မကွေးတိုင်း၊ ပေါက်မြို့နယ်တွင် စစ်ကောင်စီတပ်နှင့်ပျူစောထီးများအား ပေါက်နှင့်မြိုင်ဒေသတွင်း ပြည်သူ့ကာကွယ်ရေးအဖွဲ့များက ပူးပေါင်းမိုင်းဆွဲ တိုက်ခိုက်ရာ သေဆုံးထိခိုက်မှုများရှိကြောင်း မြိုင်မြို့နယ်ပြည်သူ့ကာကွယ်ရေး တပ်ဖွဲ့က သတင်းထုတ်ပြန်သည်။
ယနေ့ (သြဂုတ် ၁၄ရက်) ညနေ ၄ နာရီ ၅၀မိနစ်ခန့်က မြိုင်နယ်တောင်ပိုင်းအား စစ်ကြောင်းထိုး လာသော စစ်ကောင်စီတပ်နှင့် ပျူစောထီးများအား ပေါက်မြို့နယ်၊ ကန်သစ်ရွာနှင့် ထန်းပေါက်ကုန်း ရွာကြားတွင် မိုင်း ၁၁လုံးဖြင့် တိုက်ခိုက်ခဲ့ရာ အကြမ်းဖက်စစ်သားနှင့်ပျူ လေးဦးသေဆုံးပြီး နှစ်ဦး ထိခိုက်ဒဏ်ရာရရှိသွားကြောင်း မြိုင် (ပကဖ)၏ ထုတ်ပြန်ချက်တွင် ဖော်ပြသည်။
အဆိုပါဖြစ်စဥ်တွင် မြိုင်မြို့နယ်ပြည်သူ့ကာကွယ်ရေးတပ်ဖွဲ့သည် ပေါက်ဒေသခံ ကာကွယ်ရေးအဖွဲ့ များဖြင့် ပူးပေါင်းကာ တိုက်ခိုက်ခဲ့ခြင်းဖြစ်ကြောင်း မြိုင်(ပကဖ)က အသိပေးသည်။
ဖြစ်စဥ်နှင့်ပတ်သက်ပြီး မြိုင်(ပကဖ)အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
Public Service Announcement
စစ်ကောင်စီတပ်၏ ထိခိုက်သေဆုံးမှုအခြေအနေနှင့်ပတ်သက်၍ People’s Springက သီးခြားအတည်ပြုနိုင်ခြင်းမရှိသေးပေ။
စစ်ကောင်စီတပ်သည် သြဂုတ် ၁၂ရက် နံနက်ပိုင်းက ပေါက်မြို့နယ်၊ ရှားစေး ချက်ရွာကို ဝင်ရောက် မီးရှို့ဖျက်ဆီးခဲ့၍ အိမ်ခြေ ၂၀ ခန့် မီးလောင်ဆုံးရှုံးခဲ့ပြီး ပြည်သူတစ်ဦး သတ်ဖြတ်ခံခဲ့ရကြောင်း ဒေသခံများက ပြောသည်။
