ခင်ဦးမြို့နယ် ကံသစ်ရွာတွင် ပျူစောထီးတစ်ဦးအသတ်ခံရ၍ စစ်ကောင်စီတပ် ရွာတွင်သောင်းကျန်း

စစ်ကိုင်းတိုင်း ရွှေဘိုခရိုင် ခင်ဦးမြို့နယ် ကံသစ်ရွာတွင် ပျူစောထီးအဖွဲ့ဝင်ဟု လူသိများနေသူ အမျိုးသားတစ်ဦး အသတ်ခံရ၍ စစ်ကောင်စီတပ်များ ကျေးရွာအတွင်းသေနတ်ဖြင့် ပစ်ခတ်သောင်းကျန်းနေကြောင်း ဒေသခံများက ပြောသည်။

ယနေ့( စက်တင်ဘာလ ၁၆ ရက်) နံနက်ပိုင်းက ခင်ဦးမြို့နယ် ကံသစ်ရွာရှိ စစ်ကောင်စီလက်အောက်ခံ ပျူစောထီးအဖွဲ့ဝင်တစ်ဦးအား လူတစ်စုက လာရောက်သတ် ဖြတ်သွားပြီးနောက် စစ်ကောင်စီတပ်များရောက်ရှိလာကာ ဆက်တိုက်ပစ်ခတ်မှုများ ပြုလုပ်ခဲ့သည်။ထိုအပြင်ကျေးရွာမှပြည်သူ ၁၅ဦးဝန်းကျင် ဖမ်းဆီးခံရပြီး၊ဖမ်းဆီးခံရသူများအနက် အသက်မပြည့်သေးသော ကလေးငယ်များလည်း ပါဝင်နေကြောင်း ခင်ဦးဒေသခံအချို့က ပြောသည်။

“တွေ့သမျှအကုန်ဖမ်းနေတယ်။ ရွာထဲလည်းပစ်တယ်။ ဖမ်းထားတဲ့သူတွေကို ကံသစ်အရှေ့ဇရပ်မှာ စစ်နေတယ်။”ဟု ဒေသခံတစ်ဦးက ပြောသည်။ ပစ်ခတ်မှုကြောင့် ရွာသူရွာသားများမှာလည်း ထွက်ပြေးတိမ်းရှောင်နေရသည်ဟု ဒေသခံများက ပြောသည်။

စက်တင်ဘာလ ၁၁ ရက်နေ့ကလည်း ကံသစ်ရွာမှ အသက်၃၀ ဝန်းကျင် ကိုထွန်းမြင့်နိုင်ဆိုသူအား စစ်ကောင်စီက လာရောက် ဖမ်းဆီးသွားပြီးနောက် ပစ်ခတ်သတ်ဖြတ်ခဲ့သဖြင့် သေဆုံးခဲ့ကြောင်း ဒေသခံများက ပြောသည်။

Public Service Announcement

ကံသစ်ကျေးရွာတွင် လွန်ခဲ့သည့် မေလ ၃ ရက်နေ့ညပိုင်းက စစ်ကောင်စီခန့် ကျေးရွာ အုပ်ချုပ်ရေးမှူး အိမ်၌ လက်လုပ် ဗုံးပေါက်ကွဲခဲ့၍ ဒေသခံများ ထွက်ပြေးတိမ်းရှောင်ခဲ့ရဖူးသည်။