စစ်ကိုင်းတိုင်း၊ ဝက်လက်မြို့နယ်၊ ရွှေဘို-မန္တလေးလမ်းမကြီးပေါ်ရှိ လှတောရဲစခန်း၌ တပ်စွဲထားသော စစ်ကောင်စီတပ်အား ဒေသတွင်းမဟာမိတ်အဖွဲ့များက ၃ ရက်အတွင်း နှစ်ကြိမ်တိုက်ခိုက်ခဲ့ရာ ထိခိုက်သေဆုံးမှုများရှိကြောင်း မုံရွာခရိုင်ပြည်သူ့ကာကွယ်ရေးတပ်မတော် Chindwin Attack Force ၏ ပြန်ကြားရေးတာဝန်ခံက ပြောသည်။
စက်တင်ဘာလ ၂၇ ရက်နေ့ည ၁၀ နာရီမှ ၁၁ နာရီအတွင်း ဝက်လက်မြို့နယ်၊ လှတောကျေးရွာရဲစခန်းဝင်းအတွင်း တပ်စွဲထားသော စစ်ကောင်စီတပ်အား မဟာမိတ်ပူးပေါင်းအဖွဲ့များက ၆၀ မမ လက်နက်ကြီးများဖြင့် ဝိုင်းဝန်းပစ်ခတ်တိုက်ခိုက်ခဲ့ကြောင်း၊ မဟာမိတ်တပ်များ အထိအခိုက်မရှိ ဆုတ်ခွာနိုင်ခဲ့ပြီး စစ်ကောင်စီဘက်က ၄ ဦးသေဆုံးကာ ၇ ဦးခန့် ထိခိုက်ဒဏ်ရာများ ရရှိသွားကြောင်း Chindwin Attack Force၏ ပြန်ကြားရေး တာဝန်ခံက ပြောသည်။
“ပြန်မပစ်ဘူးဗျ ။စခန်းထဲမှာတော့ဆူညံနေတာပဲ ။ ရန်သူသေတာကိုတော့ တပ်တွင်းသတင်းပေးကတစ်ဆင့်သိရတာပါ” ဟု အထက်ပါ ပြန်ကြားရေးတာဝန်ခံကပြောသည်။
စစ်ကောင်စီတပ်မှ သေဆုံးဒဏ်ရာ ရမှု အခြအနေကို People’s Spring က သီးခြားအတည်မပြုနိုင်ပါ။
Public Service Announcement
အဆိုပါစစ်ဆင်ရေးအား မုံရွာခရိုင်ပြည်သူ့ကာကွယ်ရေးတပ်မတော် Chindwin Attack Force တပ်ရင်း ၃၊ တပ်ခွဲ ၃၊ ဂဠုန်နက် PDF၊ ကျားသစ်နက် ပြည်သူ့ကာကွယ်ရေးတပ်ဖွဲ့၊ ဒေါင်းဧကရာဇ် ပြည်သူ့ကာကွယ်ရေးတပ်ဖွဲ့၊ သိဒ္ဓိရှင် ပြည်သူ့ကာကွယ်ရေးတပ်ဖွဲ့၊ နောင်ရိုးတပ်ဖွဲ့နှင့် မဟာမိတ်တပ်ပေါင်းစုများ ပူးပေါင်းတိုက်ခိုက်ခဲ့ကြသည်။
စက်တင်ဘာလ ၂၅ ရက်နေ့ကလည်း ဂဠုန်နက် PDFနှင့် မဟာမိတ်အဖွဲ့များပူးပေါင်းပြီး ညနေ ၆ နာရီမှ ၇ နာရီအတွင်း ဝက်လက်မြို့နယ်၊ လှတောကျေးရွာရဲစခန်း၌ တပ်စွဲထားသည့် စစ်ကောင်စီတပ်အား ၆၀ မမ ၃ လတ်ဖြင့် ၁၂ ချက်ကျော် ဝိုင်းဝန်းပစ်ခတ် တိုက်ခိုက်ခဲ့ကြောင်း Chindwin Attack Forceက ပြန်ကြားရေးတာဝန်ခံက ပြောသည်။
လှတောကျေးရွာအပြင် ရွှေဘို-မန္တလေးလမ်းပေါ်ရှိ ရွာသစ်ကြီးကျေးရွာကိုလည်း စစ်ကောင်စီတပ်က တပ်စွဲကာ အကြမ်းဖက်ဖျက်ဆီးသတ်ဖြတ်မှုများ ပြုလုပ်နေ၍ ဒေသခံအများအပြား ထွက်ပြေးတိမ်းရှောင်နေရသည်။
