'/%3E%3C/svg%3E){kind=small}
ရန်ကုန်တိုင်း ခရမ်းမြို့နယ်တွင် စစ်ကောင်စီ၏ ရဲစခန်းနှင့် စစ်ဆေးရေးဂိတ်နှစ်ခုအား (၄၀)မမဖြင့် ပစ်ခတ်တိုက်ခိုက်ခဲ့ကြောင်း PDF Kayan ခေါင်းဆောင် ကိုမီးပွားက ပြောသည်။
စစ်ကောင်စီ၏ ပိန်းကန်ရဲစခန်း၊ ကရင်ကန်ဂိတ် နှင့် သစ်တောစစ်ဆေးရေးဂိတ်တို့အား တိုက်ခိုက်ခဲ့ခြင်းဟု ကိုမီးပွားက ပြောသည်။
“ပြည်သူကိုဒုက္ခပေးနေတဲ့ စကစဂိတ်တွေ ၊ ကရင်ကန်ဂိတ် ၊ သစ်တောဂိတ် နဲ့ ပိန်းကန်ရဲစခန်းကို ဒီနေ့ညနေမှာ တိုက်ခိုက်ခဲ့တာပါ” ဟု ၎င်းက ပြောသည်။
ယင်းစစ်ဆင်ရေးတွင် နေရာတစ်နေရာကို (၄၀) မမဗုံးသီး လေးလုံးခန့်ဖြင့် ပစ်ခတ်တိုက်ခိုက်ခဲ့ပြီး စစ်ကောင်စီဘက်မှ အထိအခိုက်ကိုမူ စုံစမ်းဆဲဖြစ်ကြောင်း ၎င်းက ဆိုသည်။
Public Service Announcement
“ကျွန်တော်တို့ဘက်ကတော့ အေးဆေးပါပဲ။”ဟု ရဲဘော်အားလုံးဘေးကင်းကြောင်း ကိုမီးပွားကပြောသည်။
အဆိုပါတိုက်ခိုက်မှုကြောင့် စစ်ကောင်စီဘက်မှ ထိခိုက်သေဆုံးမှု ခြောက်ဦးခန့်ရှိနိုင်ကြောင်း ဒေသတွင်းသတင်းများ ဖော်ပြပေးနေသည့် ခရမ်းချန်နယ်က အသိပေးထားသည်။
ထိခိုက်သေဆုံးမှုနှင့်ပတ်သက်၍ စစ်ကောင်စီဘက်မှ သတင်းဖုံးထားသောကြောင့် ထိခိုက်သူအရေအတွက်သည် ယင်းပမာဏထက် များနိုင်ကြောင်းလည်း ဆက်လက် ဖော်ပြထားသည်။
ယင်းဖြစ်စဉ်ဖြစ်သည့်အချိန်တွင် စစ်ကောင်စီဘက်မှ စက်သေနတ်ဖြင့်ပစ်၍ အလောင်းကောက်ခဲ့ကြောင်း ဒေသခံများ၏ ပြောကြားချက်ကို ရေးသားထားသည်။
အဆိုပါစစ်ဆင်ရေး အထိအခိုက်အတိအကျကို လူထုနွေဦး အနေဖြင့် သီးခြားအတည်ပြုနိုင်ခြင်းမရှိပေ။
“ခရမ်းမြို့ကို ခရမ်းပြည်သူတွေပိုင်တယ်။ ခရမ်းပြည်သူတွေက မွေးဖွားလာတဲ့ ခရမ်း PDFတွေနဲ့အတူ ရရာလက်နက်ကိုင်စွဲပြီး အကြမ်းဖက် စကစကို တော်လှန်ကြပါစို့ လို့ပြောချင်ပါတယ်” ဟု ကိုမီးပွားက ပြောသည်။
ထို့ပြင် ၎င်းတို့အဖွဲ့သည် ပြည်သူ့ထောက်ပံ့မှုဖြင့်ရပ်တည်နေသည့် အဖွဲ့ဖြစ်သောကြောင့် ပြည်သူများအနေဖြင့် ထောက်ပံ့ပေးရန် တောင်းဆိုထားသည်။
