စစ်ကောင်စီရိက္ခာများသယ်ဆောင်လာသော ရေယာဥ်သုံးစင်းကို ပြည်သူ့ကာကွယ်ရေးတပ်များ ဖမ်းဆီးပြီး ရိက္ခာများသိမ်းဆည်း

စစ်ကောင်စီအတွက်ရိက္ခာများ ကုန်တင်ရေယာဥ်သုံးစင်းဖြင့် ချင်းတွင်းမြစ်ကြောင်းအတိုင်း သယ်ဆောင်လာစဥ် ပြည်သူ့ကာကွယ်ရေးမဟာမိတ်ဖွဲ့က တားဆီးစစ်ဆေးပြီး ရိက္ခာအများအပြားကို သိမ်းဆည်းနိုင်ခဲ့သည်။

မုံရွာမှခန္တီးမြို့သို့ ထွက်ခွာလာသော ကုန်တင်ရေယာဥ်သုံးစင်းကို နဂါးညီနောင်အထူးတပ်ဖွဲ့ DBTF နှင့် မဟာမိတ်အဖွဲ့က ယနေ့(မေလ ၆ရက်)တွင် တားဆီးစစ်ဆေးပြီး စစ်ကောင်စီ၏ ရိက္ခာများကို သိမ်းဆည်းလိုက်ခြင်းဖြစ်သည်။

ချင်းတွင်းမြစ်ရိုးတစ်လျှောက် နယ်မြေရှင်းလင်းရေးလုပ်ဆောင်နေစဥ်အတွင်း ယင်းကဲ့သို့ စစ်ဆေးသိမ်းဆည်းနိုင်ခြင်းဖြစ်ပြီး “ကုန်တင်အမြန်ယာဥ် သုံးစင်းမှာ မအလရဲ့လက်ပါးစေများ တပ်စွဲထားသောကနီမြို့သို့ ရိက္ခာများသွားရောက်ထောက်ပံ့တယ်လို့ တပ်တွင်းသတင်းပေးပို့ချက်အရ ကျွန်တော်တို့ DBTFအဖွဲ့နှင့်မဟာမိတ်ညီနောင်အဖွဲ့များ ပူးပေါင်းပီးအချိန်မှီသွားရောက်ဖမ်းဆီးထိမ်းသိမ်းနိုင်ခဲ့ပါတယ်”ဟု DBTFက ထုတ်ပြန်သည်။

ဆီပုံးနှင့် ဆန်အိတ်များ၊ စစ်ကောင်စီထုတ်အရက်ပုလင်းများကို ပြည်သူ့ကာကွယ်ရေးမဟာမိတ်ဖွဲ့က သိမ်းဆည်းနိုင်ခဲ့သည်။

Public Service Announcement

တပ်တွင်းသတင်းပေးမှုသည် ပြည်သူ့ကာကွယ်ရေးတပ်ဖွဲ့များအတွက် အလွန်အသုံးဝင်နေပြီး ယနေ့ နံနက်ပိုင်းကလည်း ပုလဲမြို့နယ်တွင် စစ်ကောင်စီနှင့် ပျူစောထီးများလာရောက်မည်ဟု တပ်တွင်း အတိအကျသတင်းပေးမှုဖြင့် ပြည်သူ့ကာကွယ်ရေးအဖွဲ့က မိုင်းခွဲတိုက်ခိုက်နိုင်ခဲ့သည်။

တပ်တွင်းပေးသည့်သတင်းကြောင့် စစ်ကောင်စီနှင့် ပျူစောထီးပူးပေါင်းအဖွဲ့မှ နှစ်ဦးကို သုတ်သင်ရှင်းလင်းနိုင်ခဲ့ကြောင်း ကျားသစ်နက်ပြောက်ကျားတပ်ဖွဲ့က ထုတ်ပြန်ထားသည်။