စစ်ကိုင်းတိုင်း၊ မုံရွာ-ချောင်းဦးလမ်းပိုင်းရှိ ပြည်သူ့ကာ ကွယ်ရေးတပ်ဖွဲ့တစ်ဖွဲ့၏ ကင်းပွိုင့်နေရာတစ်ခု စီးနင်းခံရပြီး ဒေသခံPDF ငါးဦး ပစ်သတ်ခံရ၍ ကျဆုံးခဲ့ရကြောင်း မုံရွာသပိတ်စစ်ကြောင်းကော်မတီမှ ကိုသန်းကျော်ဦးက အတည်ပြုသည်။
ယနေ့ (ဧပြီ ၁၇ ရက်) နှစ်ဆန်းတစ်ရက်နေ့ နံနက်တွင် မုံရွာ-ချောင်းဦးလမ်းပိုင်းရှိ ဒေသခံPDF ကင်းပွိုင့်တစ်ခုအား ဒလန်သတင်းပေးမှုဖြင့် ပျူစောထီးများရောက်ရှိလာပြီး PDF ငါးဦးအား သတ်ဖြတ်သွားခြင်းဖြစ်ကြောင်း ကိုသန်းကျော်ဦးက ပြောသည်။
“သပိတ်စစ်ကြောင်းအပြီး ခဏအကြာမှာပဲ မုံရွာ – ချောင်းဦး လမ်းပိုင်းကို တာဝန်ယူကြီးကြပ်ဆောင်ရွက်နေတဲ့ Local PDF ကင်းပွိုင့်တစ်ခုကို တောပုရွာက ပျူစောထီးတွေက ဒလံသတင်းပေးမှုအရ PDF ပွိုင့်နေရာအတိအကျကိုသိပြီး ဝင်ရောက်ဖမ်းဆီးခဲ့ပါတယ်။PDF ငါးဦးအဖမ်းခံရပြီးတော့ ချက်ချင်းပဲ ပျူစောထီးတွေက ရက်ရက်စက်စက်ပစ်သတ်ခဲ့ပါတယ်”ဟု ကိုသန်းကျော်ဦးက ပြောသည်။
မုံရွာ – မန္တလေးလမ်းမကြီးပေါ်တွင် မုံရွာပင်မ သပိတ်စစ်ကြောင်းသည် PDFများနှင့်အတူ လူထုအင်အားအများအပြားဖြင့် မိနစ် ၂၀ကြာ စစ်ကောင်စီကို ဆန့်ကျင်ကြောင်း ချီတက်သပိတ်မှောက် ဆန္ဒပြခဲ့ကြသည်။
Public Service Announcement
အဆိုပါ သပိတ်စစ်ကြောင်းသည် စကစ၊ ပျူများနှင့် ထိတွေ့မှု တစ်စုံတစ်ရာမှ မဖြစ်ခဲ့သလို သပိတ်စစ်ကြောင်းလည်း အောင်မြင်စွာ ပြီးဆုံးခဲ့ပြီး ဘေးအန္တရာယ်ကင်းစွာ လူစုခွဲနိုင်ခဲ့ကြောင်း၊ သပိတ်စစ်ကြောင်းတွင် လိုက်ပါလာသည့် မိဘပြည်သူများနှင့် PDF များ အန္တရာယ်မရှိခဲ့ကြောင်း မုံရွာပင်မသပိတ်စစ်ကြောင်းကော်မတီမှ ကိုသန်းကျော်ဦးက ပြောသည်။
