ကျိုက်ထီးရိုးဘုရား​တောင်တက်ဂိတ်အ​​စောင့်စစ်​ကောင်စီတပ်သားများအနီးကပ်တိုက်ခိုက်ခံရပြီး ၁၀ဦးထက်မနည်း​သေဆုံးဒဏ်ရာ

▪︎အတိုက်ခံရပြီး​နောက်စစ်တပ်ကရမ်းပစ်၍ပြည်သူသုံးဦး​သေဆုံးဟု​ဒေသခံအချို့​ပြော

ကျိုက်ထီးရိုးဘုရား တောင်တက်ဂိတ်စောင့်စစ်ကောင်စီတပ်သားများအနီးကပ်အပစ်ခံရပြီး ၁၀ ဦးထက်မနည်းထိခိုက်သေဆုံးကြောင်းဒေသခံသတင်းရင်းမြစ်များကပြောသည်။

ယနေ့(အောက်တိုဘာ ၁၂ ရက်) နံနက် ၁၁ နာရီခန့်ကကျိုက်ထိုမြို့နယ်၊ ကင်မွန်းချောင်းကျေးရွာရှိ စစ်​ကောင်စီတပ်၏တောင်တက်ဂိတ်စခန်းကို လက်နက်ကိုင်များကအနီးကပ် ဝင်ရောက်ပစ်ခတ်တိုက်ခိုက်ခဲ့ခြင်းဖြစ်သည်။

“စခတွေခေါင်းပွင့်ပြီးသေတဲ့သူတွေရှိတယ်။ပြီးတော့ ဘုရားဖူးပြည်သူအချို့လည်း သေသွားတယ်”ဟု ဒေသခံတစ်ဦးက လူထုနွေဦးသို့ ပြောသည်။

ကနဦးအချက်အလက်များအရ အတိုက်ခံရပြီး​နောက်စစ်တပ်ကရမ်းသန်းပစ်ခတ်၍ ဘုရားဖူးပြည်သူ သုံးဦး သေဆုံးပြီး ၁၃ ဦး ဒဏ်ရာရရှိကာ ကင်မွန်းချောင်းတိုက်နယ်ဆေးရုံနှင့် ကျိုက်ထိုဆေးရုံသို့ ပို့ဆောင်ထားရသည်ဟုအထက်ပါ​ဒေသခံက​ပြောသည်။

Public Service Announcement

“စခတွေရမ်းသမ်းပစ်လို့ဘုရားဖူးပြည်သူတွေသေကြတာ။ သူတို့ချည်းပဲတစ်ဖက်သတ်ရမ်းသမ်းပြန်ပစ်တာနာရီဝက်လောက်ကြာတယ်”ဟု ကျိုက်ထိုမြို့ နေသူပြည်သူတစ်ဦးက လည်း​ပြောသည်။ စစ်​ကောင်စီတပ်ကိုမည်သည့်အဖွဲ့က တိုက်ခိုက်သည်ကိုမူမသိရ​သေး​ပေ။

စစ်​ကောင်စီ၏ဝါဒဖြန့်မီဒီယာများနှင့် အ​ကောင့်များကအဆိုပါပစ်ခတ်တိုက်ခိုက်မှုတွင် စစ်​ကောင်စီတပ်ထိခိုက်​သေဆုံးသည်ကိုမ​ဖော်ပြဘဲ တိုက်ခိုက်ခံရသဖြင့်ပြည်သူအချို့​သေဆုံးထိခိုက်မှုရှိခဲ့သည်ဟုသာ​ဖော်ပြ​နေသာ်ကိုတွ့ရသည်။

တိုက်ခိုက်ခံရပြီး​နောက်တောင်တက်ဂိတ်စခန်းသို့စစ်ကောင်စီတပ်က အင်အားတိုးမြှင့်နေပြီး စစ်ကားများပါ​ရောက်လာသည်ဟု မျက်မြင်တွေ့ရှိသူတစ်ဦးကပြောသည်။

ကျိုက်ထိုမြို့တွင် မကြာခဏ တိုက်ပွဲဖြစ်ပွားနေသည့်အတွက် ကျိုက်ထီးရိုးဘုရားဖူးမည့် ခရီး သွားများ အနေဖြင့် သတိပြုရှောင်ရှားရန်လည်း ဒေသခံများက အကြံပြုသည်။