ယင်းမာပင်တွင် စစ်​ကောင်စီတပ် လက်နက်ကြီးဖြင့်ပစ်ခတ်၍ ​ကျေးရွာ​လေးရွာထက်မနည်း အ​ရေး​ပေါ် စစ်​ဘေး​ရှောင်​နေရ

အကြမ်းဖက်စစ်ကောင်စီတပ်က ယင်းမာပင်မြို့ပေါ်မှ လက်နက်ကြီးများဖြင့် ပစ်ခတ်သောကြောင့် ကျေးရွာလေးရွာထက်မနည်း အရေးပေါ် စစ်ဘေးရှောင်နေရကြောင်း ဒေသခံသတင်းရင်းမြစ်များက People’s Springသို့ ပြောသည်။

ယမန်နေ့ည ၁၀နာရီကစ၍ ယနေ့(ဇွန် ၂၁ ရက်)နံနက် ၆ နာရီဝန်းကျင်ထိ စစ်ကောင်စီတပ်က ယင်းမာပင်မြို့ပေါ်မှ လက်နက်ကြီးများဖြင့် ရမ်းသမ်းပစ်ခတ်နေသည်ဟု ဆိုသည်။

“မြို့ပေါ် ကျေးရွာက အမျိုးသားတစ်ဦး လက်နက်ကြီးမှန်သွားတယ်ဗျ။ပြီးတော့ ဒီမနက်သုံးနာရီလောက်မှာ ထပ်ပစ်လို့ မြို့ပေါ် ​၊ပြောင်းပြာ ၊နုံးကြီး၊ ရွာထောင်ရွာက လူတွေ အကုန်ရွှေ့နေရတယ်”ဟု ဒေသခံတစ်ဦးက ရှင်းပြသည်။

လက်ရှိစစ်ဘေးရှောင်နေရသော ကျေးရွာများသည် ယင်းမာပင်မြို့နှင့် နီးစပ်ပြီး မြို့၏ အနောက်မြောက်ဘက်တွင်ရှိကြောင်းလည်း ဗိုလ်သူရိန်(ယင်းမာပင်)က ဆိုသည်။

Public Service Announcement

“တိုက်ပွဲလည်းမရှိဘူး အကြောင်းမဲ့သက်သက် ပစ်ခတ်နေတာ။လက်ရှိတော့ ယင်းမာပင်ထဲ မှာ စခက အင်အားတိုးထားတယ်။စုစုပေါင်း စစ်ကားအစီး ၇၀လောက်ဝင်နေတယ်”ဟု ၎င်းက ပြောသည်။