KNU တပ်မဟာ ၆ ထိန်းချုပ်နယ်မြေထဲက မြဝတီ− ဝေါ်လေ ကားလမ်းတလျှောက်မှာ စစ်ကောင်စီတပ်က စစ်အင်အားတိုးချဲ့လာတာတွေကြောင့် Cobra စစ်ကြောင်းနဲ့ ထိတွေ့ပစ်ခတ်မှု တွေ ဆက်လက်ဖြစ်ပွားနေတယ်လို့သိရပါတယ်။
ဇူလိုင်လ ၇ ရက်က မြဝတီ − ဝေါ်လေ ကားလမ်း ပိုင်းရဲ့ သုံးထပ်ကွေ့ မှာ စစ်ကောင်စီတပ်နဲ့ Cobra စစ်ကြောင်းတို့ ကြား ထိတွေ့ တိုက်ခိုက်မှုဖြစ်ခဲ့ပါသေးတယ်။
အဲဒီထိတွေ့မှုမှာ စစ်ကောင်စီဘက်က အကျအဆုံးရှိခဲ့ပြီး ဗိုလ်ကြီးတစ်ဦး၊ ဆေးမှူး အပါအဝင် အလောင်း ငါးလောင်းကို အတည်ပြုတွေ့ရှိခဲ့ရတယ်လို့ Cobra စစ်ကြောင်းကထုတ်ပြန်ထားပါတယ်။
ဒီနေ့မှာလည်း မြဝတီ-ဝေါ်လေ ကားလမ်းပေါ်မှာ ထိတွေ့ပစ်ခတ်မှုတွေ ရှိခဲ့ပါတယ်။
Public Service Announcement
စစ်ကောင်စီတပ်က တပ်အင်အားတိုးချဲ့ပြီး စစ်ရေးလှုပ်ရှားမှု ပိုမိုပြုလုပ်လာပါက တိုက်ပွဲတွေပိုမိုပြင်းထန်လာနိုင်တယ်လို့ Cobra စစ်ကြောင်း ပြောခွင့်ရသူက ဆိုပါတယ်။
“အခုလက်ရှိမှာတော့ ထိတွေ့မှုအနည်းငယ်တော့ ဖြစ်ထားပြီးပါပြီး ၊ အခုလက်ရှိမှာလည်း ဖြစ်နေဆဲပါ၊ မြဝတီ-ဝေါ်လေလမ်းတလျှောက်မှာတော့ နောက်ပိုင်းကာလတွေမှာတော့ တိုက်ပွဲတွေပိုပြီးပြင်းထန်လာနိုင်မယ်လို့ ပြောလို့ရပါတယ်”လို့ Cobra စစ်ကြောင်းပြောခွင့်ရသူကပြောပါတယ်။
အခုလို စစ်ကောင်စီတပ်က မြဝတီ-ဝေါ်လေ ကားလမ်းတလျှောက်မှာ တပ်အင်အားတွေတိုးချဲ့ပြီး စစ်ရေးလှုပ်ရှားလာတာဟာ နယ်မြေရှင်းလင်းရေးလုပ်ဖို့အတွက်ဖြစ်တယ်လို့ ယူဆရလို့ရကြောင်း Cobra စစ်ကြောင်းက သုံးသပ်ထားပါတယ်။
“သူတို့မှာတော့ စစ်ရေးရည်မှန်းချက်ကတော့ သူတို့ရှိမှာပေါ့နော်။ ဒါပေမဲ့ ကျနော်တို့ယူဆတာကတော့ နယ်မြေရှင်းလင်းရေးလုပ်တဲ့ ရည်မှန်းချက်လို့ ယူဆရပါတယ်ဗျ။ ဥကရစ်ထကတော့ ဘာကြောင့်လည်းဆိုတော့ ဥကရစ်ထနေရာက သူတို့စစ်ကူတွေရောက်ရှိနေပြီပေါ့လေ။ ဒါကြောင့်မို့လို့ ဒီဘက်က ဖလူးဘက်က တက်လာတာဖြစ်တဲ့အတွက်မို့ ဒါနယ်မြေရှင်းလင်းရေးလုပ်တဲ့ ရည်ရွယ်ချက်လို့ ယူဆလို့ရပါတယ်ဗျ “လို့Cobra စစ်ကြောင်းက ပြောခွင့်ရသူကဆိုပါတယ်။
မနေ့က မနက်ပိုင်း ၄ နာရီလောက်မှာ လေးကေကော်ဒေသမှာရှိတဲ့ Cobra စစ်ကြောင်း လုံခြုံရေယူထားတဲ့ တောင်ကုန်းကို စစ်ကောင်စီတပ် လေကြောင်းကနေ တိုက်ခိုက်မှုရှိခဲ့တယ်လို့သိရပါတယ်။
