တနင်္သာရီမြို့နယ်၊ သိန်ခွန်းရွာအနီးတိုက်ပွဲ၌ စစ်ကောင်စီတပ်ဖွဲ့ဝင် ဆယ်ဦးထက်မနည်းသေဆုံးခဲ့ပြီးနောက် ဒေသတွင်း တိုက်ပွဲများပိုမိုပြင်းထန်လာနိုင်သောကြောင့် ခရီးသွားပြည်သူများအနေဖြင့် သတိရှိစွာ သွားလာနေထိုင်ကြရန်ပြည်သူ့ကာကွယ်ရေးတပ်မတော်(မြိတ်ခရိုင်)၊တပ်ရင်း-၂သတင်းနှင့်ပြန်ကြားရေးမှတာဝန်ရှိသူကပြောသည်။
သိန်ခွန်းရွာအနီးတွင် ဧပြီလ ၂ရက် နံနက် ၁၁ နာရီခန့်မှ ၁၁နာရီ ၄၅ မိနစ်ခန့်အထိ့ တိုက်ပွဲဖြစ်ပွားခဲ့သည်။ပြည်သူ့ကာကွယ်ရေးတပ်မတော် မြိတ်ခရိုင်တပ်ရင်း-၂ တပ်ခွဲ(၁)၊ မဟာမိတ်ပူးပေါင်းအဖွဲ့နှင့် KTLAပူးပေါင်းအဖွဲ့က စစ်ကောင်စီတပ်ကို တိုက်ခိုက်ခဲ့ရာစစ်သားဆယ်ဦးခန့် သေဆုံးခဲ့ကြောင်းပြည်သူ့ကာကွယ်ရေးတပ်မတော်(မြိတ်ခရိုင်)၊တပ်ရင်း-၂ သတင်းနှင့်ပြန်ကြားရေးကထုတ်ပြန်သည်။
တိုက်ပွဲတွင် ပြည်သူ့ကောင်ကွယ်ရေးရဲဘော်များ အထိအခိုက်မရှိ အောင်မြင်စွာ ပြန်လည်ဆုတ်ခွာနိုင်ခဲ့သည်ဟုဆိုသည်။
ထို့ကြောင့်တနင်္သာရီမြို့နယ်အတွင်း စစ်ရေးတင်းမာနေသဖြင့် ဒေသခံမိဘပြည်သူများနှင့် ခရီးသွားပြည်သူများအနေဖြင့် သတိရှိစွာ သွားလာနေထိုင်ပေးကြပါရန်နှင့် စစ်ရေးအရှိန်မြင့်မားလာနိုင်သည့် အတွက်ကြောင့် မိဘပြည်သူများ၏ လုံခြုံရေးကိုရှေးရှု၍ မေတ္တာရပ်ခံကြောင်းလည်းအသိပေးထားသည်။
Public Service Announcement
ဒေသတွင်း တိုက်ပွဲများဖြစ်ပွားနေ၍ ပြည်ထောင်စုလမ်းမကို အသုံးမပြုရန် ဧပြီ ၁ ရက်ကတားမြစ်ထားသော်လည်း ဧပြီ ၁ ရက်ညတွင်ပင် ဖြတ်သန်းသွားလာသောခရီးသည်တင်ကားတစီးကို မှားယွင်းပစ်ခတ်မိခဲ့သည့် ဖြစ်ရပ်တစ်ခု ဖြစ်ခဲ့သည်။တနင်္သာရီမြို့နယ်၊လယ်တောင်ရွာနှင့် တမုန်ချုံရွာကြား ပြည်ထောင်စုလမ်းမကြီးပေါ်တွင် ဖြတ်သန်းခွင့်ပိတ်ထားချိန် မောင်းနှင်လာသည့် ခရီးသည်တင်ကားကို ပြည်သူ့ကာကွယ်ရေးတပ်ဖွဲ့က ရပ်တန့်ရန်သတိပေးပစ်ခတ်စဉ် မောင်းပြေး၍ ပစ်ခတ်ရာခရီးသည် နှစ်ဦးသေဆုံးပြီး ငါးဦးဒဏ်ရာရခဲ့သည်။စစ်ကောင်စီတပ်ဖွဲ့က ခရီးသည်အသွင်ယူလာသည်ဟုထင်ကာ ပစ်ခတ်မိခြင်းဟု ပြည်သူ့ကာကွယ်ရေးတပ်မတော်(မြိတ်ခရိုင်)၊တပ်ရင်း-၂က ထုတ်ပြန်ထားသည်။ယင်းအတွက် အနူးအညွန့်တောင်းပန်ကြောင်းနှင့် ပြည်သူလူထုလုံခြုံရေးအရ သတိပေးမှုများကို တိတိကျကျလိုက်နာကြရန် မေတ္တာရပ်ခံထားသည်။
မြိတ်ခရိုင်တပ်ရင်း (၁)ပြည်သူ့ကာကွယ်ရေးတပ်ဖွဲ့ဝင်တစ်ဦးက ” သတိပေးချက်တွေ၊ စစ်ရေးသတင်းတွေကို နားထောင်ပြီးမှ သွားသင့်မှသွားစေချင်တယ်”ဟုပြောသည်။
၎င်းကဆက်လက်၍လည်း” စစ်ကောင်စီက ခရီးသည်တင်ကားတွေ အသုံးချတာ အများကြီးပဲ။ သူတို့ကိုယ်၌က ယူနီဖောင်းနဲ့သွားလို့မရတဲ့ခရီးစဉ်တွေ ဆိုလို့ရှိရင် ခရီးသည်တင်ကားတွေမှာ အရပ်သယောင်ဆောင်လိုက်တယ်” ဟုပြောသည်။
လတ်တလောတွင် မြိတ်မြို့နယ်၊ကြေးနန်းတိုင် တံတားမှစ၍ ဘုတ်ပြင်းမြို့နယ်၊ မနိုးရုံးကျေးရွာအထိပြည်ထောင်စုလမ်းမကြီးလမ်းပိုင်းနှင့် ထုံခါ- မောတောင်နယ်စပ်ကုန်သွယ်ရေးလမ်း သွားလာခြင်းကိုဧပြီလ ၃ရက်မှစ၍ ပြည်သူ့ကာကွယ်ရေးတပ်ဖွဲ့က တားမြစ်ထားသည်။
အများပြည်သူများထိခိုက်နစ်နာမှုမရှိစေရန် ထုတ်ပြန်ခြင်းဖြစ်ပြီး အလေးထားလိုက်နာကြရန်နှင့် တော်လှန်ရေး အဖွဲ့အစည်းများမှ ပြန်လည်မရုတ်သိမ်းမီအချိန်အထိ အတည်ဖြစ်သည်ဟုပြည်သူ့ကာကွယ်ရေးတပ်မတော်(မြိတ်ခရိုင်)တပ်ရင်း-၂က ထုတ်ပြန်ထားသည်။
ထို့အပြင် စစ်ကောင်စီတပ်ဖွဲ့ဝင်များက အရပ်ဝတ်ဖြင့် ခရီးသွားဟန်ဆောင်ကာ လိုက်ပါလာနိုင်သောကြောင့် တနင်္သာရီတိုင်းအတွင်း ရေး-ထားဝယ်-ဘိတ်-ကော့သောင်း နှင့် မောတောင် လမ်းတလျှောက် ခရီးသည်တင်ကားများအား ပြည်သူ့ကာကွယ်ရေးတပ်ဖွဲ့များက စစ်ဆေးသွားမည်ဖြစ်ပြီး ပူးပေါင်းဆောင်ရွက်ပေးရန် မြိတ်ခရိုင် တပ်ရင်း (၁)၊ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။
