဦးနှင့် နွားထိုးကြီးမြို့နယ်များတွင် အကြမ်းဖက်စစ်ကောင်စီ၏ ဟန်ပြအတုအယောင်သင်္ကြန်၌ စစ်ဆင်ရေးများပြုလုပ်မည်ဖြစ်၍ ပြည်သူများအနေဖြင့် ၎င်းတို့နှင့် ပါဝင်ပတ် သက်ခြင်းမပြုရန် ဒေသတွင်းပြည်သူ့ကာကွယ်ရေးအဖွဲ့များက မေတ္တာရပ်ခံ သတိပေးသည်။
ဟန်ပြသင်္ကြန်ကာလအတွင်း ပုဂံ၊ညောင်ဦးမြို့အတွင်း မြို့ပြစစ်ဆင်ရေးများ ပြုလုပ်မည်ဖြစ် ကြောင်း၊ ပုဂံညောင်ဦး မြို့သူမြို့သားများအနေဖြင့် အကြမ်းဖက်စစ်ကောင်စီတပ်များ၊ စစ်ကောင်စီထောက်တိုင်များ၊ စစ်ကောင်စီထောက်တိုင်များပိုင်ဆိုင်သော စားသောက်ဆိုင်၊ ဟိုတယ်၊ စတိုးဆိုင်များနှင့် အဝေးဆုံးမှာနေခြင်းဖြင့် ပါဝင်ကူညီပေးကြပါရန်၊ အကြိမ်ကြိမ်သတိပေးပြီးဖြစ်ကြောင်း၊ တားမြစ်သတိပေးထားသည့်ကြားမှ မလိုက်နာဘဲ တစ်စုံတစ်ခုဖြစ်ပါက အပြစ်မပြောကြရန် Bagan Ogre Force PDF အဖွဲ့က သတိပေးသည်။
“ယခုလို အချိန်အခါမျိုးသည် ပျော်ရပါးရမည့် အချိန်မဟုတ်ပါ။ အာဏာရူးတစ်သိုက်ကို အသက်နဲ့ရင်း တော်လှန်တိုက်ခိုက်နေသည့် အချိန်ဖြစ်သည်။ ပုဂံညောင်ဦးသို့ အပျော်အပါး ခရီးသွားလာနေကြသူများ ခင်ဗျားတို့ အသက်အန္တရာယ်ကို အာမခံမပေးပါ။ အခြေနေနဲ့ အချိန်အခါကို နားလည်ပါ။ ခင်ဗျားတို့အတွက်နဲ့ ကျွန်ုပ်တို့ မစ်ရှင်တွေ အပျက်အစီးခံမည်မဟုတ်ပါ။ လုပ်စရာရှိတာလုပ်မည်။ ဒလန်များ လူ့သက်တမ်းစေ့ နေချင်ရင် ကိုယ့်မိသားစုနဲ့ကိုယ် အေးဆေးနေပါ။ အာမချောင်ပါနဲ့။”ဟု Bagan Ogre Force PDF အဖွဲ့က ပြော သည်။
ထို့အပြင် ပုလင်းရွာ၊ အောင်ညဥ့်ရွာ၊ အင်တိုင်းရွာတို့မှ စစ်ကောင်စီသတင်းပေးသုံးဦးနှင့် မြို့နယ်လျှပ်စစ်ရုံးဝန်ထမ်းတစ်ဦးကိုလည်း Bagan Ogre Force PDF အဖွဲ့က သတိပေးခဲ့သည်။
Public Service Announcement
အလားတူ နွားထိုးကြီးမြို့နယ်တွင်လည်း သင်္ကြန်ကာလရောက်ရှိတော့မည်ဖြစ်သဖြင့် နွားထိုးကြီးမြို့နယ်ရှိ မိဘပြည်သူများအနေဖြင့် အကြမ်းဖက်စစ်ကောင်စီတပ်၏ ပျော်ပွဲ၊ရွှင်ပွဲများကျင်းပရာ နေရာများနှင့် ရေသဘင်ပွဲများကို သွားရောက်၍ ပျော်ပါးခြင်း၊ အကြမ်းဖက်စစ်ကောင်စီတပ်၏ အနီးတစ်ဝိုက်တွင်ရှိသော မည်သည့်နေရာကိုမဆို နေထိုင်ခြင်း၊ ပျော်ပါးခြင်း၊ အသံချဲ့စက်များကို ကျယ်လောင်စွာဖွင့်၍ မူးရူးကခုန်ခြင်းများ မပြုလုပ်ကြရန် အထူးသတိပေးကြောင်း၊ လာမည့်သင်္ကြန်ကာလသည် အကြမ်းဖက်စစ်ကောင်စီမှ ပြည်သူများကို လူသားဒိုင်းကာအဖြစ် အသုံးချ၍ အကြမ်းဖက်လုပ်ငန်းများ လုပ်ဆောင်မည်ဟု သတင်းရရှိသောကြောင့် အထူးဆင်ခြင်သွားလာနေထိုင်ကြရန် နွားထိုးကြီး PDF အဖွဲ့က သတိပေးသည်။
အကြမ်းဖက်စစ်ကောင်စီတပ်များရှိသောနေရာ မည်သည့်နေရာကိုမဆို အချိန်မရွေးတိုက်ခိုက်မှု ပြုလုပ်သွားမည်ဖြစ်သောကြောင့် ၎င်းတို့ရှိသောနေရာများကို ရှောင်ရှားကြပါရန် နွားထိုးကြီး PDFက မေတ္တာရပ်ခံသတိပေးသည်။
အကြမ်းဖက်စစ်ကောင်စီတပ်သည့် လာမည့်မြန်မာနှစ်သစ်ကူး သင်္ကြန်ကာလအား တိုင်းပြည်အေးချမ်းနေသယောင်ပြသရန် ရေကစားမဏ္ဍပ်များအား ဆောက်လုပ်နေပြီး သင်္ကြန်ပွဲကျင်းပရန် စီစဥ်နေသည်။
