‘နန်းထိုက်အောင်စစ်ဆင်ရေး’အဖြစ် ရန်ကုန်မြို့ မြောက်ဒဂုံမြို့နယ် (၄၂) ရပ်ကွက်ရှိ စစ်ကောင်စီလက်အောက်ခံ အုပ်ချုပ်ရေးမှူးရုံးကို ဗုံးခွဲတိုက်ခိုက်ခဲ့ကြောင်း Yangon Federal Army – YFA က သြဂုတ် ၁၁ရက် ရက်စွဲဖြင့် ထုတ်ပြန်သည်။
သြဂုတ် ၁၀ရက် နေ့လယ် ၃ နာရီခန့်က မြောက်ဒဂုံ (၄၂)ရပ်ကွက် သခင်အုန်းဖေကြီးလမ်းပေါ်ရှိ ရပ်ကွက်အုပ်ချုပ်ရေးမှူးရုံးကို ဗုံးဖြင့်ဖောက်ခွဲတိုက်ခိုက်ခဲ့ခြင်းဖြစ်ပြီး စစ်ကောင်စီတပ်မှ ထိခိုက်မှုရှိနိုင်ကြောင်း ဖော်ပြသည်။
အဆိုပါ စစ်ကောင်စီလက်အောက်ခံ အုပ်ချုပ်ရေးမှူးရုံးသည် ဧည့်စာရင်းကိစ္စအပါအဝင် ပြည်သူအပေါ် မတရားငွေကြေးကောက်ခံနေကြောင်း တိုင်ကြားလာတဲ့အပေါ် တိုက်ခိုက်ခဲ့တာဖြစ်ပြီး တော်လှန်ရေးရဲဘော်များ အထိအခိုက်မရှိ အန္တရာယ်ကင်းစွာ ဆုတ်ခွာနိုင်ခဲ့သည်ဟု ဆိုသည်။
“ရန်ကုန် ပြည်သူများ အတွက် ကျွန်တော်တို့ Yangon Federal Army အနေဖြင့် အမြဲတည်ရှိနေပါတယ်”ဟု YFA က အသိပေးသည်။
Public Service Announcement
နောက်နောင်တွင်လည်း ပြည်သူလူထုအပေါ် မတရားငွေကြေးကောက်ခံသော စစ်ကောင်စီထောက်တိုင် အုပ် ချုပ်ရေးရုံးများနှင့် အလိုတော်ရိများ၏ အသက်ကို အာမခံနိုင်မည်မဟုတ်ကြောင်း YFAက သတိပေးထားသည်။
ရန်ကုန်တိုင်းစစ်ဒေသခွဲ၏ ‘နန်းထိုက်အောင်စစ်ဆင်ရေး’ကို ပုံစံမျိုးစုံဖြင့် ပုံဖော်လှုပ်ရှားလျှက်ရှိရာ ယမန်နေ့(သြဂုတ် ၁၁)ကလည်း ရွှေပြည်သူမြို့နယ် (၇)ရပ်ကွက်နှင့် (၉) ရပ်ကွက်တို့တွင် စစ်ကောင်စီလက်အောက်ခံအုပ်ချုပ်ရေးအဖွဲ့နှင့် အုပ်ချုပ်ရေးရုံးတို့ကို တော်လှန်ရေးတပ်ဖွဲ့ဝင်များက ဖောက်ခွဲတိုက်ခိုက်ခဲ့သေးသည်။
