သင်္ကန်းဝတ် ပျူခေါင်းဆောင် ဦးဝါသဝလိုက်လာပါသောယာဥ် မိုင်းဆွဲတိုက်ခိုက်ခံရ

စစ်ကိုင်းတိုင်း၊ ကန့်ဘလူမြို့နယ်တွင် သင်္ကန်းဝတ် ပျူစောထီးခေါင်းဆောင် ဦးဝါသဝလိုက်လာပါသော ယာဥ်အား မိုင်းဆွဲတိုက်ခိုက်ခဲ့ကြောင်း Taze Revolution Force-TRFက သတင်းထုတ်ပြန်သည်။

ယမန်နေ့ (စက်တင်ဘာ ၃ဝ ရက်) နံနက် ၁၁ နာရီခန့်က ကန့်ဘလူမြို့နယ်၊ တောက်ကရှပ်ရွာနှင့်မှော်တော်ရွာကြား ချောင်းအနောက်ဖက် လယ်ကျင်းလျှိုအနီးတွင် တပ်ရင်း – ၁၆(TRF) ထောင်ထားသည့် အဝေးထိန်းမိုင်းဖြင့် မှော်တော်ဆရာတော်ပျူခေါင်းဆောင် ဦးဝါသ၀လိုက်ပါလာသော ယာဥ်အား မိုင်းဆွဲတိုက်ခိုက်ခဲ့ကြောင်း TRFက အသိပေးသည်။

ထိုသို့တိုက်ခိုက်ရာတွင် ကားရှေ့ခန်းခေါင်းပျက်စီးပြီး ကားနှိုးမရ၍ အခြားယာဥ်အကူဖြင့်ကြိုးဆွဲကာ မှော်တော်ကျောင်းထဲ၀င်သွားသည်ဟုသိရကြောင်း၊ ထိခိုက်မှုများရှိနိုင်ကြောင်း TRFက ဆိုသည်။

ဖြစ်စဥ်နှင့်ပတ်သက်၍ Taze Revolution Force-TRFအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။

Public Service Announcement

သင်္ကန်းဝတ် ပျူခေါင်းဆောင် ဦးဝါသဝသည် စစ်ကောင်စီတပ်နှင့်ပေါင်းကာ ကန့်ဘလူနယ်နှင့် တန့်ဆည်နယ်ရှိ ကျေးရွာများသို့ စစ်တပ်စည်းရုံးရေးဟောပြောခြင်း၊ ပျုအဖွဲ့များဖွဲ့စည်းပေးခြင်း၊ ပျူသင်တန်းများဖွင့်လှစ်ပို့ချခြင်း၊ လက်နက်တပ်ဆင်ပေးကာ စစ်တပ်နှင့်အတူ ရွာစဥ်လှည့်မီးရှို့ဖျက်ဆီးမှုများ ပြုလုပ်နေသည်။