ဧရာဝတီတိုင်း ဟင်္သာတမြို့နယ် ယုန်သလင်းကျေးရွာအထက်တန်းကျောင်း ဗုံးပေါက်ကွဲမှုမှာ တော်လှန်ရေး များနှင့် လုံးဝမပတ်သက်ဘဲ PDFများနှင့် လူထုကြား သွေးခွဲရန် စစ်ကောင်စီက ပြုလုပ်ခြင်းဟု ဟင်္သာတပြည်သူ့ကာကွယ်ရေးအဖွဲ့က ထုတ်ပြန်သည်။
ဟင်္သာတမြို့နယ် ယုန့်သလင်းတိုက်နယ် ယုန်သလင်းကျေးရွာအထက်တန်းကျောင်းဝန်းအတွင်း ဇွန်လ ၁ရက် ညက ဗုံးပေါက်ကွဲခဲ့ခြင်းဖြစ်သည်။
ပေါက်ကွဲမှုကြောင့် ထိခိုက်ပျက်စီးမှုမရှ်ိခဲ့သော်လည်း ယင်းလုပ်ရပ်သည် PDFများ၏ လုပ်ရပ်ဖြစ်ကြောင်း စစ်ကောင်စီက သတင်းမှား လွှင့်ခဲ့သည်။
အဆိုပါ ဗုံးပေါက်ကွဲမှုသည်” ဟင်္သာတမြို့နယ် ပြည်သူ့ကာကွယ်ရေးအဖွဲ့မှလည်းကောင်း၊ မိမိတို့နှင့် မဟာမိတ်ဖြစ်သော တော်လှန်ရေး အင်အားစုများမှလည်းကောင်း၊ လုံးဝ လုပ်ဆောင်ခဲ့ခြင်းမဟုတ်ကြောင်းပြည်သူများအား အသိပေးထုတ်ပြန်လိုက်ပါသည်”ဟု ဟင်္သာတမြို့နယ် ပြည်သူ့ကာကွယ်ရေးအဖွဲ့က ထုတ်ပြန်သည်။
Public Service Announcement
ဇွန်လ၂ ရက်တွင် ထုတ်ပြန်ခြင်းဖြစ်ပြီး အပြစ်မဲ့ပြည်သူများ ထိခိုက်မည့် ထိုကဲ့သို့သောလုပ်ရပ်များအား လုပ်ဆောင်မည် မဟုတ်ကြောင်းနှင့် NUGအစိုးရမှ ချမှတ်ထားသည့် မူဝါဒလမ်းစဉ်များအတိုင်း အစဉ် တစိုက် လိုက်နာဆောင်ရွက်သွားမည်ဖြစ်ကြောင်း လူထုအား အသိပေးသည်။
ပြည်သူများနှင့် တော်လှန်ရေးအင်အားစုများအား သွေးခွဲသည့် အထက်ပါလုပ်ရပ်များအား အကြမ်းဖက်စစ်ကောင်စီနှင့်၎င်း၏ လက်အောက်ခံ အဖွဲ့အစည်းများမှ ထပ်မံ ပြုလုပ်လာနိုင်ပါသဖြင့် မြို့ရွာနေပြည်သူများအနေဖြင့် အထူးဂရုပြုနေထိုင်ကြပါရန်လည်း ဟင်္သာတမြို့နယ် ပြည်သူ့ကာကွယ်ရေးအဖွဲ့က ထပ်မံသတိပေးထားသည်။
မေလ ၃၁ရက်ကလည်း နောင်ချိုမြို့နယ် ပညာရေးမှူးရုံး ဗုံးပေါက်ကွဲခဲ့ရာ ကျောင်းအုပ်ဆရာမတစ်ဦး သေဆုံးပြီး ရှစ်ဦးဒဏ်ရာရခဲ့သည်။ အဆိုပါ ဗုံးပေါက်ကွဲမှုသည် PDFများနှင့် လုံးဝမပတ်သက်ဘဲ စစ်ကောင်စီ၏ လက်ချက်သာဖြစ်ကြောင်း မြို့ခံကျောင်းဆရာမများနှင့် ပညာရေးဝန်ထမ်းများက ပြောသည်။
