စစ်ကိုင်းတိုင်း၊ ဒီပဲယင်းမြို့နယ်တွင် အကြမ်းဖက်စစ်ကောင်စီတပ်က သက်ကြီးရွယ်အိုနှစ်ဦးအား ပစ်ခတ်သတ်ဖြတ်သွားကာ ကျေးရွာတစ်ရွာကိုလည်း မီးရှို့ဖျက်ဆီးနေကြောင်း ဒေသခံများက ပြောသည်။
ယနေ့( ဧပြီလ ၂ ၀ ရက်နေ့) နံနက်သုံးနာရီခန့်အချိန်က အကြမ်းဖက်စစ်ကောင်စီတပ်သည် ဒီပဲယင်းမြို့နယ် အရှေ့ခြမ်း မူးခံတွင်းကျေးရွာသို့ သုံးနေရာမှ ဝင်ရောက်လာပြီး အသက် (၅၀) ကျော်နှင့် အသက်(၆၀)ကျော်ပြည်သူနှစ်ဦးအားပစ်သတ်သွားကြောင်းဒေသခံများကပြောသည်။ထို့အပြင် မူးခံတွင်းကျေးရွာအနီးရှိ ညောင်လှကျေးရွာကိုပါ ဝင်ရောက် မီးရှို့ဖျက်ဆီးသောကြောင့် ပြည်သူ့နေအိမ်များစွာ ဆုံးရှုံးပျက်စီးနိုင်ကြောင်း ဒီပဲယင်းဒေသခံများက ပြောသည်။
“နေရာ သုံးနေရာခွဲပြီး မီးရှို့ဖျက်ဆီးနေတာလို့ သိရပါတယ်။ မီးခိုးလုံးတွေအဝေးကကို မြင်နေရတယ်”ဟုဒီပဲယင်းနယ်ခံတစ်ဦးက ပြောသည်။
ညောင်လှကျေးရွာနှင့် တစ်ဆက်တည်းတည်ရှိသည့် ဝဲကြီး၊ ကုန်းကြီး၊ သရက်တော၊ သပြေသာ စသည့် ကျေးရွာများမှ ပြည်သူများလည်း ဘေးလွတ်ရာတိမ်းရှောင်နေရကြောင်း ဒေသခံများက ပြောသည်။
Public Service Announcement
ဧပြီလ ၁၉ ရက်နေ့ နံနက်ပိုင်းကလည်း ဒီပဲယင်းမြို့နယ်၊ စိုင်ပြင်မြို့ပေါ်ရှိ ပြည်သူ့နေအိမ် (၃)လုံးနှင့် ဆိုင်ကယ်ဆယ်စီးခန့်ကိုလည်းမီးရှို့ဖျက်ဆီးသွားကြောင်း၊ မဲအိုးကျေးရွာကိုလည်း စစ်ကြောင်းထိုးဝင်ရောက်ပြီး သုံးကြိမ်တိုင် မီးရှို့ဖျက်ဆီးသည့်အတွက် နေအိမ် (၁၅)လုံးခန့် မီးလောင်ဆုံးရှုံးကာ စပါးတိုက်များ၊ လယ်ယာသုံးစက်ပစ္စည်းများ မီးလောင်ဆုံးရှုံးခဲ့ရကြောင်း ဒေသခံများက ပြောသည်။
