ကချင်လက်နက်ကိုင်အဖွဲ့(KIA) တပ်မဟာ(၆)၊ တပ်ရင်း (၃၆)နယ်မြေ ရှမ်းပြည်နယ် မုံးကိုးဒေသ၌ ကိုးကန့်လက်နက်ကိုင်အဖွဲ့(MNDAA)နှင့် စစ်ကောင်စီတပ်တို့ တိုက်ပွဲများ ဆက်တိုက်ဖြစ်ပွားနေ၍ ဒေသခံပြည်သူများ အခက်အခဲကြုံနေကြရကြောင်း KIA သတင်းနှင့် ပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောကြားသည်။
KIA နယ်မြေများအတွင်း လတ်တလော စစ်ရေးအခြေ အနေများကို မေးမြန်းရာ ပြီးခဲ့သည့် ရက်ပိုင်းက ပူတာအိုမြို့နယ်၌ တိုက်ပွဲဖြစ်ပွားခဲ့ကြောင်း၊ ရှမ်းမြောက် မုံးကိုးဒေသ၌ ကိုးကန့်အဖွဲ့နှင့် စစ်ကောင်စီအကြား တိုက်ပွဲဖြစ်ပွားလျက်ရှိကြောင်း ၎င်းက ပြောသည်။
“အဲဒီဟာက ကျွန်တော်တို့ တပ်မဟာ(၆) တပ်ရင်း ၃၆နယ်မြေမှာ ဖြစ်ပါတယ်။ ကိုးကန့် လက်နက်ကိုင် အဖွဲ့တွေလည်း ကျွန်တော်တို့ နယ်မြေမှာ နေပြီး တိုက်ပွဲဖြစ်တာတွေရှိပါတယ် အဲဒီမှာတိုက်ပွဲဖြစ်တော့ ပြည်သူလူထုအတွက်လည်း စစ်ဘေးရှောင်ရတာရှိပါတယ်။ အဲဒီမှာတော့ ကျွန်တော်တို့ ကချင်ပြည်သူလူ ထုတွေများပါတယ်။ အဲဒီတော့ မိုးတွင်းအချိန်ကာလလည်းဖြစ်နေတယ်။ နောက်ကိုဗစ်ရောဂါက လည်းတော်တော်လေး ကူးစက်ပြန့်နှံ့နေတဲ့ ဆိုးဆိုးရွားရွားဖြစ်နေတဲ့ အချိန်လည်း ဖြစ်ပါတယ်”ဟု ဗိုလ်မှူးကြီးနော်ဘူက ပြော သည်။
တိုက်ပွဲများပြင်းထန်စွာ ဖြစ်ပွားလာသည်နှင့်အမျှ ပြည်သူလူထုများ ဒုက္ခပိုမိုကြုံတွေ့ကြရမည်ဖြစ်ကြော်ငး ၎င်းက ဆိုသည်။
Public Service Announcement
ကိုးကန့်လက်နက်ကိုင်အဖွဲ့၏ ဩဂုတ် ၂၃ရက် ထုတ်ပြန်ချက်တွင် စစ်ကောင်စီ၏ ကျူးကျော်ရန်စမှုကြောင့် ဒေသတွင်း တိုက်ပွဲများဖြစ်ပွားလျက်ရှိကြောင်း၊ လက်ရှိတွင် မုံးကိုးခရိုင်ကျေးရွာအချို့၏ စားနပ်ရိက္ခာလမ်း ကြောင်းကို စစ်ကောင်စီက ဖြတ်တောက်ထား၍ ဒေသခံများ စားနပ်ရိက္ခာအခက်အခဲ ဖြစ်ပွားလျက်ရှိကြောင်း ဖော်ပြထားသည်။
ကိုးကန့်လက်နက်ကိုင်အဖွဲ့နှင့် စစ်ကောင်စီတပ်တို့သည် ဇွန်လလယ်က ကွတ်ခိုင်မြို့နယ်အတွင်း တိုက်ပွဲများဖြစ်ပွားခဲ့ပြီး ဇူလိုင်လလယ်မှစ၍ မူဆယ်မြို့နယ် မုန်းကိုးဒေသနှင့် ပန်ဆိုင်းဒေသတို့၌ တိုက်ပွဲများ မကြာခဏ ဖြစ်ပွားလျက်ရှိသည်။
