ကရင်အမျိုးသားအစည်းအရုံး(KNU) သထုံခရိုင် ကျိုက်ထိုမြို့နယ်ရှိ စစ်ကောင်စီကင်းစခန်းတစ်ခုကို ယမန်နေ့က မီးရှို့ဖျက်ဆီးခဲ့ပြီး ကျည်ဆံနှင့် စစ်အသုံးအဆောင်ပစ္စည်းများရရှိခဲ့ကြောင်း KNU တပ်မဟာ(၁)တာဝန်ရှိသူတစ်ဦးက ပြောသည်။
မေလ ၃ရက် နံနက်ပိုင်းက ကျိုက်ထိုမြို့နယ် အထက် အင်္ဂဘိုကျေးရွာရှိ စစ်ကောင်စီ ကင်းပုန်းဝပ် တပ်စွဲထားသည့် စခန်းတစ်ခုအား KNU တပ်မဟာ(၁)၊ တပ်ရင်း(၃) နှင့် ပူးပေါင်းတပ်ဖွဲ့များက သွားရောက်ပစ်ခတ်တိုက်ခိုက်ခဲ့ကြောင်း၊ ယင်းစခန်းရှိ စစ်ကောင်စီတပ်ဖွဲ့ဝင်များ ထွက်ပြေးသွား၍ စခန်းကို မီးရှို့ဖျက်ဆီးခဲ့ကြောင်း Kyaikhto Revolution and Information Network(KRIN)က ထုတ်ပြန်ထားသည်။
“ကင်းပုန်းဝပ်တဲ့နေရာမှာ သူတို့က ပစ္စည်းတွေလာဝှက်ထားတဲ့အတွက် ကျွန်တော်တို့ အဖွဲ့ကနေ သွားရှင်းပြီးတော့ ပစ္စည်းသွားသိမ်းပြီး မီးရှို့လိုက်တာ။ ကျည်ဆံတွေရတယ် ပြီးရင် ယူနီဖောင်းတွေ ရတယ်”ဟု KNU တပ်မဟာ(၁) တာဝန်ရှိသူက ပြောသည်။
KNU သထုံခရိုင် အတွင်းရှိ ပူးပေါင်းတပ်ဖွဲ့များအနေဖြင့် သထုံ၊ ဘီးလင်းမြို့နယ် များရှိ စစ်ကောင်စီတပ်စခန်းနှင့် ကင်းစခန်းများကို သွားရောက်ပစ်ခတ်တိုက်ခိုက်မှုများ မကြာခဏ လုပ်ဆောင်လျက်ရှိသည်။
Public Service Announcement
