PDFနှင့်ဆက်သွယ်သည်ဆိုကာ ရဲအရာရှိနှစ်ဦးကိုစစ်တပ်ဖမ်းဆီးစစ်​ဆေး

▪︎ကချင်ပြည်နယ်တွင် KIA နှင့် PDF အား​ကောင်းပြီး ယင်းတို့နှင့်အလိုက်အထိုက်ဆက်ဆံခြင်းအ​ပေါ် စစ်​ကောင်စီတပ်က အနိုင်ကျင့်မှုဟု ရဲအရာရှိအချို့​ပြော

မိုးညှင်းမြို့နယ် နမ်းမားနယ်မြေရဲစခန်းမှ ဒုရဲအုပ်နှစ်ဦးကို PDFနှင့် ဆက်သွယ်သည်ဟု စွပ်စွဲကာ စစ်ကောင်စီကနိုဝင်ဘာ၁၅ရက်တွင် ဖမ်းဆီးထားပြီး ယင်းလုပ်ရပ်သည် ရဲတပ်ဖွဲ့အား စစ်တပ်က အနိုင်ကျင့်ခြင်းဟု ​ရဲအရာရှိအချို့က ပြောသည်။

နမ်းမားနယ်မြေရဲစခန်းမှ ဒုရဲအုပ်မျိုးကျော်နှင့် ဒုရဲအုပ်သွင်အောင်ကို စစ်ကောင်စီတပ်က နိုဝင်ဘာလလယ်တွင် ဖမ်းဆီးသွားခြင်းဖြစ်ပြီး ဒီဇင်ဘာ ၁ ရက်အထိပြန်မလွှတ်​သေး​ပေ။

” PDF နဲ့ အဆက်အစပ်ရှိတယ်ဆိုပြီး ဖမ်းသွားတာ။ စစ်ကြောရေးကိုပို့ထားတယ်လို့ပဲသိရတယ်။ သတင်းအစအနလည်းပျောက်နေတယ်” ဟု ကချင်ပြည်နယ်ရဲတပ်ဖွဲ့မှ ရဲအရာရှိတစ်ဦးက People’s Spring သို့ ဆက်သွယ်ပြောဆိုသည်။

ဒုရဲအုပ်မျိုးကျော်နှင့် ဒုရဲအုပ်သွင်အောင်သည်ဒီဇင်ဘာလ ၁ရက်အထိ ပြန်လွတ်မလာသေးပေ။အကြောင်းပြချက် မခိုင်လုံဘဲ ရဲအရာရှိနှစ်ဦးအား စစ်ကောင်စီတပ်က ယင်းကဲ့သို့ ဖမ်းဆီးချုပ်နှောင်ထားခြင်းသည် ရဲတပ်ဖွဲ့အား စစ်တပ်က အနိုင်ကျင့်ခြင်းဟုရဲအရာရှိအချိုက​ပြောသည်။

Public Service Announcement

“ကချင်ပြည်နယ်မှာ လူတိုင်း KIA ထောက်ခံတယ်။ PDF ထောက်ခံတယ်။ ကျွန်တော်တို့လည်း အလိုက်အထိုက်ပေါင်းရတာတွေရှိတယ်။ ဒါကို မစာနာဘဲ အနိုင်ကျင့်တာမျိုးတော့ လက်ခံလို့မရဘူး။ ဟို ဂျပုမင်းအောင်လှိုင်အာဏာရူးတာကို အောက်ကကောင်တွေက ကြမ်းချင်တိုင်း ကြမ်းပြနေတာ” ဟု ဒုရဲအုပ်အဆင့်ရှိရဲတစ်ဦးကပြောသည်။

ကချင်ပြည်နယ်တွင် KIA နှင့် PDF ပူး​ပေါင်းအဖွဲ့အား​ကောင်းသည်။ ပြီးခဲ့သည့် နိုဝင်ဘာ (၂၇)ရက်ညတွင် KIAနှင့် PDFပူးပေါင်းအဖွဲ့က မိုးညှင်းမြို့ တက္ကသိုလ်ဝင်းအတွင်းတပ်စွဲထားသည့် စစ်ကောင်စီတပ်ကို တိုက်ခိုက်ခဲ့သည်။

လတ်တလောတွင် KIA PDF ပူးပေါင်းအဖွဲ့နှင့် စစ်ကောင်စီသည် ဖားကန့်တွင် စစ်ရေးတင်းမာနေသည်။ ဖားကန့်မြို့နယ် အခြေစိုက် ၊ KIA တပ်မဟာ(၉ )ကအများပြည်သူနှင့်သက်ဆိုင်သော ဘာသာရေးအဆောက်အဦးများ၊ ကျောင်းများတွင် စစ်ကောင်စီစစ်သားများ ခေတ္တနားနေခြင်း၊ ညအိပ်ခြင်းများ ခွင့်မပြုရန် ယနေ့ သတိပေးချက် ထုတ်ပြန်ထားသည်။