တနင်္သာရီတိုင်း၊ သရက်ချောင်းမြို့နယ်၊ ညောင်ဇင်ရွာတွင်စစ်ကောင်စီတပ်လက်အောက်ခံ ပျူစောထီးတစ်ဦးကိုPDFများက ပစ်ခတ်ရှင်းလင်းခံရပြီးနောက် ထိုရွာရှိ အထက်တန်းကျောင်းကို စစ်ကောင်စီတပ်က မီးရှို့လိုက်ကြောင်း ဒေသခံများကပြောသည်။
ဖေဖော်ဝါရီ ၃ ရက်မနက်ပိုင်း ၄ နာရီခန့်က ညောင်ဇင်ရွာမှ ထားဝယ်မြို့ကို သွားသည့် ပျူစောထီးတစ်ဦးကို ဒေသခံကာကွယ်ရေးတပ်များက ပစ်ခတ်ရှင်းလင်းပြီးနောက် နေ့လယ် ၁၂နာရီခန့်တွင် စစ်ကောင်စီတပ်နှင့်ပျူစောထီးများက စာသင်ကျောင်းကို မီးရှို့ခဲ့ခြင်းဖြစ်သည်ဟု သရက်ချောင်းမြို့နယ်ရှိ ဒေသခံတစ်ဦးကပြောသည်။
“မနက်ပိုင်းမှာဒလန်ပျုစောထီးကိုရှင်းလိုက်ပြီးစစ်တပ်နဲ့ ပျူစောထီးတွေ ၂၀လောက် ရောက်လာပြီးစစ်ဆေးရေးလုပ်တယ်။ပြီးတော့ ကျောင်းက မီးလောင်သွားတာ”ဟုဒေသခံကပြောသည်။
ပစ်ခတ်မှုဖြစ်ပွားပြီးနောက် ဒေသခံများက နေအိမ်ထဲမှ အပြင်မထွက်ကြဘဲ စာသင်ကျောင်းမီးလောင်ချိန်မှသာ သိရသည်ဟု ဒေသခံအချို့ကပြောသည်။ အဆိုပါကျောင်းသည် စာသင်ကြားမှုမရှိတော့၍ ကျောင်းဖွင့်ထားနိုင်ခြင်းမရှိသည့် ကျောင်းဖြစ်သည်ဟုဒေသခံများကပြောသည်။
Public Service Announcement
“ရုံးခန်းတစ်ခုပဲ ကျန်ခဲ့တော့တယ်၊ အကုန်လုံးပြာကြသွားပြီ”ဟု အဆိုပါကျောင်းတွင်တက်ရောက်ခဲ့သည့် အခြားဒေသခံတစ်ဦးကပြောသည်။
ပျူစောထီးအားပစ်ခတ်ရှင်းလင်းမှုကို မည်သည့်အဖွဲ့အစည်းက ပြုလုပ်သည်ကို ထုတ်ပြန်ခြင်းမရှိသေးပေ။
ညောင်ဇင်ရွာသည် ရန်ကုန်-ထားဝယ်-မြိတ် ပြည်ထောင်စုလမ်းမကြီးဘေးတွင်တည်ရှိသော ကျေးရွာတစ်ခုဖြစ်သည်။
