ကရင်အမျိုးသားအစည်းအရုံး(KNU) တပ်မဟာ(၅) နယ်မြေတွင် စက်တင်ဘာ ၁ရက်မှ ၁၅ရက်နေ့အထိ တိုက်ပွဲပေါင်း ၁၂၂ ကြိမ် ဖြစ်ပွားခဲ့ရာ အကြမ်းဖက်စစ်တပ်မှ ၇၀ ဦးသေဆုံပြီး ၉၁ဦး ဒဏ်ရာရခဲ့ကြောင်း တပ်မဟာ(၅)၏ Mutraw News က သတင်းထုတ်ပြန် သည်။
KNU တပ်မဟာ(၅)ဘက်ကလည်း နှစ်ဦးကျဆုံးပြီး ငါးဦးဒဏ်ရာရရှိခဲ့သည်ဟုလည်း ဖော်ပြထားသည်။
စစ်တပ်အာဏာသိမ်းပြီးကတည်းက တိုက်ပွဲများဆက် တိုက်ဖြစ်ပွားနေသည့် KNU တပ်မဟာ(၅) နယ်မြေတွင် စစ်ကောင်စီတပ်နှင့် ၎င်း၏ လက်အောက်ခံ နယ်ခြားစောင့်တပ်ဖွဲ့(BGF)တို့က အင်အားတိုးချဲ့လာ၍ နေ့စဉ်နီးပါး တိုက်ပွဲဖြစ်နေဟု တပ်မဟာ(၅)က ဆိုသည်။
အာဏာလုအကြမ်းဖက် စစ်ကောင်စီသည် အများပြည်သူများ၏ ဥယျာဉ်၊ ခြံမြေများအတွင်းသို့ လက်နက်ကြီးများစွာ ပစ်ခတ်ခဲ့ကြောင်း၊ ပြည်သူလူထုနေအိမ် ၅လုံး ပျက်စီးခဲ့ပြီး အရပ်သားတစ်ဦး ဒဏ်ရာရရှိခဲ့ကြောင်း ထုတ်ပြန်ချက်တွင် ဖော်ပြထားသည်။
Public Service Announcement
စစ်ကောင်စီတပ်အနေဖြင့် ဒရုန်းများ၊ ကင်းထောက်လေယာဉ်များအသုံးပြုပြီး KNU တပ်မဟာ(၅) ထိန်းချုပ်ဒေသသို့ မကြာမကြာထောက်လှမ်းမှုများလုပ်ဆောင်ခဲ့သည်ဟုဆိုသည်။
စစ်ကောင်စီတပ်သည် မတ်လအတွင်းက တပ်မဟာ(၅) နယ်မြေသို့ ဗုံးကြဲတိုက်ခိုက်မှု ပြုလုပ်ခဲ့၍ ဒေသတွင်းရှိ အရပ်သားများ သေဆုံးထိခိုက်မှု ရှိခဲ့ပြီး ထိုသို့ တိုက်ခိုက်မှုကြောင့် ဒေသခံ ထောင်နှင့်ချီ၍ ထွက်ပြေးတိမ်းရှောင်ခဲ့ကြရသည်။
