ရခိုင်ပြည်နယ် မောင်တောမြို့နယ်မြောက်ပိုင်းရှိ စစ်ကောင်စီ၏ နယ်ခြားစောင့်စခန်း တစ်ခုဖြစ်သည့် လိပ်ရစခန်းကို ရက္ခိုင့်တပ်တော်(AA)က ယနေ့ တိုက်ခိုက်သိမ်းပိုက်ခဲ့ကြောင်း မောင်တောဒေသခံ အချို့ကို ကိုးကားပြီး ရခိုင်ဒေသခံတစ်ဦးက ပြောသည်။
“အခုက အနီးအနားက လူတွေပြောတာဆိုတော့ ဖြစ်နိုင်ခြေအများကြီးရှိပါတယ်။ သူတို့ ဆီက ထုတ်ပြန်လာမှပဲ ဘယ်လောက်ကျဆုံးတယ် ဘယ်လောက်က ဒဏ်ရာရတယယယ် လက်နက် ဘယ်လောက်ဖမ်းမိတယ်ဆိုတာ စာရင်းတက်လာမှာပေါ့။ ဒါပေမဲ့ ဒါက ဖြစ်နိုင်ခြေအများကြီးရှိပါတယ်”ဟု ရခိုင်ဒေသခံတစ်ဦးက ပြောသည်။
လိပ်ရစခန်းကို ယနေ့(အောက်တိုဘာ ၁၀ရက်)နံနက် အစောပိုင်း၌ တိုက်ခိုက်သိမ်းပိုက်ခဲ့ခြင်းဖြစ်ကြောင်း AA ပြောရေးဆိုခွင့်ရှိသူ ဦးခိုင်သုခက Western News သို့ ဖြေကြားထားသည်။
“အဲဒီမှာ လက်နက်ခဲယမ်းမီးကျောက်တချို့ သိမ်းဆည်းရမိတာရှိတယ်။ ပြီးတော့ စစ်သုံ့ပန်း တချို့ ဖမ်းဆီးရမိတာ တော့ရှိတယ်။ သိမ်းဆည်းမိတဲ့ လက်နက်ရေအတွက် သုံ့ပန်းအရေ အတွက် အတိအကျတော့ ကျွန်တော်ဆီကို စာရင်းရောက်မလာသေးဘူး” ဟု ဦးခိုင်သုခက ပြောကြားထားသည်။
Public Service Announcement
AA အနေဖြင့် ဩဂုတ်မှစ၍ ပလက်၀၊ မောင်တော ဒေသများရှိ စစ်ကောင်စီတပ်စခန်းများကို တိုက်ခိုက်သိမ်းပိုက်မှုများ ဆက်တိုက်လုပ်ဆောင်လျက်ရှိသည်။ စခန်းသိမ်းတိုက်ပွဲများ ဆင်နွှဲရာတွင်လည်း အလွယ်တကူပင် စစ်ကောင်စီတပ်စခန်းများ ရရှိခဲ့ပြီး စစ်ကောင်စီတပ်က သေဆုံးထိခိုက်မှုများပြားခဲ့ပြီး လက်နက်ခဲယမ်းများစွာ ရရှိခဲ့ကြောင်း AA၏ ထုတ်ပြန်ချက်များ၌ တွေ့ရသည်။
“စခန်းရတယ်ဆိုတာ မတိုက်ခင်ကတည်းက သူတို့ အနေနဲ့ အများကြီး ပြင်ဆင်မှုတွေလုပ်ထားတယ်။ အဓိကတော့ ရိက္ခာလမ်းကြောင်းတွေ ဖြတ်ထားတာ။ ရိက္ခာပြတ်နေတော့ ဟိုဘက်က သိပ်ပြီးတော့ တိုက်ရည်ခိုက်ရည်မရှိတော့ဘူးလေ။ မရှိတော့ အဲဒီမှာ သူတို့ ဝင်စီးတာပေါ့။ စခန်းတိုက်ပြီး အဲဒီ စခန်းမီးရှို့ပြီး ပြန်ထွက်သွားတာပေါ့။ အဲဒီစခန်းတော့ ဘယ်နေမလဲ။ ဒါပေမဲ့ အဲဒီစ ခန်းကိုလည်း စစ်ကောင်စီတပ်တွေက ပြန်ပြီး သိမ်းလို့ မရနိုင်တော့ဘူး။ သူတို့က အဲဒီစခန်းမှာသာ မနေတာ အနီးပတ်ဝန်းကျင်မှာ တပ်စွဲနေရာယူထားတာပေါ့” ဟု ရခိုင်ဒေသခံက ပြောသည်။
AAက စခန်းသိမ်းတိုက်ခိုက်ခြင်းများအပြင် စစ်ကောင်စီတပ်များ အလိုအလျောက် စွန့်ခွာသွားသည့် တပ်စခန်းများရှိပြီး ဒေသခံအချို့၏ ခန့်မှန်းပြောဆိုချက်အရ သိမ်းပိုက်ခံရသည့် စခန်းနှင့် စွန့်ခွာသွားသည့် စခန်း စုစုပေါင်း ၅၀ ကျော်ရှိနိုင်သည်ဟု ဆိုသည်။
