'/%3E%3C/svg%3E){kind=small}
မိုးဗြဲမြို့နယ်ရှိ စစ်ဘေးရှောင်များရှိရာနေရာကို အကြမ်းဖက်စစ်ကောင်စီတပ်က လက်နက်ကြီးဖြင့် တမင်ချိန်ရွယ်၍ ပစ်ခတ်သဖြင့် စစ်ရှောင်ပြည်သူတစ်ဦးသေဆုံးပြီး နှစ်ဦးပြင်းထန်ဒဏ်ရာရရှိကြောင်း မိုးဗြဲပြည်သူ့ကာကွယ်ရေးတပ်(MBPDF)က ယနေ့ထုတ်ပြန်သည်။
ယမန်နေ့(ဇန်နဝါရီ ၁၆ရက်) ည ၈နာရီ၁၅မိနစ်ဝန်းကျင်မှစ၍ ဖယ်ခုံမြို့ရှိ အကြမ်းဖက်စစ် ကောင်စီအမြောက်တပ်မှ စစ်ဘေးရှောင်များရှိရာနေရာသို့ တမင်တကာချိန်ရွယ်ကာနှစ်ဆင့်ကွဲအမြောက်ဖြင့် ပစ်ခတ်မှုကြောင့် ကောင်းဆောင်ကျေးရွာသို့ လက်နက်ကြီးကျည်ကျရောက်ပေါက်ကွဲခဲ့သည်ဟု ဆိုသည်။
သေဆုံးသွားသူမှာ အသက်(၃၃)နှစ်ရှိ ဒေါ်မူလင်း ဖြစ်ပြီး ကောင်းဆောင်ရွာသို့ စစ်ဘေးရှောင်ရန် လာရောက်နေထိုင်သူ ဖြစ်သည်။
“မနေ့က ည ၇ နာရီခွဲလောက်ကတည်းက ဖယ်ခုံမှာ ပစ်ခတ်သံရော လေယာဥ်သံတွေပါကြားတာ။သူတို့ဘက်က စစ်လှန့်တဲ့အနေအထားဘဲ။ဒါပေမယ်လို့ အရပ်သားတွေပါ ပစ်မှတ်လုပ်ပြီး တိုက်ခိုက်နေတာကတော့ စစ်တပ်ရဲ့ အကြမ်းဖက်လုပ်ရပ်လို့ပဲ ပြောချင်တယ်”ဟု MBPDF တာဝန်ရှိသူ က ပြောသည်။
Public Service Announcement
အလားတူ စစ်ရှောင်နေရာကို တမင်တကာချိန်ရွယ်ပြီး ပစ်ခတ်သောလုပ်ရပ်များက အကြမ်း ဖက်စစ်ကောင်စီသည် ပြည်သူများကိုပါ ရန်သူသဖွယ်သတ်မှတ်လုပ်ဆောင်နေခြင်းဟု MBPDF က အသိပေးသည်။
ထို့ကြောင့် မည်သည့်နေရာသည်လုံခြုံသည်ဟူ ၍မရှိသောကြောင့် မိမိလုံခြုံရေးကိုအထူးဂရုပြုသွားလာနေထိုင်ပေးရန် တိုက်တွန်းသည်။
စစ်ကောင်စီ၏ လက်နက်ကြီးကျည်ကြောင့် ယခုလ ၁၆ရက်အတွင်း၌ပင် အရပ်သားပြည်သူ လေးဦးသေဆုံးခဲ့ရပြီ ဖြစ်သည်။
