ရွာလူထုကိုဖိနှိပ်သည့် စစ်ကောင်စီတပ်ကို ကလေးPDF ကြားဖြတ်တိုက်ခိုက်၊ ၁၀နာရီကြာတိုက်ပွဲဖြစ်ခဲ့

ကလေးမြို့နယ်တောင်ပိုင်း မြစ်သာမြစ်အရှေ့ဘက်ကမ်းရှိ အင်းကျွန်းကျေးရွာသို့ ဝင်ရောက်စီးနင်းသည့် စစ်ကောင်စီတပ်ကို ကြားဖြတ်တိုက်ခိုက်ခဲ့၍ တိုက်ပွဲဖြစ်ပွားခဲ့ရာ စစ်ကောင်စီတပ်ကသေဆုံးထိခိုက်မှု ရှိနိုင်ကောင်း ကလေးမြို့နယ် ပြည်သူ့ကာကွယ်ရေးတပ်ဖွဲ့(PDF)က သတင်းထုတ်ပြန်သည်။

ယနေ့ (စက်တင်ဘာ ၃ရက်) နံနက်ပိုင်းတွင် အကြမ်းဖက်စစ်ကောင်စီတပ်ဖွဲ့များအင်အားအလုံးအရင်းဖြင့် အင်းကျွန်းကျေးရွာသို့ လက်နက်ကြီး လက်နက်ငယ်များဖြင့် အကြောင်းမဲ့ပစ်ခတ် ဝင်ရောက်စီးနင်းပြီး လူနေအိမ်များကို မွှေနှောက်ဖျက်စီးခဲ့သည်ဟု ဖော်ပြထားသည်။

ထို့နောက် အကြမ်းဖက်စစ်ကောင်စီတပ်ဖွဲ့များမှ ရေရှင်ကျေးရွာဘက်သို့ ဆက်လက်ဦးတည်လာရာ နံနက် ၉နာရီအချိန်ခန့်တွင် ကလေး PDF တပ်ဖွဲ့ဝင်များက ကြားဖြတ်ခြုံခိုတိုက်ခိုက်ခဲ့ရာ ည ၇နာရီခွဲအထိ တိုက်ပွဲဆက် လက်ဖြစ်ပွားနေဟု ထုတ်ပြန်ခဲ့သည်။

၁၀နာရီခန့် ကြာမြင့်ခဲ့သည့် တိုက်ပွဲအတွင်း စစ်ကောင်စီ ၏ အကြမ်းဖက်စစ်သားများ အသေအဆုံးရှိနိုင်သော် လည်းအတည်ပြုနိုင်ခြင်းမရှိသေးကြောင်း၊ လက်နက် ကြီးဖြင့် ပစ်ခတ်မှုကြောင့် PDF (Kalay) ဘက်မှ တပ်ဖွဲ့ဝင် နှစ်ဦး ထိခိုက်ဒဏ်ရာ ရရှိထားကြောင်း ထုတ်ပြန်ခဲ့သည်။

Public Service Announcement

အကြမ်းဖက်စစ်ကောင်စီတပ်ဖွဲ့များက လက်နက်ကြီးများဖြင့်အဆက်မပြတ် ပစ်ခတ်ခဲ့သဖြင့် ရေရှင် ကျေးရွာအတွင်း လူနေအိမ်များစွာ ပျက်စီးခဲ့ကြောင်း ၊ ည ၇ နာရီ အချိန်ခန့်မှ စတင်ပြီး စစ်ကောင်စီ တပ်ကရေရှင်ရွာအတွင်းရှိ ပြည်သူတို့၏နေအိမ်များကို မီးရှို့ဖျက်စီး‌နေကြောင်း ဖော်ပြခဲ့သည်။

လက်ရှိဖြစ်ပေါ်နေသော စစ်ရေးအခြေအနေများအရ ကလေးမြို့နှင့် ဂန့်ဂေါမြို့အကြား မော်တော်ကားများဖြတ်သန်းသွားလာခြင်း လုံးဝ(လုံးဝ) မပြုလုပ်ရန် ကလေး PDFက သတိပေးထားသည်။